រដ្ឋាភិបាលកម្ពុជាផ្តល់ថវិកា ៦,៦ លានដុល្លារ សម្រាប់ប្រាក់ខែបុគ្គលិកជាតិនៅសាលាក្តីខ្មែរក្រហម
រាជរដ្ឋាភិបាលកម្ពុជា បានសម្រេចផ្តល់ថវិកា ៦,៦ លានដុល្លារ សម្រាប់ប្រាក់ខែបុគ្គលិកជាតិ នៅសាលាក្តីចម្រុះកាត់ទោសអតីតមេខ្មែរក្រហម គិតចាប់ពីខែតុលា ឆ្នាំ២០១៤ រហូតដល់ខែមិថុនា ឆ្នាំ២០១៥។ ការព្រមព្រៀងនេះ ត្រូវបានលោកនាយករដ្ឋមន្ត្រី ហ៊ុន សែន ប្រកាសចំពោះមុខលោកបាន គីមូន អគ្គលេខាធិការអង្គការសហប្រជាជាតិក្នុងជំនួបទ្វេភាគីនៅក្រៅកិច្ចប្រជុំកំពូលអាស៊ាននៅប្រទេសភូមា។
ចុះផ្សាយនៅថ្ងៃ៖
ស្តាប់ - ០២:៣៦
ចាប់ពីពេលនេះ រហូតដល់ពាក់កណ្តាលឆ្នាំ២០១៥ ភាគីជាតិ ក្នុងតុលាការខ្មែរក្រហម លែងជួបនឹងវិបត្តិថវិកាទៀតហើយ។ នោះគឺរដ្ឋាភិបាលកម្ពុជា បានធានាផ្តល់ថវិកា សម្រាប់បើកប្រាក់ខែដល់បុគ្គលិកជាតិ ចាប់ពីខែតុលា ឆ្នាំ២០១៤ រហូតដល់ខែមិថុនា ឆ្នាំ២០១៥។
នៅក្រៅកិច្ចប្រជុំកំពូលអាស៊ាន នៅប្រទេសភូមា កាលពីថ្ងៃទី១២ និងថ្ងៃទី១៣វិច្ឆិកា លោកនាយករដ្ឋមន្ត្រី ហ៊ុនសែន បានឆ្លៀតពេលជួបលោកបានគីមូន អគ្គលេខាធិការអង្គការសហប្រជាជាតិ ដើម្បីនិយាយពីបញ្ហាថវិកា នៅសាលាក្តីចម្រុះ ពិសេសខាងភាគីកម្ពុជា។
នៅពេលនាយករដ្ឋមន្ត្រីវិលត្រលប់មកដល់ភ្នំពេញ កាលពីយប់កណ្តាលអធ្រាត្រ ថ្ងៃ១៣វិច្ឆិកា ចូលថ្ងៃទី១៤វិច្ឆិកា លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានថ្លែងក្នុងសន្និសីទកាសែតនៅព្រលានយន្តហោះភ្នំពេញ។ តាមលោករដ្ឋមន្ត្រី ក្នុងជំនួបទ្វេភាគី ប្រមុខរាជរដ្ឋាភិបាលកម្ពុជា បានឯកភាពតាមការស្នើសុំរបស់លោកអគ្គលេខាធិការ បាន គីមូន ថាកម្ពុជានឹងផ្តល់ថវិកា សម្រាប់ប្រាក់ខែបុគ្គលិកជាតិ នៅសាលាក្តីខ្មែរក្រហម រយៈពេល ៣ ខែចុងក្រោយឆ្នាំ២០១៤នេះ ហើយនិងផ្តល់ការគាំទ្រទៀត សម្រាប់ប្រាក់ខែនៃមន្ត្រីខ្មែរ ធ្វើការនៅសាលាក្តីខ្មែរក្រហម សម្រាប់ ៦ ខែ នៅឆ្នាំ២០១៥ ខាងមុខ។
ថវិកាដែលរាជរដ្ឋាភិបាល ជួយសម្រាប់បើកប្រាក់ខែបុគ្គលិក និងមន្ត្រីកម្ពុជា ចំនួន ១៨២ រូប នៅសាលាក្តីខ្មែរក្រហម ក្នុងរយៈពេល ៩ ខែនេះ មានចំនួន ៦,៦ លានដុល្លារ។
ចាប់តាំងពីឆ្នាំ២០០៦ ដល់ឆ្នាំ២០១៣ សាលាក្តីខ្មែរក្រហម បង្កើតឡើងដោយរដ្ឋាភិបាលកម្ពុជា និងអង្គការសហប្រជាជាតិ បានចំណាយសរុប ២០៤,៦ លានដុល្លារ។ ក្នុងនោះ ភាគីអន្តរជាតិ ២៥៤,៩ លានដុល្លារ និងភាគីជាតិ ៤៩,៦ លានដុល្លារ។ ចំណែកនៅឆ្នាំ២០១៤ សាលាក្តី ត្រូវការថវិកា ៣១,៦ លានដុល្លារ ដោយភាគីអន្តរជាតិ ចំនួន ២៥,២ លាន និងភាគីជាតិ ៦,៤ លានដុល្លារ។ រីឯឆ្នាំ២០១៥ ត្រូវការថវិកា ចំនួន ២៨,៩ លានដុល្លារ ក្នុងនោះ ភាគីអន្តរជាតិ គ្រោងចំណាយ ២២,៩ លានដុល្លារ។
ដោយចៀសផុតពីវិបត្តិថវិកា រហូតដល់ពាក់កណ្តាលឆ្នាំ២០១៥ អង្គជំនុំជម្រះសាលាដំបូង នឹងបន្តសវនាការលើសំណុំរឿង០០២ វគ្គ ២ តាមការគ្រោងទុក នៅព្រឹកថ្ងៃទី១៧វិច្ឆិកា។ ប៉ុន្តែតាមអ្នកនាំពាក្យសាលាក្តី លោក នេត្រ ភក្ត្រា មកដល់ពេលនេះ ភាគីមេធាវីការពារក្តីលោកខៀវសំផន បានជូនដំណឹងមកអង្គជំនុំជម្រះរួចហើយថា នឹងមិនចូលរួមសវនាការ នៅថ្ងៃ១៧វិច្ឆិកា រហូតដល់បញ្ចប់សារណាលើបណ្តឹងឧទ្ធរណ៍ លើសំណុំរឿង០០២ វគ្គ១ នៅចុងខែធ្នូ។
បើអវត្តមានមេធាវីការពារក្តីដូច្នេះ អង្គជំនុំជម្រះ នឹងអនុវត្តតាមនីតិវិធី ដោយចាត់វិធានការម៉ឺងម៉ាត់ ដូចសេចក្តីប្រកាសទៅកាន់គ្រប់ភាគី។ ក្នុងនោះ ភាគីសហព្រះរាជអាជ្ញា បានស្នើថា ក្នុងករណីមេធាវីការពារក្តី មិនចូលរួមសវនាការ ថ្ងៃ១៧វិច្ឆិកា គេអាចស្នើសុំមេធាវីបម្រុង ដើម្បីតំណាងឲ្យផលប្រយោជន៍ជនជាប់ចោទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ