ACU ប្រកាសបើកយុទ្ធនាការកំចាត់មន្ត្រីមានតែឈ្មោះក្នុងបញ្ជី តែមិនមកធ្វើការ
នៅក្នុងកិច្ចពិគ្រោះយោបល់រវាងអង្គភាពប្រឆាំងអំពើពុករលួយ និង វិស័យឯកជនស្តីអំពីកម្មវិធីប្រឆាំងអំពើពុករលួយនៅរសៀលថ្ងៃសុក្រ ទី ១៥ សីហា នេះ លោក ឱម យ៉ិនទៀងប្រធានអង្គភាពប្រឆាំងអំពើពុករលួយ បានប្រកាសបើកយុទ្ធនាការថ្មីមួយទៀតនោះគឺការបោសសម្អាតមន្ត្រីដែលមានតែឈ្មោះក្នុងបញ្ជី តែមិនមកធ្វើការ។ យុទ្ធនាការដែល លោកទេសរដ្ឋមន្ត្រីហៅថា “ ចាប់ខ្មោចពុករលួយ”នេះនឹងចាប់ផ្តើមប្រតិបត្តិការចាប់សប្តាហ៍ក្រោយនេះតទៅ។
ចុះផ្សាយនៅថ្ងៃ៖
ស្តាប់ - ០១:៥៣
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយនៅថ្ងៃសុក្រ ទី ១៥ សីហានេះ បានប្រកាសបើកយុទ្ធនាការកំចាត់អំពើពុករលួយថ្មីមួយទៀតដែលមានឈ្មោះថា “ ចាប់ខ្មោចពុករលួយ” ។
លោក ឱម យ៉ិនទៀង បានមានប្រសាសន៍ថា យុទ្ធនាការថ្មីនេះ នឹងចាប់ផ្តើមចាប់ពីសប្តាហ៍ក្រោយនេះតទៅ ដោយជំហានដំបូង អង្គភាពប្រឆាំងអំពើពុករលួយនឹងចេញសេចក្តីប្រកាសព័ត៌មានស្តីពីយុទ្ធនាការនេះដល់ស្ថាប័នទាំងអស់ទាំងរដ្ឋ និង ស៊ីវិល។ ប៉ុន្តែ អង្គភាពនឹងទុករយៈពេលបីខែដើម្បីស្ថាប័នទាំងអស់លុបចេញនូវ”ឈ្មោះខ្មោច”ដែលយកប្រាក់ខែរដ្ឋនេះ។ លោក រដ្ឋមន្ត្រី បានបន្ថែមថា អង្គភាពប្រឆាំងអំពើពុករលួយនឹងសហការស្អិតល្មួតជាមួយ ក្រសួងសេដ្ឋកិច្ច និង ក្រសួងមុខងារសាធារណៈ ដើម្បីរួមគ្នាកំចាត់អំពើពុករលួយប្រភេទនេះ ដោយគ្មានការលើកលែងនោះទេ។
ជាមួយគ្នានេះ លោក ឱម យ៉ិនទៀង បានព្រមានថា បើផុតរយៈពេលបីខែ អង្គភាពប្រឆាំងអំពើពុករលួយនឹងចុះទៅពិនិត្យមើលក្រសួង ស្ថាប័ន ឫការិយាល័យដែលសង្ស័យថា មានអំពើពុករលួយប្រភេទនេះ ហើយបើមាន” ឈ្មោះខ្មោច”នោះ ប្រធានស្ថាប័ន ឫ ការិយាល័យទាំងនោះត្រូវទទួលខុសចំពោះមុខច្បាប់។ លោក ឱម យ៉ិនទៀង បានសង្កត់ធ្ងន់ថា អ្នកប្រព្រឹត្តអំពើពុករលួយប្រភេទនេះ អាចមានទោសទណ្ឌជាប់ពន្ធនាគាររយៈពេលពីរឆ្នាំ។
សូមបញ្ជាក់ថា យុទ្ធនាការនេះ នឹងក្លាយជាបេសកកម្មទីបួនរបស់អង្គភាពប្រឆាំងអំពើពុករលួយ បន្ទាប់ពីអង្គភាពមួយនេះបានបើកយុទ្ធនាការធំៗចំនួនបីរួចមកហើយដែលរួមមានដូចជា កំចាត់អំពើពុករលួយលើមន្ត្រីសង្គមកិច្ច សេវាសាធារណៈ និង អំពើពុករលួយក្នុងពេលប្រឡងបាក់ឌុបដែលទើបកន្លងទៅថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ