រដ្ឋាភិបាលកម្ពុជាសុំឲ្យឡាវ ផ្អាកការសាងសង់ទំនប់វារីអគ្គិសនីដនសាហុងសិន
រដ្ឋាភិបាលកម្ពុជា បានសុំឲ្យរដ្ឋាភិបាលឡាវ ផ្អាកគម្រោងសាងសង់ទំនប់វារីអគ្គិសនី ដន សាហុង ជាបណ្តោះអាសន្នសិន ដើម្បីរង់ចាំការសិក្សាឲ្យបានច្បាស់លាស់។ បញ្ហាផលប៉ះពាល់នានាដែលអាចបង្កឡើងដោយទំនប់នេះ នឹងត្រូវលើកយក ទៅពិភាក្សា ក្នុងកិច្ចប្រជុំកំពូលលើកទី២ នៃគណៈកម្មការទន្លេមេគង្គនៅក្នុងប្រទេសវៀតណាម នៅថ្ងៃទី ៤ដល់ថ្ងៃទី ៥ មេសាខាងមុខ។ ការបញ្ជាក់ជំហរបែបនេះបានធ្វើឡើងដោយលោក លឹម គានហោ រដ្ឋមន្ត្រីក្រសួងធនធានទឹក ខណៈដែលគណៈប្រតិភូកម្ពុជាត្រៀមខ្លួនទៅចូលរួមកិច្ចប្រជុំនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
លោក លឹម គានហោ រដ្ឋមន្ត្រីក្រសួងធនធានទឹក និងជាប្រធានគណៈកម្មាធិការជាតិទន្លេមេគង្គ បានប្រាប់វិទ្យុបារាំងអន្តរជាតិ នៅព្រឹកថ្ងៃសុក្រនេះថាកម្ពុជា បានសុំរួចហើយ ឲ្យប្រទេសឡាវ ផ្អាកការសាងសង់ទំនប់វារីអគ្គិសនីដន សាហុង ដែលស្ថិតនៅលើតួទន្លេមេនៃទន្លេមេគង្គ ជាបណ្តោះអាសន្នសិន ដើម្បីរង់ចាំការសិក្សាឲ្យបានល្អិតល្អន់សិន។
លោក លឹម គានហោ បានបញ្ជាក់ថា កន្លងមកមិនមែនតែកម្ពុជាទេ តែមានទាំងថៃ និងវៀតណាមដែរ ដែលធ្លាប់បានសរសេរលិខិតមួយ ស្នើជូនដល់រដ្ឋាភិបាលឡាវ ឲ្យផ្អាកការសាងសង់ទំនប់ ដន សាហុងរួចមកហើយ។ កម្ពុជាក៏នឹងលើកយកពីផលប៉ះពាល់នានារបស់គម្រោងសាងសងទំនប់ដនសាហុង ដែលសង្គមស៊ីវិល និងរដ្ឋាភិបាលបានរកឃើញរួមគ្នា ដាក់ជូនក្នុងកិច្ចប្រជុំកំពូលនៅប្រទេសវៀតណាមនាសប្តាហ៍ក្រោយនេះផងដែរ។
ការបញ្ជាក់ជំហរបែបនេះ បានធ្វើឡើងខណៈដែលគណៈប្រតិភូកម្ពុជាកំពុងត្រៀមខ្លួនទៅចូលរួមកិច្ចប្រជុំកំពូលលើកទី២ នៃគណៈកម្មការទន្លេមេគង្គ ក្នុងប្រទេសវៀតណាម ចាប់ពីថ្ងៃទី ៤ ដល់ទី ៥ មេសានេះ។ យោងតាមសេចក្តីប្រកាសព័ត៌មានរបស់ក្រសួងការបរទេស គណៈប្រតិភូកម្ពុជាដឹកនាំដោយលោកនាយករដ្ឋមន្ត្រី ហ៊ុន សែន នឹងទៅចូលរួមកិច្ចប្រជុំនេះ។ លោក លឹម គាន ហោ រដ្ឋមន្ត្រីក្រសួងធនធានទឹក និងលោក សាយ សំអាល់ រដ្ឋមន្ត្រីក្រសួងបរិស្ថានក៏ត្រូវចូលរួមកិច្ចប្រជុំនេះដែរ។
ស្របពេលជាមួយគ្នានេះ អង្គការសង្គមស៊ីវិលក៏កំពុងធ្វើសកម្មភាពយ៉ាងខ្លាំងដើម្បីប្រឆាំងនឹងការសាងសង់ទំនប់នេះ។ កាលពីពេលថ្មីៗនេះ សង្គមស៊ីវិល និងដៃគូពាក់ព័ន្ធរួមជាមួយតំណាងរដ្ឋាភិបាលផងបានបើកសិក្ខាសាលាថ្នាក់ជាតិមួយ ដើម្បីបង្ហាញពីក្តីកង្វល់របស់សហគមន៍ប្រជាជននៅតាមដងទន្លេមេគង្គ។ នៅពេលនេះដែរ សង្គមស៊ីវិលទាំងនោះកំពុងធ្វើសកម្មភាពនៅក្នុងខេត្តស្ទឹងត្រែង និងក្រចេះ ដើម្បីទាមទារឲ្យឡាវផ្អាកការសាងសង់ទំនប់នេះ។
ទំនប់វារីអគ្គិសនី ដនសាហុង ដែលមានថាមពល ២៦០ មេហ្កាវ៉ាត់ គឺជាទំនប់មួយក្នុងចំណោមទំនប់វារីអគ្គិសនីទាំង ១២ ដែលគ្រោងសាងសង់ទៅលើតួទន្លេមេ នៃទន្លេមេគង្គក្រោម ក្នុងតំបន់ស៊ីផាន់ដន របស់ប្រទេសឡាវ។ បច្ចុប្បន្នទំនប់នេះ កំពុងត្រូវបានចាប់ផ្តើមសិក្សា និងដាក់សំណើសម្រាប់ការសាងសង់បន្ទាប់ពីទំនប់វារីអគ្គិសនីសាយ៉ា បូរី។ ទំនប់នេះមានទីតាំងស្ថិតនៅចំងាយប្រមាណ ២គីឡូម៉ែតពីព្រំដែនកម្ពុជា ឡាវ ក្នុងខេត្តចំប៉ាសាក់ ប្រទេសឡាវ។
គេនៅរង់ចាំមើលថា គណៈកម្មការទន្លេមេគង្គ ដែលមានប្រទេសកម្ពុជា ថៃ វៀតណាម និងឡាវនោះ សម្រេចឲ្យប្រទេសឡាវសាងសង់ទំនប់វារីអគ្គិសនីដនសាហុងនេះដែររឺទេ បន្ទាប់ពីកិច្ចប្រជុំលើកទី២ នៃគណៈកម្មការនៃទន្លេមេគង្គ ក្នុងប្រទេសវៀតណាម ក្នុងថ្ងៃទី ៤ ដល់ ទី ៥មេសា ត្រូវបានបញ្ចប់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ