សង្គមស៊ីវិលកម្ពុជាទាមទារឲ្យប្រទេសអភិវឌ្ឍន៍ដោះស្រាយការប្រែប្រួលអាកាសធាតុ
នៅក្នុងសេចក្តីថ្លែងការណ៍រួមគ្នាមួយដែលចេញផ្សាយនៅចុងសប្តាហ៍នេះ បណ្តាញសង្គមស៊ីវិលកម្ពុជាបានសុំឲ្យបណ្តាប្រទេសអភិវឌ្ឍន៍ត្រូវយកចិត្តទុកដាក់ដោះស្រាយការប្រែប្រួលអាកាសធាតុដែលបណ្តាលមកពីការបំភាយឧស្ម័នផ្ទះកញ្ចក់ដែលកំពុងបង្កផលប៉ះពាល់ធំធេងដល់ប្រជាជនក្នុងប្រទេសក្រីក្រក្នុងនោះក៏មានកម្ពុជាដែរ។ សេចក្តីថ្លែងការណ៍នេះធ្វើឡើងសម្រាប់សន្និសីទលើកទី១៨ នៃបណ្តាភាគីអនុសញ្ញាសហប្រជាជាតិស្តីពីការប្រែប្រួលអាកាសធាតុដែលនឹងប្រព្រឹត្តទៅចាប់ពីថ្ងៃទី២៦វិច្ឆិកាដល់ថ្ងៃទី៧ធ្នូ នៅទីក្រុងដូហា ប្រទេសកាតា។
ចុះផ្សាយនៅថ្ងៃ៖
ស្តាប់ - ០២:៣៦
នៅក្នុងសេចក្តីថ្លែងការណ៍រួមមួយដែលចេញផ្សាយនៅថ្ងៃអាទិត្យនេះ វេទិកានៃអង្គការមិនមែនរដ្ឋាភិបាលកម្ពុជា ( The NGO Forum on Cambodia ) និងបណ្តាញនៃការប្រែប្រួលអាកាសធាតុកម្ពុជា (CCCN) បានទទូចឲ្យប្រទេសអភិវឌ្ឍន៍ដោះស្រាយផលប៉ះពាល់ដែលបណ្តាលមកពីការប្រែប្រួលអាកាសធាតុ។
សេចក្តីថ្លែងការណ៍រួមបញ្ជាក់ថា ដោយសារប្រជាជនកម្ពុជាពឹងផ្អែកទៅលើធនធានធម្មជាតិ ជីវភាពរបស់ពួកគេងាយទទួលរងផលប៉ះពាល់ដោយសារតែផលវិបាកបណ្តាលមកពីការប្រែប្រួលអាកាសធាតុ ដូចជាគ្រោះទឹកជំនន់ ឬគ្រោះរាំងស្ងួតជាដើម ដែលមិនអាចទស្សទាយបាន។ ប្រឈមនឹងបញ្ហានេះ សមត្ថភាពបន្ស៊ាំរបស់ប្រជាជនកម្ពុជាក៏នៅទាបនៅឡើយពីព្រោះតែភាពក្រីក្រ។ ៥៣ភាគរយនៃពលរដ្ឋកម្ពុជារកប្រាក់ចំណូលបានតិចជាង២ដុល្លារក្នុងមួយថ្ងៃ ចំណែកឯប្រជាជន១ភាគ៣ផ្សេងទៀតរស់នៅក្រោមបន្ទាត់នៃភាពក្រីក្រនៅឡើយ ដោយរកចំណូលបានតិចជាងមួយដុល្លាក្នុងមួយថ្ងៃ។ ក្នុងស្ថានភាពបែបនេះ កម្ពុជានឹងទទួលរងគ្រោះយ៉ាងធ្ងន់ធ្ងរពីការបញ្ចេញឧស្ម័នផ្ទះកញ្ចក់យ៉ាងច្រើនពីបណ្តាប្រទេសអភិវឌ្ឍន៍។
បណ្តាញអង្គការសង្គមស៊ីវិលកម្ពុជាទាំងពីរបន្តថា ក្នុងឆ្នាំ ២០១១កន្លងទៅ ប្រជាជនកម្ពុជាជាង ១,៦ លាននាក់ទទួលរងផលប៉ះពាល់ដោយទឹកជំនន់ ក្នុងនោះមានមនុស្ស ២៥០ នាក់ស្លាប់ និងដំណាំកសិកម្មជាច្រើនត្រូវបានបំផ្លាញ។ ដូច្នេះ សម្រាប់កម្ពុជា បញ្ហាប្រែប្រួលអាកាសធាតុ មិនមែនជាបញ្ហាដែលត្រូវដោះស្រាយទៅថ្ងៃអនាគតទេ ប៉ុន្តែ ជាបញ្ហាដែលត្រូវដោះស្រាយនាពេលបច្ចុប្បន្នតែម្តង។ ប្រជាជនក្រីក្រកម្ពុជាត្រូវការជំនួយជាបន្ទាន់ពីសហគមន៍អន្តរជាតិ ដើម្បីដោះស្រាយបញ្ហាទាំងនោះ ប្រសិនបើមិនដូច្នោះទេ ជីវភាពរបស់ពួកគេនឹងកាន់តែវេទនាថែមទៀត។
ស្ថិតក្នុងស្ថានភាពបែបនេះ បណ្តាញសង្គមស៊ីវិលកម្ពុជាបានលើកសំណូមពរមួយចំនួនជូនដល់អង្គសន្និសីទទីក្រុងដូហាពិចារណា និងអនុម័ត។ សំណូមពរទាំងនោះមានដូចជា កំណើនកម្តៅសាកលត្រូវកម្រិតមិនឲ្យលើសពី ១,៥ អង្សាសេទេក្នុងឆ្នាំ ២០២០ ពីព្រោះកំណើនលើសពីនេះនឹងប៉ះពាល់ដល់ជីវិតមនុស្សរាប់លាននាក់ ក្នុងនោះក៏មានប្រជាជនកម្ពុជាដែរ។
បណ្តាញសង្គមស៊ីវិលកម្ពុជាក៏បានទាមទារឲ្យប្រទេសអភិវឌ្ឍន៍កាត់បន្ថយការបំភាយឧស្ម័នផ្ទះកញ្ចក់ឲ្យបាន ៤០ភាគរយនៅឆ្នាំ ២០២០ ធៀបនឹង ឆ្នាំ ១៩៩០ ។ ពួកគេក៏បានទាមទារឲ្យប្រទេសឧស្សាហកម្មជឿនលឿនផ្តល់ថវិកាគាំទ្រឲ្យបានទៀងទាត់ដល់កម្មវិធីសកម្មភាពនានា ដើម្បីបន្ស៊ាំទៅនឹងការប្រែប្រួលអាកាសធាតុ ដែលជាសំណងការខូចខាតដល់ប្រជាជនក្រីក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ