ខ្មែរក្រហម៖ សាលក្រមផ្តន្ទាទោសដែលជនរងគ្រោះមិនអស់ចិត្ត!
ចុះផ្សាយនៅថ្ងៃ៖
ស្តាប់ - ០៥:០១
ការប្រកាសសាលក្រមផ្តន្ទាទោស នួន ជា និង ខៀវ សំផន ឲ្យជាប់ពន្ធនាគារមួយជីវិតកាលពីថ្ងៃព្រហស្បតិ៍គឺជារឿងមួយដែលជនរងគ្រោះខ្មែរសាទរ។ ប៉ុន្តែ អ្វីដែលពួកគេចង់បានជាងនេះទៅទៀតនោះគឺការទទួលកំហុសរបស់អតីតមេដឹកនាំខ្មែរក្រហម និងការបកស្រាយអាថ៌កំបាំងទាំងឡាយនៃរបបនេះ។ តាំងពីដើមទីរហូតមកទល់បច្ចុប្បន្ន អតីតមេដឹកនាំខ្មែរក្រហមគ្រប់គ្នា សុទ្ធតែហៅខ្លួនឯងថាជាអ្នក«ស្នហាជាតិ»និងមិនទទួលខុសត្រូវចំពោះបទឧក្រិដ្ឋដែលបានកើតឡើងក្នុងរបបដឹកនាំរបស់ខ្លួនទេ។ ម្យ៉ាងទៀត យុត្ថាធិការរបស់សាលាក្តីដែលមានកម្រិតក៏មិនអនុញ្ញាតឲ្យជនរងគ្រោះយល់ដឹងទូលំទូលាយពីរបបខ្មែរក្រហមដែរ។
សាលក្រមផ្តន្ទាទោសអតីតមេដឹកនាំខ្មែរក្រហមឲ្យជាប់ពន្ធនាគារមួយជីវិតបានធ្វើឲ្យសាលាក្តីខ្មែរក្រហមទទួលបានការចាប់អារម្មណ៍ជាថ្មីម្តងទៀតពីសំណាក់ជនរងគ្រោះខ្មែរក៏ដូចជាសហគមន៍អន្តរជាតិដែរ។ ចាប់អារម្មណ៍ពីព្រោះតែសាលក្រមនេះបានបង្ហាញឲ្យឃើញថាអ្នកដឹកនាំដែលប្រព្រឹត្តបទឧក្រិដ្ឋមិនអាចគេចផុតពីការផ្តន្ទាទោសបានឡើយ។ សារនេះមានសារសំខាន់ណាស់សម្រាប់បរិបទប្រទេសកម្ពុជា។ ប៉ុន្តែ អ្វីដែលជនរងគ្រោះមិនទាន់អស់ចិត្តនោះពួកគេមិនបានឃើញការយល់ព្រមទទួលកំហុសរបស់ជនជាប់ចោទនោះឡើយ។
ជាការពិតណាស់ មនុស្សស្រករក្រោយជាច្រើនដែលមិនបានហែលឆ្លងកាត់សម័យប៉ុល ពត ប្រាកដជាមិនអាចមិនកោតស្ញប់ស្ញែងបានទេនៅពេលដែលពួកគេបានលឺសម្តីរបស់អតីតមេដឹកនាំខ្មែរក្រហមក្នុងសវនាការកន្លងទៅនេះ។ ម៉ាត់ណាក៏ពួកគេនិយាយអំពីទឹកចិត្តស្នហាជាតិដ៏បរិសុទ្ធ ម៉ាត់ណាក៏និយាយអំពីបុព្វហេតុជាតិនិងប្រជាជន និងម៉ាត់ណាក៏និយាយអំពីការការពារបូរណភាពទឹកដីរបស់ខ្លួនចេញពីខ្ញុំកញ្ជះបរទេសដែរ។
ជាក់ស្តែង នៅពេលចោទសួរអំពីការជម្លៀសប្រជាពលរដ្ឋចេញពីភ្នំពេញ នួន ជា បាននិយាយថា បក្សកុម្មុយនីស្តកម្ពុជាមានគោលបំណងល្អដើម្បីឲ្យពលរដ្ឋខ្មែរមានអាហារហូបចុកគ្រប់គ្រាន់ និងចៀសផុតពីគ្រោះថ្នាក់ដែលបណ្តាលមកពីកិច្ចអន្តរាគមន៍ជាយថាហេតុរបស់ទាហានអាមេរិកាំង។ ក៏ប៉ុន្តែ សម្រាប់អ្នកដែលបានឆ្លងកាត់ព្រឹត្តិការណ៍ទាំងនោះដោយផ្ទាល់ គេប្រាកដជាបានដឹងច្បាស់ថា អ្វីដែលទាហានខ្មែរក្រហមបានធ្វើពេលនោះវាបានបង្ហាញពីនយោបាយគំនុំសងសឹក ចងអាឃាត និងការស្អប់ខ្ពើមអ្នកទីក្រុងយ៉ាងពិតប្រាកដ។
តាមរយៈសវនាការកន្លងទៅនេះ គេអាចយល់បានថា ដើម្បីគេចពីការទទួលខុសត្រូវ អតីតមេដឹកនាំខ្មែរក្រហមបានប្រើយុទ្ធសាស្ត្រទម្លាក់កំហុសទៅលើមនុស្សបីជំពូក៖ ទី១ គឺអ្នកដែលបានស្លាប់ទៅដូចជាខ្មោចសាឡុត ស ហៅ ប៉ុល ពត ជាដើម។ ទី២ គឺមនុស្សដែលពួកគេហៅថាជា«ក្រុមក្បត់» និងទី៣គឺការទម្លាក់កំហុសទៅលើបរទេសថាជាអ្នកទទួលខុសត្រូវលើការកាប់សម្លាប់ប្រជាពលរដ្ឋខ្មែរ។ ចំណែកពួកគេដែលជាជនជាប់ចោទសុទ្ធតែអះអាងថា ជាអ្នកស្នហាជាតិដ៏ល្អបរិសុទ្ធ។ យុទ្ធសាស្ត្រនេះក៏ហាក់បានក្លាយជាទម្លាប់ទូទៅមួយទៅហើយនៅក្នុងឆាកនយោបាយប្រទេសកម្ពុជា។
ពិតហើយថា អតីតមេដឹកនាំខ្មែរក្រហមដែលជាជនជាប់ចោទមានសិទ្ធិក្នុងការទាមទាររកយុត្តិធម៌។ ក្នុងន័យនេះ ការលើកឡើងរបស់ នួន ជា ដែលថា សាលាក្តីខ្មែរក្រហម«យកតែខ្លួនក្រពើមកកាត់ទោស ដោយមិនព្រមមើលក្បាលនិងកន្ទុយរបស់វា»នោះ គឺជាហេតុផលសមរម្យមួយ។ ម្យ៉ាងទៀត ការបត់បែននៃនយោបាយប្រទេសកម្ពុជាពិតជាមានជាប់ពាក់ពន្ធ័នឹងមហិច្ឆតា និងការលូកដៃរបស់បរទេស ប៉ុន្តែ ការលូកដៃរបស់បរទេសបានឬមិនបាន និងបានកម្រិតណាវាក៏អាស្រ័យទៅលើអ្នកនយោបាយខ្មែរខ្លួនឯងដែរ។
ដូច្នេះ ក្នុងឋានៈជាអ្នកដឹកនាំប្រទេសដែលធ្វើឲ្យពលរដ្ឋស្លាប់ជិតពីរលាននាក់ គេមិនអាចគេចវេសពីការទទួលខុសត្រូវដោយព្យាយាមទម្លាក់កំហុសទៅលើអ្នកដទៃនោះឡើយ។ និយាយពីការទទួលខុសត្រូវ តួនាទីជាអ្នកដឹកនាំប្រទេសមិនគួរជាទីប្រាថ្នាចង់បាននោះឡើយពីព្រោះ តួនាទីនេះត្រូវចងភ្ជាប់ដោយទំនួសខុសត្រូវធំធេងណាស់ចំពោះមុខជាតិនិងប្រជាជន។ ប៉ុន្តែ ទំនងជាមើលរំលងបញ្ហានេះហើយបានជាអ្នកនយោបាយខ្មែរចាត់ទុកអំណាចថាគួរជាទីប្រាថ្នាចង់បានយ៉ាងខ្លាំងទៅវិញ។
សរុបមកវិញ សាលក្រមផ្តន្ទាទោសអតីតមេដឹកនាំកំពូលខ្មែរក្រហមឲ្យជាប់ពន្ធនាគារអស់មួយជីវិតគឺជាសារដ៏សំខាន់មួយសម្រាប់បញ្ចៀសប្រវត្តិសាស្ត្រកុំឲ្យច្រំដែល។ ប៉ុន្តែ សាលក្រមនេះមិនបានធ្វើឲ្យជនរងគ្រោះស្ងប់ចិត្តទេដោយសារម្យ៉ាងជនជាប់ចោទមិនបង្ហាញការទទួលខុសត្រូវនិងមិនបានបកស្រាយអាថ៌កំបាំងនៅក្នុងរបបដឹកនាំរបស់ពួកគេឲ្យពឹស្តារទេ និងម្យ៉ាងទៀត យុត្ថាធិការរបស់តុលាការក៏ចង្អៀតដែលមិនអនុញ្ញាតឲ្យជនរងគ្រោះបានយល់ទូលំទូលាយពីដើមទងនៃរបបខ្មែរក្រហមឡើយ។
រីឯសាលក្រមផ្តន្ទាទោសឲ្យជាប់ពន្ធនាគារមួយជីវិតនេះទៀតសោតក៏មិនអាចប៉ះប៉ូវការឈឺចាប់គ្មានអ្វីប្រៀបផ្ទឹមរបស់ជនរងគ្រោះបានដែរ។ ដូច្នេះ មេរៀនដែលគេអាចទាញបានពីសំណុំរឿងខ្មែរក្រហមនេះគឺ មានតែការទទួលខុសត្រូវរបស់អ្នកនយោបាយទេដែលអាចបញ្ចៀសបញ្ហាគ្រប់បែបយ៉ាងបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ