រដ្ឋាភិបាលប្រកាសពីការប្រារព្ធពិធីគោរពខួប១ឆ្នាំព្រះមហាវីរក្សត្រ
ប្រមុខរាជរដ្ឋាភិបាល ដែលទើបឡើងកាន់តំណែងសារជាថ្មី លោក នាយករដ្ឋមន្ត្រី ហ៊ុន សែន បានចេញសារាចរ ណែនាំមួយ ស្តីពី ការប្រារព្ធពិធីគោរពព្រះវិញ្ញាណក្ខន្ធ ព្រះករុណា ព្រះបាទ សម្តេចព្រះ នរោត្តម សីហនុ ព្រះបរមរតនកោដ្ឋ គម្រប់ខួប ១ ឆ្នាំ។
ចុះផ្សាយនៅថ្ងៃ៖
ក្នុងសារាចរ ចុះថ្ងៃទី២៥កញ្ញា រាជរដ្ឋាភិបាល បានលើកឡើងពីគុណូបការៈដ៏ថ្លៃថ្លា វិសេសវិសាល និងឧត្តុង្គឧត្តម ចំពោះជាតិមាតុភូមិ ជាពិសេសព្រះរាជវីរសកម្មភាពរបស់ព្រះអង្គ ដែលធ្វើឲ្យកម្ពុជា ទទួលបានឯករាជ្យ។ រាជរដ្ឋាភិបាល បានប្រកាសកំណត់យកថ្ងៃទី១៥តុលា ជាទិវាប្រារព្ធពិធីគោរពព្រះវិញ្ញាណក្ខន្ធ ព្រះករុណា សម្តេចព្រះនរោត្តម សីហនុ។
ដើម្បីឲ្យការប្រារព្ធពិធីគោរពព្រះវិញ្ញាណក្ខន្ធរបស់ព្រះអង្គ គម្រប់ខួប ១ ឆ្នាំ ប្រព្រឹត្តទៅប្រកបដោយភាពឧត្តុង្គឧត្តម រាជរដ្ឋាភិបាល បានណែនាំដល់គ្រប់ក្រសួង ស្ថាប័ន និងគ្រឹះស្ថានសាធារណៈ និងឯកជន ត្រូវរៀបចំប្រារព្ធពិធីគោរពព្រះវិញ្ញាណក្ខន្ធគម្រប់ខួប ១ ឆ្នាំ នៅថ្ងៃទី១៥ ខែតុលា ឆ្នាំ២០១៣ ឲ្យបានឧត្តុង្គឧត្តម ហើយស្ថាប័នរដ្ឋ ត្រូវចាត់តាំងប្រតិភូ ចូលរួមគោរពព្រះវិញ្ញាណក្ខន្ធ ព្រះករុណា នៅស្តូបព្រះបរមរូប ព្រះអង្គ នៅជិតវិមានឯករាជ្យ។ គ្រប់ស្ថានអគ្គរាជទូត និងស្ថានកុងស៊ុល កម្ពុជា ប្រចាំនៅបរទេស ក៏ត្រូវរៀបចំប្រារព្ធពិធីនេះផងដែរ។
ដោយឡែក រដ្ឋបាលថ្នាក់ក្រោមជាតិគ្រប់លំដាប់ថ្នាក់ ពីថ្នាក់ខេត្តរាជធានី ដល់ថ្នាក់ឃុំសង្កាត់ ព្រមទាំងវត្តអារាម រហូតដល់ប្រជាពលរដ្ឋតាមមូលដ្ឋាន ត្រូវរៀបចំប្រារព្ធពិធីគោរពព្រះវិញ្ញាណក្ខន្ធ គម្រប់ខួប ១ ឆ្នាំ ថ្វាយព្រះករុណា។ រីឯក្រសួងព័ត៌មាន ក៏ត្រូវចាត់តាំងរៀបចំកម្មវិធីផ្សព្វផ្សាយតាមវិទ្យុ ទូរទស្សន៍ជាតិ ឯកជន អំពីព្រះរាជជីវប្រវត្តិ ព្រះរាជសកម្មភាព និងស្នាព្រះហស្ថរបស់ព្រះករុណា សម្តេចព្រះ នរោត្តម សីហនុ ចំពោះប្រទេសជាតិ និងចំពោះប្រជារាស្ត្រ ឲ្យបានទូលំទូលាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ