ថ្ងៃបោះឆ្នោត៖ នៅភ្នំពេញ មានភាពស្ងប់ស្ងាត់ តែពលរដ្ឋប្រមូលផ្តុំគ្នានៅមណ្ឌលបោះឆ្នោត
ថ្ងៃទី២៩ កក្កដា ឆ្នាំ២០១៨ នេះ គឺជាថ្ងៃបោះឆ្នោតជ្រើសតាំងតំណាងរាស្រ្ត នីតិកាលទី៦ ដែលមានគណបក្សនយោបាយចំនួន២០ ចូលរួមប្រកួតប្រជែង។ តាំងពីព្រឹកព្រលឹមថ្ងៃម្សិលមិញ ពលរដ្ឋជាច្រើន បាននាំគ្នាសម្រុកចេញពីរាជធានីភ្នំពេញ ទៅបោះឆ្នោតនៅតាមស្រុកកំណើតរបស់ខ្លួន។ ខណៈបរិយាកាសទូទៅនៅរាជធានីភ្នំពេញ នៅថ្ងៃបោះឆ្នោតនេះ មានសភាពស្ងប់ស្ងាត់ តែពលរដ្ឋបាននាំគ្នាចេញទៅបោះឆ្នោតជាបន្តបន្ទាប់ ក្រោមការយាមកាមយ៉ាងតឹងរឹងនៅតាមមណ្ឌលបោះឆ្នោត។
ចុះផ្សាយនៅថ្ងៃ៖
ចាប់តាំងពីព្រឹកព្រលឹមស្រាងៗ ថ្ងៃអាទិត្យ ទី២៩ ខែកក្កដានេះ ក្រុមការងារនៃគណៈកម្មាធិការជាតិរៀបចំការបោះឆ្នោត នៅតាមការិយាល័យបោះឆ្នោតនៅរាជធានីភ្នំពេញ បានត្រៀមខ្លួនរួចជាស្រេច ដើម្បីទទួលពលរដ្ឋដែលគ្រប់អាយុ ហើយមានសិទ្ធិបោះឆ្នោត ទៅចូលរួមបោះឆ្នោត។
មិនខុសពីពេលមានពិធីបុណ្យជាតិធំៗដែរ រាជធានីភ្នំពេញ ដែលជាធម្មតា ជាទីតាំងនៃបណ្តុំសកម្មភាពពាណិជ្ជកម្មដ៏មមាញឹក ប្រែជាស្ងប់ស្ងាត់ តាំងពីមួយថ្ងៃនៅមុនការបោះឆ្នោតជាតិ។ ស្ងប់ស្ងាត់ដោយសារតែ បុគ្គលិក មន្រ្តីរាជការ កម្មករ កម្មការិនី បានសម្រុកចេញពីរាជធានីភ្នំពេញ ទៅស្រុកកំណើតរៀងៗខ្លួន ចាប់តាំងពីថ្ងៃម្សិលមិញ ដើម្បីចូលរួមការបោះឆ្នោតជ្រើសតាំងតំណាងរាស្រ្ត ឆ្នាំ២០១៨នេះ។
នៅតាមមហាវិថីសំខាន់ៗ និងផ្លូវលំនានា ដែលជារឿយៗតែងមាន សភាពចង្អៀតណែនតាន់តាប់ ក៏ប្រែជាស្ងាត់យានយន្តជាងសព្វមួយដង និងមិនមានការកកស្ទះឡើយ។ ព្រមជាមួយគ្នានេះ ហាងទំនិញដែលធ្លាប់តែមានអតិថិជន ចេញចូលឥតដាច់ ក៏បានផ្អាកអាជីវកម្ម ដើម្បីឱ្យបុគ្គលិករបស់ខ្លួន បានសម្រាកពីការងារ ហើយទៅចូលរួមបោះឆ្នោត។ ក៏ប៉ុន្តែទីផ្សារធំៗ នៅបន្តដំណើរការដដែល។
សូមជម្រាបជូនថា នៅមុនការបោះឆ្នោត ក្រសួងការងារ បានចេញសេចក្តីជូនដំណឹង ឱ្យម្ចាស់រោងចក្រ សហគ្រាសនានា អនុញ្ញាតឱ្យ និយោជិក បុគ្គលិក របស់ខ្លួន បានឈប់សម្រាករយៈពេលបីថ្ងៃ ពោលគឺចាប់ពីថ្ងៃទី២៨ ដល់ថ្ងៃទី៣០ ខែកក្កដា ឆ្នាំ២០១៨ ដើម្បីទៅបោះឆ្នោត។
បើទោះបីជាទិដ្ឋភាពទូទៅនៅរាជធានីភ្នំពេញ មានសភាពស្ងប់ស្ងាត់យ៉ាងណាក៏ដោយ។ ក៏ប៉ុន្តែបើក្រឡេកទៅមើលតាមមណ្ឌលបោះឆ្នោតវិញ ប្រជាពលរដ្ឋ តាំងពីព្រឹកព្រលឹមស្រាងៗ បានឈររង់ចាំនៅខាងមុខការិយាល័យ ដើម្បីរង់ចាំបោះឆ្នោត ជ្រើសរើសគណបក្សដែលខ្លួនពេញចិត្ត។ ចំណែកឯប្រជាពលរដ្ឋខ្លះទៀត ក៏កំពុងតែធ្វើដំណើរចេញទៅបោះឆ្នោតជាបន្តបន្ទាប់ដែរ។
ជាការកត់សម្គាល់ នៅតាមមណ្ឌលបោះឆ្នោតនីមួយៗ នៅក្នុងរាជធានីភ្នំពេញ មានការយាមកាមយ៉ាងតឹងរឹង ពីសំណាក់កងកម្លាំងប្រដាប់អាវុធ កងរាជអាវុធហត្ថ និងមានកម្លាំងប្រជាការពារត្រៀមជួយនៅតាមឃុំ សង្កាត់ និងក្រុង ស្រុក ខណ្ឌ ដើម្បីការពារសន្តិសុខ និងសណ្តាប់ធ្នាប់ ក្នុងអំឡុងនៃការបោះឆ្នោតជ្រើសតាំងតំណាងរាស្ត្រនីតិកាលទី៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ