អត្រាមរណភាពដោយសារមូសខ្លាថយចុះតិចតួចប៉ុណ្ណោះ
ជំងឺគ្រុនឈាម ដែលបង្កឡើងដោយមូសខ្លាបានសម្លាប់កុមារកម្ពុជាតិចជាងឆ្នាំមុន។ យោងតាមស្ថិតិពីកម្មវិធីជាតិប្រយុទ្ធនឹងជំងឺគ្រុនឈាម អ្នកជំងឺ៣នាក់បានស្លាប់ ក្នុងឆមាសទី១នៃឆ្នាំ២០១៤ ហើយបើគិតក្នុងរយៈពេលដូចគ្នា ក្នុងឆ្នាំ២០១៣ ជនរងគ្រោះ១៩នាក់បានបាត់បង់ជីវិត។ ថ្វីបើមើលទៅចំនួនអ្នកស្លាប់ថយចុះច្រើនក៏ដោយ ក៏អត្រាមរណភាពថយចុះតិចតួចប៉ុណ្ណោះ បើផ្អែកលើបរិមាណអ្នកជំងឺ។ អ្នកជំនាញលើកឡើងថា ការប្រុងប្រយ័ត្នចំពោះមូសខ្លាដ៏កំណាចនោះត្រូវតែបន្តពង្រឹង។
ចុះផ្សាយនៅថ្ងៃ៖
ស្តាប់ - ០១:៥៦
អ្នកជំងឺគ្រុនឈាម៣នាក់បានស្លាប់ បើគិតត្រឹមដើមខែមិថុនា ឆ្នាំ២០១៤ ហើយការណ៍នេះបង្ហាញនូវការថយចុះយ៉ាងខ្លាំង បើប្រៀបធៀបទៅនឹងរយៈពេលដូចគ្នា ក្នុងឆ្នាំ២០១៣ ដែលមានជនរងគ្រោះដល់ទៅ១៩នាក់ បានបាត់បង់ជីវិត។ នេះបើយោងតាមលោកវេជ្ជបណ្ឌិត ង៉ាន់ ច័ន្ទថា ប្រធានកម្មវិធីជាតិប្រយុទ្ធនឹងជំងឺគ្រុនឈាម ដែលបានប្រាប់ទីភ្នាក់ងារសារព័ត៌មានកម្ពុជា (AKP) កាលពីថ្ងៃទី២១ ខែមិថុនា ឆ្នាំ២០១៤។
ការណ៍នេះបង្ហាញអំពីជោគជ័យដ៏ស្តួចស្តើងរបស់កម្មវិធីជាតិប្រយុទ្ធនឹងជំងឺគ្រុនឈាម ថ្វីបើចំនួនអ្នកស្លាប់ថយចុះគួរឱ្យកត់សម្គាល់។ តាមពិត កាលពីអំឡុងឆមាសទី១នៃឆ្នាំ២០១៣ អ្នកជំងឺគ្រុនឈាមមានដល់ទៅ ៣ ៥៤១នាក់ នៅពេលដែលក្នុងរយៈពេលដូចគ្នានៃឆ្នាំ២០១៤នេះ អ្នកជំងឺមានតែ៦១៦នាក់ប៉ុណ្ណោះ។ ដូច្នេះ អត្រាមរណភាពដោយសារជំងឺគ្រុនឈាម នៅ៦ខែដើមឆ្នាំ២០១៣ គឺ០,៥៣% រីឯ នៅ៦ខែដើមឆ្នាំ២០១៤ គឺ០,៤៨%។ និយាយឱ្យចំ អត្រាស្លាប់នៃអ្នកជំងឺគ្រុនឈាមថយចុះតែ០,០៥%ទេ។ អ្វីដែលថយចុះគួរឱ្យកត់សម្គាល់នោះ គឺបរិមាណអ្នកជំងឺគ្រុនឈាម ដែលមានមូសខ្លា ជាភ្នាក់ងារចម្លងមេរោគ។
លោក វេជ្ជបណ្ឌិត ង៉ាន់ ច័ន្ទថា ដែលជាអនុប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីត និងបាណកសាស្ត្រផងនោះ បានថ្លែងប្រាប់ AKP ថា៖ «ទោះបីជាជំងឺគ្រុនឈាម ថយចុះយ៉ាងណាក៏ដោយ យើងទាំងអស់គ្នាមិនគួរបន្ធូរបន្ថយការកម្ចាត់ជម្រកមូសខ្លា ឬបន្ថយការត្រៀមមធ្យោបាយឆ្លើយតបទៅនឹងការផ្ទុះរាតត្បាតនោះទេ ព្រោះថាកម្ពុជាជាប្រទេសមួយ ដែលជាសំបុកគ្រុនឈាម អស់រយៈពេលជាច្រើនទសវត្សរ៍មកហើយ។ ដូច្នេះ យើងត្រូវខិតខំប្រឹងប្រែងបន្តទៀតដើម្បីទប់ស្កាត់កុំឲ្យកុមារកម្ពុជារងគ្រោះដោយសារជំងឺនេះ ព្រោះថា កុមារដែលស្ថិតនៅក្នុងអាយុសិក្សាមានការប្រឈមមុខខ្ពស់នឹងជំងឺគ្រុនឈាមនេះ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ