កីឡាជាតិលើកទី២៖ កីឡាករប្រមាណជា២០% បានបោះបង់ចោលការប្រកួត
ការប្រកួតកីឡាជាតិលើកទី២ឆ្នាំ២០១៨នេះ នឹងបិទបញ្ចប់ នៅល្ងាច ថ្ងៃទី ៤ មិថុនា ស្អែកនេះ ដោយមានការចូលរួមជាអធិបតីភាពរបស់លោកនាយករដ្ឋមន្ត្រី ហ៊ុន សែន និងភរិយា។ ការប្រកួតកីឡាជាតិលើកទី២ ដែលបានប្រព្រឹត្តិទៅអស់រយៈពេលជិត១០ថ្ងៃមកនេះ មានទាំងចំណុចវិជ្ជមានផង និងអវិជ្ជមានផង។ អវិជ្ជមាន នោះគឺកីឡាករប្រមាណជា២០% បានបោះបង់ចោលការប្រកួត ដោយសារតែគម្លាតនៃសមត្ថភាពរបស់អ្នកកីឡាមកពីតាមបណ្តាខេត្ត ដែលមិនអាចប្រៀបផ្ទឹមបានជាមួយអ្នកកីឡានៅរាជធានី និងក្រសួងស្ថាប័នរដ្ឋបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
ពិធីបិទការប្រកួតកីឡាជាតិ នឹងធ្វើឡើងនៅឯពហុកីឡាដ្ឋានជាតិអូឡាំពិក ចាប់ពីវេលាម៉ោង៤រសៀលតទៅ។ ពិធីបិទការប្រកួតនេះ នឹងធ្វើឡើងក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន និងភរិយា និងមហាជនរាប់ម៉ឺននាក់។ បើតាមលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ពិធីបិទនេះនឹងរៀបចំឡើងយ៉ាងអស្ចារ្យ មិនចាញ់ពិធីបើកការប្រកួតកាលពីថ្ងៃទី ២៥ ឧសភា នោះទេ ដ្បិតនឹងមានការបង្ហាញនូវផ្ទាំងទស្សនីយភាពប្លែកៗ ការសម្តែងកាំជ្រួច និងជាពិសេសគឺការសម្តែងរួមគ្នានូវទស្សនីយភាពវប្បធម៌ កីឡា សន្តិភាព និងការអភិវឌ្ឍ ដែលបង្ហាញពីតម្លៃ និងការរីកចំរើននៃវិស័យកីឡានៅកម្ពុជា។
គួរជំរាបជូនថា ការប្រកួតកីឡាជាតិលើកទី២ឆ្នាំ២០១៨នេះ បានប្រព្រឹត្តិទៅអស់រយៈពេលជិត១០ថ្ងៃមកហើយ។ រយៈពេលជិត១០ថ្ងៃ គណៈកម្មាធិការរៀបចំការប្រកួតបានកត់សំគាល់ថា ការប្រកួតកីឡាជាតិលើកនេះ មានទាំងចំណុចវិជ្ជមានផង និអវិជ្ជមានផង។ នោះគឺកីឡាករប្រមាណជា២០% បានបោះបង់ចោលការប្រកួត ដោយសារតែគម្លាតនៃសមត្ថភាពរបស់កីឡាមកពីតាមបណ្តាខេត្ត ដែលមិនអាចប្រៀបផ្ទឹមបានជាមួយកីឡានៅរាជធានី និងក្រសួងស្ថាប័នរដ្ឋបាន។ យ៉ាងណាក៏ដោយ ចំណុចអវិជ្ជមាននេះ នឹងត្រូវកែប្រែនៅឆ្នាំបន្តបន្ទាប់ ដើម្បីធ្វើយ៉ាងណាឲ្យសមត្ថភាពរបស់កីឡាករកម្ពុជាកើនឡើងព្រមៗគ្នា។ នេះបើតាមការកត់សំគាល់ របស់លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា។
យោងតាមលទ្ធផលបណ្តោះអាសន្ន គិតត្រឹមរសៀលថ្ងៃទី ៣ ខែមិថុនានេះ ក្លិបក្រសួងមហាផ្ទៃ នៅតែឈកំពូលតារាងមេដាយ ក្នុងចំណោមក្លិបកីឡាមកពីក្រសួង និងរាជធានីខេត្ត ចំនួន២៨នៅទូទាំងប្រទេស ដោយប្រមូលបានមេដាយសរុប១១៤គ្រឿង ក្នុងនោះមាស៦៣គ្រឿង ប្រាក់៣២គ្រឿង និងសំរិតចំនួន១៩គ្រឿង តាមពីក្រោយដោយក្លិបរាជធានីភ្នំពេញ ១០១គ្រឿង និងក្លិបក្រសួងការពារជាតិ៥៤គ្រឿង។ ចំណែកឯខេត្តប៉ៃលិនវិញ នៅមិនទាន់រកបានមេដាយមួយគ្រឿងណាឡើយ។
ការប្រកួតកីឡាជាតិរយៈពេល២ឆ្នាំម្តងនេះ គឺជាអ្វីដែលរដ្ឋាភិបាលកម្ពុជាធ្វើឡើង ដើម្បីត្រៀមខ្លួនឆ្ពោះទៅធ្វើជាម្ចាស់ផ្ទះរៀបចំការប្រកួតកីឡាស៊ីហ្គេមលើកទី៣២ នៅឆ្នាំ២០២៣ខាងមុខ។ រាប់ចាប់តាំងពីពេលនេះតទៅ កម្ពុជានៅមានពេលពីរដងទៀត ដើម្បីត្រៀមខ្លួន គឺនៅឆ្នាំ២០២០ម្តង និងឆ្នាំ២០២២ម្តងទៀត។ សូមបញ្ជាក់ដែរថា ការប្រកួតកីឡាជាតិលើកទី២ឆ្នាំ២០១៨នេះ កម្ពុជាបានប្រើប្រាស់កីឡាដ្ឋានធំៗចំនួនពីរ គឺពហុកីឡដ្ឋានជាតិអូឡាំពិក និងកីឡដ្ឋានជាតិមរតកតេជោ ដែលជាជំនួយរបស់រដ្ឋាភិបាលចិន។ ក្រៅពីនេះ ការប្រកួតក៏មានរៀបចំនៅតាមបណ្តាខេត្តមួយចំនួនដែរ។ ការប្រកួតកីឡាជាតិលើកទី២ឆ្នាំ២០១៨នេះ មានអត្តពលិកជាង៤ពាន់នាក់ចូលរួម លើ២៧ប្រភេទកីឡា ដោយចំណាយថវិកាអស់ជាង១លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ