បក្សប្រជាជនកម្ពុជានិងបក្សសង្គ្រោះជាតិ ព្រមព្រៀងបញ្ជូនតំណាងចរចា តែមិនទាន់កំណត់ពេល
គណបក្សប្រជាជនកម្ពុជា និងគណបក្សសង្គ្រោះជាតិ បានព្រមព្រៀង បញ្ជូនឲ្យតំណាង ជួបចរចាគ្នា ដើម្បីនិយាយពីការរៀបចំយន្តការនៃការធ្វើកំណែទម្រង់ការបោះឆ្នោត។ ប៉ុន្តែរហូតដល់រសៀលថ្ងៃទី១៣កុម្ភៈ គណបក្សជាប់ឆ្នោតទាំងពីរ មិនទាន់កំណត់ថ្ងៃពិតប្រាកដ ដើម្បីវិលចូលរួមតុចរចាឡើងវិញនៅឡើយទេ។ យ៉ាងណាក៏ដោយ លោកសមរង្ស៊ី បានបញ្ជាក់ថា កិច្ចចរចាកែទម្រង់ការបោះឆ្នោត គឺមិនទាក់ទងនឹងការចូល ឬមិនចូលប្រជុំរដ្ឋសភារបស់គណបក្សសង្គ្រោះជាតិនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៩
គណបក្សប្រជាជនកម្ពុជា បានចេញសេចក្តីថ្លែងការណ៍ ចុះថ្ងៃទី១៣ ខែកុម្ភៈ ឆ្នាំ២០១៤ ដើម្បីឆ្លើយតបនឹងគណបក្សសង្គ្រោះជាតិ ជុំវិញការបង្កើតគណៈកម្មការរបស់រាជរដ្ឋាភិបាល ដើម្បីសិក្សាស្រាវជ្រាវកែទម្រង់ការបោះឆ្នោត។ កំណែទម្រង់ការបោះឆ្នោត ត្រូវបានគណបក្សប្រជាជនកម្ពុជា ចាត់ទុកថា ជាកិច្ចដំណើរការ ដែលធ្លាប់បានអនុវត្តជាបន្តបន្ទាប់កន្លងទៅ និងជាកំណែទម្រង់ដ៏ស្មុគស្មាញ ដែលទាមទារពេលវេលា ដោយមិនអាចអូសបន្លាយពេលវេលាតទៅទៀតបានឡើយ។
គណបក្សប្រជាជនកម្ពុជា បានបញ្ជាក់ថា ការបង្កើតគណៈកម្មការរបស់រាជរដ្ឋភិបាល ដែលកើតចេញពីគណបក្សប្រជាជនកម្ពុជា ដើម្បីសិក្សាស្រាវជ្រាវអំពីជម្រើសនានា ក្នុងដំណើរការកំណែទម្រង់ការបោះឆ្នោត គឺជាការបង្ហាញនូវឆន្ទៈដ៏ពិតប្រាកដរបស់ខ្លួន ក្នុងការបន្តកិច្ចដំណើរការកំណែទម្រង់ដ៏មានសារៈសំខាន់នេះ។
ក្នុងន័យនេះ គណបក្សប្រជាជនកម្ពុជា បានប្រកាសសូមស្វាគមន៍ និងស្នើសុំគណបក្សសង្គ្រោះជាតិ ចាត់តំណាងរបស់ខ្លួន ជួបចរចាជាមួយតំណាងគណបក្សប្រជាជនកម្ពុជា ដើម្បីរៀបចំយន្តការមួយ សម្រាប់កិច្ចដំណើរការកំណែទម្រង់ការបោះឆ្នោត នាពេលខាងមុខ តាមស្មារតីនៃកិច្ចប្រជុំកំពូលរវាងគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី១៦ ខែកញ្ញា ឆ្នាំ២០១។
នៅរសៀលថ្ងៃ១៣កុម្ភៈ លោក សម រង្ស៊ី ប្រធានគណបក្សសង្គ្រោះជាតិ ឲ្យដឹងថា គណបក្សប្រឆាំង នឹងចាត់តំណាង ដើម្បីឲ្យមានការចរចាគ្នាពិតប្រាកដ ដើម្បីរៀបចំការបោះឆ្នោតលើកក្រោយឲ្យបានត្រឹមត្រូវ។ លោកសមរង្ស៊ី បញ្ជាក់ថា គណបក្សសង្គ្រោះជាតិ ចង់ឲ្យការងារនេះ ឈានទៅមុខឲ្យបានឆាប់ និងកំពុងគិតគូ ហើយនឹងសម្រេចឆាប់ៗនេះ។
តែយ៉ាងណាក៏ដោយ លោក សម រង្ស៊ី បានបញ្ជាក់ថា គណបក្សសង្គ្រោះជាតិ នៅតែរក្សាជំហរឲ្យមានការចូលរួមដោយទូលំទូលាយក្នុងសមាសភាពក្រុមការងារកែទម្រង់ការបោះឆ្នោត ដែលមានអ្នកជំនាញ និងសង្គមស៊ីវិលខាងបោះឆ្នោត ជាដើម។
ជាមួយគ្នានោះ លោកសមរង្ស៊ី ក៏បានបញ្ជាក់ថា ការចូលប្រជុំរដ្ឋសភា និងកការកែទម្រង់ការបោះឆ្នោត ជារឿងដាច់ដោយឡែកពីគ្នា ហើយជំនួបកំពូល កាលពីថ្ងៃទី១៦ ខែកញ្ញា ឆ្នាំ២០១៣ គឺនិយាយតែពីការកែទម្រង់បោះឆ្នោតប៉ុណ្ណោះ។
អំពីរបៀបវារៈ និងជំហរដែលគណបក្សសង្គ្រោះជាតិ ចង់ឲ្យមានការចូលរួមទូលំទូលាយ ក្នុងកំណែទម្រង់ការបោះឆ្នោត ត្រូវបានតំណាងជាន់ខ្ពស់គណបក្សប្រជាជនកម្ពុជា លោក ព្រំ សុខា គូសបញ្ជាក់ថា ជំហ៊ានដំបូង គឺជួបគ្នាសិន ដើម្បីនិយាយពីយន្តការបង្កើតគណៈកម្មការកែទម្រង់ការបោះឆ្នោត។
តាមលោក ព្រំ សុខា គ្មានដំណោះស្រាយណា ដែលល្អប្រសើរ ដើម្បីដោះស្រាយបញ្ហានយោបាយ ក្រៅពីការចរចាទេ។
សម្រាប់លោក ហង្ស ពុទ្ធា នាយកប្រតិបត្តិអង្គការឃ្លាំមើលការបោះឆ្នោត នីកហ្វិក កំណែទម្រង់ការបោះឆ្នោតមួយ ដើម្បីឲ្យមានប្រសិទ្ធភាពល្អប្រសើរ ត្រូវទាមទារឲ្យអ្នកពាក់ព័ន្ធចូលរួម។ លោក ហង្ស ពុទ្ធា បន្តថា សញ្ញាណដែលគណបក្សប្រជាជនកម្ពុជា បើកទ្វារឲ្យគណបក្សសង្គ្រោះជាតិ ជួបចរចាក្នុងកំណែទម្រង់ការបោះឆ្នោត ជាជំហ៊ានល្អមួយ។ តែនៅមានរឿងជាច្រើនទៀត ដែលគូភាគីទាំងសង្ខាង ត្រូវធ្វើការជាមួយគ្នា ប្រកបដោយស្មើភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ