រដ្ឋាភិបាលកម្ពុជាដាក់បទបញ្ជាឲ្យកងទ័ព បង្កើនទំនាក់ទំនងជាមួយថៃ និងមិនត្រូវចល័តកម្លាំងតាមព្រំដែន
ចំពោះរដ្ឋប្រហារយោធានៅប្រទេសថៃ រដ្ឋាភិបាលកម្ពុជា បានចេញបទបញ្ជាទៅកាន់មេបញ្ជាការកងទ័ព មេប៉ូលិស និងអាជ្ញាធរជាប់ព្រំដែនកម្ពុជា-ថៃ ត្រូវណែនាំដល់កងកម្លាំងកម្ពុជា ដែលឈរជើងតាមព្រំដែនជាមួយថៃ ត្រូវបន្តបង្កើនទំនាក់ទំនងល្អជាមួយថៃ និងមិនត្រូវធ្វើការចល័តកម្លាំងតាមព្រំដែនឡើយ។ ចំណែកអ្នកនាំពាក្យរដ្ឋាភិបាល លោក ផៃ ស៊ីផាន បានអំពាវនាវផ្ទាល់មាត់ជាថ្មីទៀត នៅព្រឹកថ្ងៃសុក្រនេះ ទៅកាន់ប្រជាពលរដ្ឋកម្ពុជា បើអាចជៀសបាន គឺកុំធ្វើដំណើរទៅប្រទេសថៃ ហើយប្រជាពលរដ្ឋកម្ពុជា ដែលកំពុងស្ថិតនៅប្រទេសថៃ ក៏ត្រូវថែរក្សាសុវត្ថិភាព ដោយចាកឆ្ងាយពីកន្លែងជួបជុំនយោបាយ ពិសេសនៅទីក្រុងបាងកក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ភ្លាមៗ បន្ទាប់ពីយោធាថៃ ប្រកាសរដ្ឋប្រហារទម្លាក់រដ្ឋាភិបាលចាំផ្ទះរបស់ប្រទេសថៃ កាលពីល្ងាចថ្ងៃទី២២ឧសភា រដ្ឋាភិបាលកម្ពុជាតាមរយៈលោក ស ខេង នាយករដ្ឋមន្ត្រីស្តីទី បានដាក់ចេញនូវបទបញ្ជាជាលាយលក្ខណ៍អក្សរ ចំនួន ៣ ចំណុច។ ជាបទបញ្ជា ដើម្បីលើកកម្ពស់ក្នុងការថែរក្សាសន្តិសុខ សណ្តាប់ធ្នាប់ កិច្ចសហប្រតិបត្តិការ និងការអភិវឌ្ឍន៍តាមបណ្តោយព្រំដែនកម្ពុជា-ថៃ។
បទបញ្ជារបស់រដ្ឋាភិបាល ទាំង ៣ ចំណុច នោះគឺមេបញ្ជាការកងទ័ព និងមេប៉ូលិស ត្រូវណែនាំដល់កងកម្លាំង ដែលឈរជើងការពារតាមព្រំដែនកម្ពុជា ត្រូវបន្តកិច្ចសហការល្អ ជាមួយថៃ និងមិនត្រូវចល័តកងកម្លាំងទេ។ អភិបាលខេត្តជាប់ព្រំដែនថៃ រួមមាន ខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ប៉ៃលិន និងខេត្តកោះកុង ក៏ត្រូវបន្តទំនាក់ទំនង សហការជាមួយថៃ ព្រមទាំងបន្តតាមដានការវិវត្តសភាពការណ៍នៅប្រទេសថៃ ពិសេសសភាពការណ៍តាមព្រំដែនជាមួយកម្ពុជា និងរាយការណ៍មកទីស្តីការគណៈរដ្ឋមន្ត្រី ឲ្យបានទាន់ពេលវេលា។
រដ្ឋាភិបាលកម្ពុជា រក្សាជំហរស្ងៀមស្ងាត់ ហើយបួងសួងឲ្យប្រទេសថៃជាមិត្ត ជួបតែសន្តិភាព និងឆ្លងកាត់ឧបសគ្គទាំងឡាយ ជៀសចេញពីការបង្ហូរឈាម។ នេះបើតាមការបញ្ជាក់បន្ថែម ពីលោក ផៃ ស៊ីផាន អ្នកនាំពាក្យរដ្ឋាភិបាល។
លោក ផៃ ស៊ីផាន ក៏បានអំពាវនាវផ្ទាល់មាត់ទៅកាន់ប្រជាពលរដ្ឋកម្ពុជា បើអាចជៀសបាន កុំទៅប្រទេសថៃ ហើយប្រជាពលរដ្ឋកម្ពុជា ដែលកំពុងស្ថិតនៅប្រទេសថៃ ត្រូវថែរក្សាខ្លួន ហើយចាកឆ្ងាយពីកន្លែងជួបជុំនយោបាយ ពោលគឺសុវត្ថិភាពជាចំបង។
យ៉ាងណាក៏ដោយ ក្នុងពេលប្រទេសថៃ ជួបវិបត្តិនយោបាយធ្ងន់ធ្ងរ នាពេលនេះ លោក ផៃ ស៊ីផាន បានគូសបញ្ជាក់ថា រដ្ឋាភិបាលកម្ពុជា នៅតែរក្សាផលប្រយោជន៍រវាងប្រជាពលរដ្ឋកម្ពុជា និងថៃ ដ្បិតកម្ពុជា-ថៃ ជាប្រជាជាតិរស់នៅជាប់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ