ច្រករបៀងនៅតាមបណ្តោយព្រំដែនកម្ពុជា-ថៃបានបិទទាំងស្រុង
ស្ថានភាពទូទៅនៅតាមបណ្តោយព្រំដែនកម្ពុជា-ថៃ នៅព្រឹកថ្ងៃសុក្រទី២៣ឧសភានេះ មានស្ថានភាពស្ងប់ស្ងាត់ និងស្ថិតនៅក្នុងការប្រុងប្រយ័ត្ន ខណៈភាគីថៃបានបិទច្រករបៀងដែលមានទំនាក់ទំនងជាមួយកម្ពុជាទាំងស្រុង។ ចំណែកឯច្រកទ្វារអន្តរជាតិ និងច្រកទ្វារផ្លូវការនានា បើទោះបីជានៅមានដំណើរការជាធម្មតាក្តី ក៏ប៉ុន្តែ ក៏ស្ថិតនៅក្រោមការរឹតបន្តឹងសន្តិសុខយ៉ាងតឹងរឹងផងដែរ។
ចុះផ្សាយនៅថ្ងៃ៖
ស្តាប់ - ០២:៥៨
ច្រករបៀងស្ទើរតែទាំងស្រុងដែលស្ថិតនៅតាមបណ្តោយព្រំដែនកម្ពុជា-ថៃ ចាប់ពីខេត្តព្រះវិហារ ឧត្តរមានជ័យ បន្ទាយមានជ័យ ប៉ៃលិន ពោធិ៍សាត់ និងខេត្តកោះកុង ត្រូវបានបិទជាឯកតោភាគី ចាប់តាំងពីល្ងាចថ្ងៃព្រហស្បតិ៍ និងបានបន្តបិទ រហូតមកដល់ថ្ងៃសុក្រនេះ ដោយមិនឲ្យមានការឆ្លងកាត់ដូចសព្វមួយដងនោះទេ។
មូលហេតុដោយសារថា ភាគីថៃកំពុងមានរដ្ឋប្រហារយោធា ដែលនាំទៅដល់ការបិទបំរាមគោចរ នឹងការរឹតបន្តឹងសន្តិសុខ។ ចំណែកឯច្រកទ្វារអន្តរជាតិ និង ច្រកទ្វារផ្លូវការនានា ដូចជាច្រកទ្វារអន្តរជាតិប៉ោយប៉ែត ក្នុងខេត្តបន្ទាយមានជ័យ នៅមិនទាន់បិទនៅឡើយទេ ដោយសកម្មភាពដោះដូរទំនិញនៅមានសកម្មភាពជាធម្មតា ប៉ុន្តែស្ថិតនៅក្រោមការរឹតបន្តឹងសន្តិសុខយ៉ាងតឹងរឹង។ នេះបើតាមការបញ្ជាក់ពីលោក គោស៊ុំ សារឿត អភិបាលខេត្តបន្ទាយមានជ័យ។
អភិបាលខេត្តរូបនេះ បានបញ្ជាក់ប្រាប់វិទ្យុបារាំងអន្តរជាតិនៅថ្ងៃសុក្រនេះថា ទាហានឈុតខ្មៅថៃ និងនគរបាលជាយដែន ត្រូវបានដាក់ជំនួសនគរបាលអន្តោប្រវេសន៍ ព្រមទាំងមន្ត្រីស៊ីវិលជំនាញរបស់ថៃនៅច្រកទ្វារអន្តរជាតិខ្លងលឹក និងប៉ោយប៉ែត នៅព្រឹកថ្ងៃសុក្រនេះ ហើយការឆ្លងកាត់របស់ប្រជាពលរដ្ឋខ្មែរ និងការដោះដូទំនិញនានាត្រូវបានរឹងបន្តឹងយ៉ាងខ្លាំង។
ស្ថានភាពព្រំដែនកម្ពុជា-ថៃ បានរឹតបន្តឹង ក្រោយពីយោធាថៃដឹកនាំដោយលោក ប្រាយុទ្ធ ចាន់អូចា មេបញ្ជាការកងទ័ពជើងគោកថៃ បានធ្វើរដ្ឋប្រហារយោធាទំលាក់រដ្ឋាភិបាលចាំផ្ទះរបស់ថៃ កាលពីថ្ងៃព្រហស្បត្តិ៍ទី២២ឧសភាម្សិលមិញ និងបានតែងតាំងខ្លួនឯងជានាយករដ្ឋមន្ត្រីស្តីទីនៅព្រឹកថ្ងៃសុក្រនេះ។
បើទោះបីជារដ្ឋប្រហារដោយគ្មានការបង្ហូរឈាមក្តី ប៉ុន្តែមន្ត្រីសំខាន់ៗរបស់ភាគីរដ្ឋាភិបាលចាំផ្ទះ ភាគីមេដឹកនាំក្រុមបាតុករអាវលឿងប្រឆាំងរដ្ឋាភិបាល ភាគីមេដឹកនាំបាតុករគាំទ្ររដ្ឋាភិបាលរឺក្រុមអាវក្រហម ប្រមាណ១០រូបត្រូវបានឃាត់ខ្លួន ហើយមន្ត្រីជាន់ខ្ពស់ចំនួន ១៣៩នាក់ផ្សេងទៀត ក្នុងនោះរួមមានទាំងលោក ស្រី យ៉ីងឡាក់ ស៊ីណាវ៉ាត់ត្រាផង ត្រូវបានកោះហៅអោយចូលខ្លួនទៅបង្ហាញវត្តមាននៅទីបញ្ជាការដ្ឋានកងទ័ពជើងគោក នៅថ្ងៃសុក្រនេះ។ ការបិទច្រករបៀង និងការឹតបន្តឹងសន្តិសុខនៅតាមច្រកទ្វារអន្តរជាតិកម្ពុជា-ថៃនេះ ក៍ដើម្បីទប់ស្កាត់ការគេចខ្លួនរបស់មេដឹកនាំថៃ មកកាន់កម្ពុជាផងដែរ។
យ៉ាងណាក៏ដោយ លោក កុយ គួង អ្នកនាំពាក្យក្រសួងការបរទេសកម្ពុជា បានបញ្ជាក់ ថា គិតមកដល់ថ្ងៃសុក្រទី២៣ឧសភានេះ ភាគីថៃបានបិទតែច្រករបៀងខុសច្បាប់តែប៉ុណ្ណោះ ចំណែកឯច្រកទ្វារអន្តរជាតិ និង ច្រកទ្វារផ្លូវការនានា ភាគីថៃមិនបានបិទនោះទេ ដោយគ្រាន់តែមានការរឹតបន្តឹងសន្តិសុខជាងមុន។
លោក កុយ គួង ក៍បានអំពាវនាវកុំអោយប្រជាពលរដ្ឋខ្មែរឆ្លងកាត់ទៅកាន់ប្រទេសថៃដោយខុសច្បាប់ ហើយសំរាប់ពលរដ្ឋខ្មែរ ដែលកំពុងធ្វើការនៅក្នុងប្រទេសថៃ មិនត្រូវធ្វើសកម្មភាពណាមួយខុសច្បាប់ថៃនោះឡើយ។ យ៉ាងណាក៍ដោយ លោក កុយ គួង រំពឹងថា ស្ថានភាពនៅក្នុងប្រទេសថៃ នឹងវិលមករកភាពល្អប្រសើរឡើងវិញក្នុងពេលឆាប់ៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ