រដ្ឋសភា ចាប់ផ្តើមប្រកាសជ្រើសរើសបេក្ខជន សមាជិកគជបថ្មី
គណៈកម្មាធិការអចិន្ត្រៃរដ្ឋសភា បានសម្រេចក្នុងកិច្ចប្រជុំ នៅព្រឹកថ្ងៃទី២៧មីនានេះ អនុម័តយល់ព្រមលើបែបបទ និងនីតិវិធី នៃការជ្រើសរើសបេក្ខជន នៃគណៈកម្មាធិការជាតិរៀបចំការបោះឆ្នោត គជប ថ្មី។ ក្នុងនោះ គណៈកម្មាធិការអចិន្ត្រៃយ៍រដ្ឋសភា ក៏បានយល់ព្រមចាត់តាំងអគ្គលេខាធិការដ្ឋានរដ្ឋសភា ធ្វើសេចក្តីប្រកាសជ្រើសរើសបេក្ខជន សមាជិកគជបថ្មី។ ការទទួលពាក្យស្នើសុំពីបេក្ខជនមានរយៈពេល ១០ ថ្ងៃ គិតត្រឹមថ្ងៃចុងក្រោយ ថ្ងៃទី៦មេសា។ ចំណែកការបោះឆ្នោត អនុម័តជ្រើសតាំងសមាសភាពគជបថ្មី ទាំង ៩ រូប នឹងធ្វើឡើង នៅថ្ងៃទី១៣មេសា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
ចាប់ពីថ្ងៃទី២៧មីនានេះ រដ្ឋសភា ចាប់ផ្តើមទទួលពាក្យស្នើសុំរបស់បេក្ខជន ដែលមានបំណងក្លាយជាសមាជិកគជបថ្មី ទាំង ៩ រូប ស្របតាមច្បាប់បានកំណត់។ ម៉ោង ៥ ល្ងាច ថ្ងៃទី៦មេសា ជាថ្ងៃចុងក្រោយ នៃការទទួលពាក្យរបស់បេក្ខជន។ គណៈកម្មាធិការអចិន្ត្រៃយ៍រដ្ឋសភា នឹងជួបប្រជុំជាថ្មី នៅថ្ងៃទី៧មេសា ដើម្បីពិនិត្យលើបញ្ជីឈ្មោះបេក្ខជន ដែលចង់ក្លាយជាសមាជិក គជបថ្មី ទាំង ៩ រូប ហើយបញ្ជូនទៅគណបក្សប្រជាជនកម្ពុជា និងគណបក្សសង្គ្រោះជាតិ ដើម្បីជ្រើសរើស មុននឹងរៀបចំបញ្ជីឈ្មោះ ប្រធាន អនុប្រធាន និងសមាជិក គជប ទាំង ៩ រូប ដាក់ជូនរដ្ឋសភា ប្រជុំ អនុម័តដោយសំឡេងភាគច្រើនដាច់ខាត ឬ ៥០ % បូក ១ នៃចំនួនសមាជិករដ្ឋសភា សរុប ១២៣ រូប។
ការសម្រេចដូច្នេះ ត្រូវបានធ្វើឡើងក្នុងកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ១៣ រូប ដឹកនាំដោយលោកហេងសំរិន កាលពីព្រឹកថ្ងៃសុក្រ ទី២៧មីនានេះ។ អង្គប្រជុំ បានអនុម័តយល់ព្រមលើបែបបទ និងនីតិវិធី នៃការជ្រើសរើសបេក្ខជន នៃគជបថ្មី។ បែបបទ និងនីតិវិធី ត្រូវបានកំណត់ក្នុងច្បាប់គជប ដែលទើបប្រកាសឲ្យប្រើ កាលពីថ្ងៃទី២៦មីនា។
នោះគឺសមាសភាពគជប ត្រូវជ្រើសរើសក្នុងចំណោមឥស្សរជនខ្មែរទាំងពីរភេទ ដែលមានសញ្ជាតិខ្មែរពីកំណើត និងមានសញ្ជាតិខ្មែរតែមួយគត់ មានអាយុយ៉ាងតិច ៣៥ ឆ្នាំ មានសញ្ញាបត្រចាប់ពីថ្នាក់ឧត្តមសិក្សាឡើងទៅ មានបទពិសោធការងារយ៉ាងតិច ១០ ឆ្នាំ និងមិនត្រូវជាសាច់ញាតិរបស់ប្រធាន អនុប្រធានគណបក្សនយោបាយ ដែលចូលរួមប្រកួតប្រជែង ក្នុងការបោះឆ្នោត។
ច្បាប់គជប ក៏បានកំណត់ថា សមាសភាពគជបថ្មី មាន ៩ រូប ដោយ ៤ រូប ជ្រើសរើសដោយគណបក្សប្រជាជនកម្ពុជា ៤ រូប ជ្រើសរើសដោយគណបក្សសង្គ្រោះជាតិ និង ១ រូបទៀត ជ្រើសរើសដោយមានការព្រមព្រៀងគ្នារវាងគណបក្សទាំងពីរ។
រហូតមកដល់ពេលនេះ សមាសភាពគជបថ្មី មិនត្រូវបានបញ្ជាក់នៅឡើយទេ។ លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានឲ្យដឹងថា គណបក្សទាំងពីរ មិនទាន់សម្រេចនៅឡើយទេ ដោយរង់ចាំពិនិត្យលើបញ្ជីបេក្ខជន ដែលដាក់ពាក្យទៅរដ្ឋសភា។
យ៉ាងណាក៏ដោយ បេក្ខភាពលោក គួយ ប៊ុនរឿន មកពីគណបក្សសង្គ្រោះជាតិ តែម្នាក់គត់ ត្រូវបានគេផ្សព្វផ្សាយ។ ចំណែកលោកស្រី ពុង ឈីវហ្កេក ជាសមាសភាពគជបទី៩ ដែលគណបក្សទាំងពីរ បានព្រមព្រៀង។ ក៏ប៉ុន្តែចុងក្រោយនេះ លោកស្រី ពុង ឈីវហ្កេក មិនទាន់បញ្ជាក់ជាថ្មីនៅឡើយទេ ពាក់ព័ន្ធនឹងច្បាប់កំណត់ឲ្យសមាសភាពគជប ត្រូវមានសញ្ជាតិខ្មែរតែមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ