ពិធីបុណ្យអុំទូក៖ ភ្នំពេញមិនមានការប្រណាំងទូក តែមាននៅស្វាយរៀង
តាមប្រក្រតិទិន ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ត្រូវចូលមកដល់នៅថ្ងៃទី១៦-១៧និង១៨វិច្ឆិកានេះ។ ប៉ុន្តែឆ្នាំនេះ មិនមានការប្រារព្ធពិធីបុណ្យទេ។ ទោះជាយ៉ាងនេះក្ដី មន្ត្រីរាជការ បុគ្គលិកក្រុមហ៊ុន ត្រូវបានអនុញ្ញាតឲ្យឈប់សម្រាក ដោយហេតុថា ៣ ថ្ងៃនេះ ត្រូវបានកំណត់ជាថ្ងៃបុណ្យជាតិ។ ទីក្រុងភ្នំពេញប្រែជាស្ងប់ស្ងាត់ ដោយសារតែប្រជាពលរដ្ឋមួយចំនួនធំ ចេញពីក្រុង តម្រង់ទៅតាមបណ្ដាខេត្តជាទិសដៅទេសចរណ៍នានា ដើម្បីសម្រាកលម្ហែ។ ថ្វីដ្បិតតែមិនមានប្រារព្ធពិធីបុណ្យអធិកអធមនៅភ្នំពេញដូចធ្លាប់ធ្វើកន្លងមក ប៉ុន្តែនៅតាមបណ្ដាខេត្ត ពិសេសខេត្តស្វាយរៀង មានរៀបចំប្រារព្ធពិធីបុណ្យអុំទូក នៅទន្លេវ៉ៃកូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ចរាចរណ៍ចាប់ផ្តើមបិទ នៅក្នុងរង្វង់ប្រតិបត្តិការដ៏ធំនៅក្នុងខណ្ឌដូនពេញចាប់ពីថ្ងៃដំបូងនៃពិធី បុណ្យអុំទូក បណ្តែតប្រទីប និងសំពះព្រះខែ ជារៀងរាល់ឆ្នាំ។ មនុស្សម្នាស្ថិតក្នុងសភាពអ៊ូអរ អ្នកលក់ដូរត្រៀមផលិតផលរបស់ខ្លួន អ្នកដើរលេងត្រៀមសម្លៀកបំពាក់សំអិតសំអាងកាយ ដើម្បីទៅមើលទូកមើលកាំជ្រួច និងទស្សនាទស្សនីយភាពដ៏ច្រើនសន្ធឹកសន្ធាប់ព្រមទាំងមើលមនុស្សគ្នាឯងផងដែរ។
ទិដ្ឋភាពទាំងអស់នេះមិនមានទេ នៅមុខព្រះបរមរាជវាំងនៅថ្ងៃសៅរ៍ទី ១៦ វិច្ឆិកានេះ ដែលជាថ្ងៃបុណ្យអុំទូកដំបូង។ ភាពស្ងប់ស្ងាត់បានជំនួសវត្តមានមនុស្សរាប់លាននាក់នៅតាមដងវិថី សួនច្បារ និង ទន្លេចតុមុខទាំងសងខាង ម្តុំព្រះបរមរាជវាំងតាំងពី៣ឆ្នាំមកម្ល៉េះ ដោយសារកម្ពុជាជួបប្រទះគ្រោះមហន្តរាយទឹកជំនន់ផ្ទួនៗ និងភាពក្រៀមក្រំនៃការយាងចូលទិវង្គតរបស់ព្រះមហាវីរក្សត្រ សម្តេចឪ នរោត្តមសីហនុកាលពីឆ្នាំទៅ។
ជំនួសឲ្យការខកខាននេះរដ្ឋាភិបាលកម្ពុជាបានអនុញ្ញាតឲ្យខេត្ត-រាជធានី ដែលមានលទ្ធភាពអាចរៀបចំនៅតាមកន្លែងរៀងៗខ្លួន ហើយមន្ត្រីរាជការនៅតែមានសិទ្ធិឈប់សម្រាករយៈពេល ៣ថ្ងៃដដែល។
សម្រាប់ថ្ងៃបុណ្យអុំទូកថ្ងៃទី១នេះ ខេត្តស្វាយរៀងបានរៀបចំនៅក្នុង ក្របខ័ណ្ឌខេត្តរបស់ខ្លួននូវពិធីបុណ្យអុំទូកចំនួនមួយថ្ងៃ ដោយមានការចូលរួមពីទូកងប្រមាណជា៤០ទូក នៅលើទន្លេវ៉ៃកូ។ ពិធីដែលមានការចូលរួមជាអធិបតីពីលោកស្រីឧបនាយករដ្ឋមន្ត្រី ម៉ែន សំអន ក៏ត្រូវបានផ្សាយបន្តផ្ទាល់ផងដែរតាមកញ្ចក់ទូរទស្សន៍បាយ័ន។
យោងតាមគណៈកម្មការរៀបចំពិធីបុណ្យខេត្តស្វាយរៀង ពិធីបុណ្យអុំទូកដែលរៀបចំឡើងនៅពេលនេះ គឺ ជាឆ្នាំទី៤ហើយ ដែលពិធីបុណ្យអុំទូក ត្រូវបានរៀបចំឡើង នៅខេត្តស្វាយរៀងបើទោះណាជាឆ្នាំខ្លះមានរៀបចំទ្រង់ទ្រាយធំនៅរាជធានីភ្នំពេញក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ