កងទ័ពមួកខៀវកម្ពុជា១៨៤នាក់ទៀតចេញទៅបំពេញបេសកកម្មនៅប្រទេសលីបង់
ទាហានវិស្វកម្មកម្ពុជា មួយកងថ្មីទៀតដែលមានស្នាដៃខាងការងារសំណង់និងដោះមីនបានចេញដំណើរទៅប្រទេសលីបង់ កាលពីថ្ងៃអង្គារ ដើម្បីបន្តរក្សាសន្តិភាព នៅទីនោះក្នុងក្របខ័ណ្ឌអង្គការសហប្រជាជាតិ។ កងវិស្វកម្មក្រុមថ្មី ដែលមានទាហានមួកខៀវ១៨៤នាក់ នឹងត្រូវបន្តបេសកកម្មជំនួសក្រុមចាស់ដែលកំពុងបំពេញបេសកកម្មនៅទីនោះស្រាប់។ ចាប់តាំងពីឆ្នាំ២០០៦មក កម្ពុជាបានបញ្ជូនទាហានរក្សាសន្តិភាពសរុប១៦០០នាក់ហើយឱ្យទៅបំពេញបេសកកម្មក្រៅប្រទេស ក្នុងនាមជាទាហានមួកខៀវ របស់អង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
កម្លាំងវិស្វកម្មមួកខៀវទាំង១៨៤នាក់នោះ គឺជាក្រុមទី៤ ដែលត្រូវជំនួសក្រុមទី៣ បន្ទាប់ពីក្រុមចាស់បានបញ្ចប់បេសកកម្មមួយឆ្នាំរបស់ខ្លួន នៅទ្វីបអាហ្វ្រិក។ យោងតាម ឧត្តមសេនីយ៍ ប៉ុល សារឿន អគ្គមេបញ្ជាការកងយុទ្ធពលខេមរភូមិន្ទ ភារកិច្ចរបស់ទាហានមួកខៀវកម្ពុជាគឺ៖ ផលិតទឹកស្អាត ព្យាបាលជំងឺ បោសសម្អាតគ្រាប់មីន ស្ថាបនាផ្លូវ ស្ពាន ជម្រក និងប៉ុស្តិ៍យាម។
លោក ប៉ុល សារឿន បានណែនាំឱ្យកងទាហានទាំងអស់ ដែលមានជំនាញខ្លាំងខាងវិស្វកម្មស៊ីវិល ឱ្យខិតខំធ្វើការ ប្រកបដោយការទទួលខុសត្រូវខ្ពស់ ប្រកាន់ខ្ជាប់រាល់ច្បាប់ វិន័យកងទ័ពជាតិ ក៏ដូចជាច្បាប់អន្តរជាតិ ព្រមទាំងគោរពអធិបតេយ្យភាព និងឯករាជ្យភាពរបស់ប្រទេសលីបង់ផង។
ទន្ទឹមនឹងនេះដែរ អ្នកសម្របសម្រួលរបស់អង្គការសហប្រជាជាតិប្រចាំនៅកម្ពុជា លោកស្រី គ្លែរ វ៉ាន់ ឌឺ វ៉ារិន (Claire Van der Vaeren) បានគូសបញ្ជាក់ថា៖ «ឥឡូវ ដល់វេនកម្ពុជាបញ្ជូនកងទ័ព និងជំនាញរបស់ខ្លួនទៅធ្វើប្រតិបត្តិការរក្សាសន្តិភាព ជាមួយអង្គការសហប្រជាជាតិវិញហើយ បន្ទាប់ពីវត្តមានកងទ័ពមួកខៀវសហប្រជាជាតិ នៅកម្ពុជាកាលពី២០ឆ្នាំមុន»។ លោកស្រី គ្លែរ វ៉ាន់ ឌឺ វ៉ារិន បានឱ្យដឹងទៀតថា ទាហានវិស្វកម្មកម្ពុជា បី កងមុន ដែលមានគ្នាសរុប ៦៥៤នាក់ បានសម្អាតគ្រាប់មីន និងអំបែងគ្រាប់ ចេញពីផ្ទៃដីលីបង់ ជាង២លានម៉ែត្រការ៉េ ក្រៅពីការងារសំណង់ និងសុខាភិបាល។
តាមគម្រោង នៅចុងខែមករាឆ្នាំ២០១៤ ទាហានវិស្វកម្មកម្ពុជា ពីរកងអនុសេនាធំទៀត នឹងទៅបំពេញបេសកកម្មក្នុងប្រទេសម៉ាលីផងដែរ។ ពួកគេនឹងត្រូវជួយស្តារព្រលានយន្តហោះ និងបំផ្លាញគ្រឿងផ្ទុះ នៅក្នុងប្រទេសនេះ ក្នុងនាមជាទាហានមួកពណ៌ខៀវរបស់អង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ