គណបក្សទាំងពីរនៅខ្វែងគំនិតគ្នាបញ្ហាស្វ័យភាពការងាររបស់សមាជិកគ.ជ.ប
ក្រុមការងារវិសោធនកម្មរដ្ឋធម្មនុញ្ញរបស់គណបក្សប្រជាជនកម្ពុជា និងគណបក្សសង្គ្រោះជាតិកាលពីរសៀលថ្ងៃ សុក្រ ម្សិលមិញ បានជួបប្រជុំពិភាក្សាគ្នានៅវិមានរដ្ឋសភា។ ក្រុមការងារនៃគណបក្សទាំងពីរបានឯកភាពគ្នារៀបចំវិសោធនកម្មមាត្រា ៧៦ និង ការបង្កើតជំពូកថ្មីទាក់ទងនឹងអង្គការរៀបចំការបោះឆ្នោតនៅក្នុងរដ្ឋធម្មនុញ្ញ។ ប៉ុន្តែបក្សជាប់ឆ្នោតទាំងពីរបានខ្វែងគំនិតគ្នាលើការផ្តល់ស្វ័យភាពការងារដល់សមាជិកគណៈកម្មាធិការជាតិរៀបចំការបោះឆ្នោតនៅក្នុងជំពូកថ្មីនេះ។
ចុះផ្សាយនៅថ្ងៃ៖
ស្តាប់ - ០២:២២
កិច្ចពិភាក្សាវិសោធនកម្មរដ្ឋធម្មនុញ្ញ និង ច្បាប់រៀបចំការបោះឆ្នោតដែលអាចឲ្យតំណាងរាស្ត្រជាប់ឆ្នោតគណបក្សសង្គ្រោះជាតិចូលសភា ដើម្បីបញ្ចប់វិបត្តិនយោបាយទាំងស្រុងនោះ នៅតែមិនទាន់សម្រេចបាននៅឡើយ។ មិនទាន់បានសម្រេច ដោយសារគណបក្សទាំងពីរ មិនឯកភាពគ្នានូវចំណុចខ្លះនៅត្រង់មាត្រា ១៥០ និង ១៥១ ថ្មីនៅក្នុងជំពូកទី១៥ ថ្មីដែលគណបក្សទាំងពីរបានឯកភាពគ្នាបង្កើតឡើង។
នៅក្នុងមាត្រា ១៥០ ថ្មី គណបក្សសង្គ្រោះជាតិបានស្នើឲ្យបញ្ចូលឲ្យគណៈកម្មាធិការជាតិរៀបចំការបោះឆ្នោតមានស្វ័យភាពក្នុងការរៀបចំ និងចាត់ចែងការងាររបស់ខ្លួន បន្ថែមពីលើការមានថវិកាស្វយ័តសម្រាប់ដំណើរការដែលគណបក្សទាំងពីរបានឯកភាពគ្នា។ ប៉ុន្តែគណបក្សប្រជាជនកម្ពុជា បានបដិសេធដោយលើកហេតុផលថា ចំណុចនេះបានកំណត់ក្នុងមាត្រាថ្មីនេះរួចហើយ និងត្រូវកំណត់បន្ថែមនៅក្នុងច្បាប់ស្តីពីការរៀបចំ និង ការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត។ ចំណែកមាត្រា១៥១ថ្មី ក៏មានការមិនឯកភាពបន្តិចបន្តួចផងដែរ។
យ៉ាងណាក៏ដោយ ក្រោយជួបពិភាក្សាគ្នាអស់រយៈពេលជាង ៤ ម៉ោង ក្រុមការងារគណបក្សទាំងពីរបានអះអាងថា ការពិភាក្សាគ្នានេះទទួលបានជោគជ័យ ៩៥ ភាគរយហើយបើទោះបីនៅមានចំណុចខ្វែងគំនិតគ្នាខ្លះក៏ដោយ។ តំណាងក្រុមការងារគណបក្សទាំងពីរលើកឡើងដូចគ្នាថា ចំណុចខ្វែងគំនិតគ្នានេះទុកឲ្យថ្នាក់ដឹកនាំនៃគណបក្សទាំងពីរសម្រេច ហើយថា អាចនឹងបញ្ចប់ក្នុងពេលឆាប់ៗខាងមុខនេះ។
ចំពោះបញ្ហាអភ័យឯកសិទ្ធសមាជិកគណៈកម្មាធិការជាតិរៀបចំការបោះឆ្នោត ត្រូវបានលោក សុខ ឥសាន សមាជិកក្រុមការងាររបស់គណបក្សប្រជាជនកម្ពុជា បញ្ជាក់ថា គណបក្សទាំងពីរបានពិភាក្សាគ្នាយ៉ាងល្អិតល្អន់ ប៉ុន្តែមិនប្រើពាក្យផ្តល់អភ័យឯកសិទ្ធទេ គឺការពារដោយច្បាប់ ដែលមានន័យប្រហាក់ប្រហែលនឹងអភ័យឯកសិទ្ធដែរ។ ជាមួយគ្នានេះ មន្ត្រីជាន់ខ្ពស់ និង ជាសមាជិកក្រុមការងាររបស់គណបក្សសង្គ្រោះជាតិ លោក គីមសួរ ភិរិទ្ធ បានបញ្ជាក់បន្ថែមថា សមាជិកគណៈកម្មាធិការជាតិរៀបចំការបោះឆ្នោតទទួលបានការការពារតាមផ្លូវច្បាប់ ដែលអាចឲ្យសមាជិកទាំងនោះទទួលបានឯករាជ្យភាពមិនភ័យខ្លាចក្នុងការបំពេញការងារដូចសមាជិកក្រុមប្រឹក្សាធម្មនុញ្ញ និង ចៅក្រម។
សូមជំរាបជូនថា ក្រុមការងារវិសោធនកម្មរដ្ឋធម្មនុញ្ញរបស់គណបក្សទាំងពីរដែលបានជួបពិភាក្សាគ្នានេះ មានចំនួន ៥ រូបម្ខាង។ ក្នុងនោះខាងគណបក្សប្រជាជនកម្ពុជា មាន លោក ប៉ែន បញ្ញា លោក ហែម ខន លោក សុខ ឥសាន លោកស្រី គ្រួច សំអាន និង លោក កើត រិទ្ធ ។ ចំណែកខាងគណបក្សសង្គ្រោះជាតិវិញ មាន លោក អេង ឆៃអ៊ាង លោក អ៊ូ ច័ន្ទឫទ្ធិ លោក ប៉ុល ហំម លោក គីមសួរ ភិរិទ្ធ និង កែត ឃី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ