អ្នកវិភាគរិះគន់សេចក្តីសម្រេចរបស់អតីតបក្សប្រឆាំងដែលផ្តល់ប្រាក់ឧបត្ថម្ភកងកម្លាំងផ្តាច់ខ្លួន
អតីតបក្សប្រឆាំងពីសហរដ្ឋអាមេរិក បានប្រជុំគណៈកម្មាធិការអចិន្ត្រៃរបស់ខ្លួន កាលពីថ្ងៃទី១៣ ខែកញ្ញា ដោយសម្រេច៥ចំណុចជុំវិញការត្រៀមវិលត្រឡប់មកប្រទេសកម្ពុជាវិញរបស់លោក សម រង្ស៊ី។ ក្នុងនោះ ការសម្រេចរបស់បក្សប្រឆាំងដែលផ្តល់ប្រាក់ផ្គត់ផ្គង់កងកម្លាំងផ្តាច់ខ្លួន ត្រូវបានអ្នកវិភាគនយោបាយនៅកម្ពុជាចាត់ទុកថាអតីតបក្សប្រឆាំងកំពុងដើរហួសព្រំដែន។
ចុះផ្សាយនៅថ្ងៃ៖
កិច្ចប្រជុំរបស់គណៈកម្មាធិការអចិន្ត្រៃយ៍គណបក្សសង្រ្គោះជាតិ នៅក្រុងឡូវេល រដ្ឋម៉ាសាឈូសែត សហរដ្ឋអាមេរិក បានសម្រេចចំនួន៥ចំណុច ជុំវិញដំណើរវិលត្រឡប់មកប្រទេសកម្ពុជា របស់លោក សម រង្ស៊ី នាថ្ងៃទី០៩ ខែវិច្ឆិកា ខាងមុខ។
ចំណុចសំខាន់ៗនៃសេចក្តីសម្រេចនោះរួមមាន កំណត់ចាត់ចែងឲ្យថ្នាក់ដឹកនាំ និងលោក សម រង្ស៊ី ចូលមកកាន់តំបន់អាស៊ីនៅថ្ងៃទី០៥ ខែវិច្ឆិកា ត្រៀមថវិកាសម្រាប់កងកម្លាំង ដែលផ្តាច់ខ្លួនពីរដ្ឋាភិបាលមកការពារពលរដ្ឋ នៅថ្ងៃទី០៩ ខែវិច្ឆិកា និងអំពាវនាវឲ្យពលករខ្មែរដែលធ្វើការនៅក្រៅប្រទេស វិលត្រឡប់ចូលមកកម្ពុជា ចូលរួមជាមួយអតីតគណបក្សប្រឆាំងជាដើម។ នេះបើតាមសេចក្តីប្រកាសព័ត៌មានរបស់អតីតគណបក្សសង្រ្គោះជាតិពីក្រុងឡូវេល រដ្ឋម៉ាសាឈូសែត ចុះថ្ងៃទី១៥ ខែកញ្ញា។
លោកបណ្ឌិត ឡៅ ម៉ុងហៃ ជាអ្នកវិភាគនយោបាយមួយរូប នៅក្នុងប្រទេសកម្ពុជា បានថ្លែងប្រាប់វិទ្យុបារាំងអន្តរជាតិថា សកម្មភាពរបស់អតីតបក្សប្រឆាំងនាពេលនេះ គឺឈានហួសព្រំដែនបន្តិចហើយ ដោយសារការណែនាំ និងផ្តល់មធ្យោបាយទៅកងទ័ពឲ្យមានការបែកបាក់គ្នា។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា និងជាអ្នកតាមដានបញ្ហានយោបាយកម្ពុជាដែរនោះ បានថ្លែងប្រាប់វិទ្យុបារាំងអន្តរជាតិនៅថ្ងៃនេះដែរថា ផែនការរបស់អតីតគណបក្សសង្រ្គោះជាតិ ដែលរួមមានការត្រៀមថវិកាសម្រាប់កងកម្លាំង ដែលផ្តាច់ខ្លួន គឺផ្ទុយហួសពីក្របខ័ណ្ឌច្បាប់ និងក្របខ័ណ្ឌស្ថានភាពជាក់ស្តែងនៅកម្ពុជា។
លោកបណ្ឌិត គិន ភា បន្ថែមថា ការត្រៀមថវិកាសម្រាប់កងកម្លាំង ដែលផ្តាច់ខ្លួន គឺជាចេតនានៃការបំបែកបាក់ជាតិ ជាចេតនានៃការធ្វើបដិវត្តន៍មួយ និងជាចេតនាបង្កចលាចលសង្គមមួយ ដើម្បីឈានទៅរកការកាន់អំណាចនៃអតីតបក្សនេះ។
ប៉ុន្តែលោកស្រី មួរ សុខហួរ អតីតអនុប្រធានគណបក្សប្រឆាំង បានថ្លែងប្រាប់វិទ្យុបារាំងអន្តរជាតិពីសហរដ្ឋអាមេរិកថា កាលពីឆ្នាំ២០១៣ និងឆ្នាំ២០១៧ គឺច្បាស់ណាស់ថា នៅក្នុងចំណោមកងទ័ព ប៉ូលីស និងមន្ត្រីរាជការ ពួកគាត់បានបោះឆ្នោតឲ្យមានការផ្លាស់ប្តូរហើយ ទើបធ្វើឲ្យគណបក្សប្រឆាំងទទួលជ័យជំនះពាក់កណ្តាលប្រទេស។ លោកស្រី មួរ សុខហួរ បញ្ជាក់ថា ក្នុងចំណោមកងទ័ព ប្រាកជាមានអ្នកចង់ការពារលទ្ធិប្រជាធិបតេយ្យសម្រាប់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ