ក្រុមអង្គការអភិរក្សព្រៃឈើកម្ពុជាស្នើសហភាពអឺរ៉ុបកុំបន្តកិច្ចព្រមព្រៀងទិញឈើពីវៀតណាម
ក្រុមអង្គការអភិរក្សព្រៃឈើចំនួន២០នៅកម្ពុជា បាននាំគ្នាដាក់ញត្តិមួយទៅសហភាពអឺរ៉ុប កាលពីពេលថ្មីៗនេះ ដើម្បីស្នើឲ្យប្រទេសលោកសេរីទាំងនេះ ឈប់ទិញឈើពីប្រទេសវៀតណាម។ សំណើនេះ ធ្វើឡើងមុនពេលសហភាពអឺរ៉ុបត្រូវចុះកិច្ចព្រមព្រៀងជាថ្មីទៀតជាមួយប្រទេសវៀតណាម នៅថ្ងៃទី១៨ខែតុលាស្អែកនេះ ដើម្បីបន្តនាំឈើពីវៀតណាមទៅលក់លើទីផ្សារពិភពលោក។
ចុះផ្សាយនៅថ្ងៃ៖
លោក អ៊ូច ឡេង ជាសកម្មជនបរិស្ថានដែលទទួលបានពានរង្វាន់ខាងការពារព្រៃនៅកម្ពុជា បានប្រាប់វិទ្យុបារាំងអន្តរជាតិ RFI នៅថ្ងៃពុធនេះថា មូលហេតុដែលក្រុមអង្គការអភិរក្សព្រៃឈើចំនួន២០ស្នើឲ្យសហភាពអឺរ៉ុប បញ្ឈប់ការទិញឈើពីប្រទេសវៀតណាម គឺដើម្បីទប់ស្កាត់ការកាប់ឈើនៅកម្ពុជា។ ការកាប់ឈើនៅកម្ពុជា ដែលនៅតែបន្តកើតនេះ ត្រូវបានលោក អ៊ូច ឡេង ពន្យល់ថា គឺដោយសារតែវៀតណាមជាទីផ្សារឈើដ៏ធំរបស់កម្ពុជា។ ឈើកម្ពុជា ដែលវៀតណាមយកទៅបោះត្រា មុននឹងនាំចេញទៅទីផ្សារពិភពលោក។ នេះជាការអះអាងរបស់ លោក អ៊ូច ឡេង។
បើតាម លោក អ៊ូច ឡេង ប្រសិនបើសហភាពអឺរ៉ុបដែលជាប្រទេសផ្តល់ជំនួយផ្នែកការពារព្រៃឈើនិងបរិស្ថាន មិនបន្តកិច្ចព្រមព្រៀងក្នុងការអនុញ្ញាតឲ្យវៀតណាមនាំឈើចេញ នោះការកាប់ឈើនៅកម្ពុជាក៏កាត់បន្ថយដែរ។ លោកកត់សម្គាល់ថា ឈើខ្មែរប្រមាណ ៨០% គឺនាំចេញទៅវៀតណាម រួចបន្តទៅប្រទេសចិន។ គ្រាន់តែក្នុងឆ្នាំ២០១៧ មានឈើរបស់កម្ពុជា៣០ម៉ឺនម៉ែត្រគូប ត្រូវបាននាំចេញទៅវៀតណាម ដែលលោក អ៊ូច ឡេង អះអាងដោយផ្អែកលើរបាយការណ៍របស់វៀតណាម ខណៈរដ្ឋាភិបាលកម្ពុជាមិនឃើញបង្ហាញរបាយការណ៍នេះទេ។
តំណាងសហភាពអឺរ៉ុបប្រចាំកម្ពុជា លោក George Edgar អះអាងថា សហភាពអឺរ៉ុបប្តេជ្ញាប្រយុទ្ធប្រឆាំងនឹងការធ្វើអាជីវកម្មឈើខុសច្បាប់ ហើយជំរុញការអនុវត្តច្បាប់ឲ្យប្រសិទ្ធភាពតាមរយៈការលើកបញ្ហានេះទៅជជែកជាមួយតំណាងរដ្ឋាភិបាលកម្ពុជា និងរដ្ឋាភិបាលវៀតណាម។ នេះបើតាមកាសែតខ្មែរថាមស៍។
ប៉ុន្តែលោក អ៊ូច ឡេង បានបន្ទោសថា ព្រៃឈើនៅកម្ពុជាត្រូវបានកាប់បំផ្លាញរួចហើយ គឺមិនអាចឲ្យវិលត្រឡប់មកដូចដើមវិញបានទេ បើទោះជាមានការសន្យាថាពង្រឹងការអនុវត្តច្បាប់ព្រៃឈើឲ្យមានប្រសិទ្ធភាពក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ