ពលរដ្ឋកម្ពុជាទូទាំងប្រទេសប្រារព្ធខួប២ឆ្នាំនៃការសោយទីវង្គតសម្តេចឳ
នៅក្នុងឱកាសនៃការប្រារព្ធខួបពីរឆ្នាំនៃការសោយទីវង្គតរបស់ព្រះករុណាព្រះបាទសម្តេចព្រះនរោត្តម សីហនុ ព្រះបរមរតនកោដ្ឋ នៅថ្ងៃទី១៥ខែតុលាឆ្នាំ ២០១៤នេះ ប្រជាពលរដ្ឋ មន្ត្រីរាជការ កងកម្លាំងប្រដាប់អាវុធបានធ្វើពិធីរាប់បាត្រព្រះសង្ឃ ៥០០អង្គ នៅខាងមុខព្រះបរមរាជវាំង។ ថ្នាក់ដឹកនាំជាន់ខ្ពស់ រដ្ឋាភិបាល និងរដ្ឋសភា ព្រមទាំងរាជវង្សានុវង្សធ្វើពិធីនេះនៅក្នុងវាំង។ រីឯបក្សប្រឆាំងធ្វើនៅទីស្នាក់ការរបស់ខ្លួន។ ពិធីគោរពវិញ្ញាណក្ខន្ធក៏ត្រូវបានគេធ្វើឡើងដំណាលគ្នាដែរ នៅឯស្តូបព្រះបរមរូប ឯវិមានឯករាជ្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
ពិធីរាប់បាតដែលមានព្រះសង្ឃ៥០០អង្គនៅខាងមុខព្រះបរមរាជវាំងត្រូវបានរៀបចំធ្វើនៅព្រឹកថ្ងៃពុធទី១៥តុលានេះ ចំពេលដែលព្រះករុណាព្រះបាទសម្តេចព្រះមហាវីរក្សត្រ នរោត្តមសីហនុ សោយទីវង្គត់គម្រប់ខួប២ឆ្នាំគត់។ ប្រជាពលរដ្ឋ មន្ត្រីរាជការ យ៉ាងច្រើនកុះករ បាននាំយកទ័យវត្ថុ មានគ្រឿង ឧបភោគ បរិភោគភេសជ្ជៈ និងទឹកសុទ្ធ រាប់បាតដល់ព្រះសង្ឃចាប់តាំងពីម៉ោង ៨ព្រឹក ដើម្បីជាការឧទ្ទិសកុសលថ្វាយដល់ដួងវិញ្ញាណក្ខន្ធព្រះបរមរតនកោដ្ឋ។ ជាមួយគ្នានេះ មន្ត្រីរាជការនៅតាមក្រសួងមន្ទីអង្គភាពសាធារណៈនានាកងកម្លាំងប្រដាប់អាវុធ ក៏ត្រូវបានចាត់ចែងឲ្យមានការគោរពវិញ្ញាណក្ខន្ធ ព្រះបរមរតនកោដ្ឋ នៅស្តូបព្រះបរមរូបឯវិមានឯករាជ្យផងដែរ។
ដោយឡែកលោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់រាជរដ្ឋាភិបាល រដ្ឋសភាព្រឹទ្ធសភា កាលពីព្រឹកមិញបានបង្ហាញវត្តមានផងដែរ ដោយបានចូលរួមជាមួយព្រះមហាក្សត្រ និងសម្តេចម៉ែ ព្រមទាំងរាជវង្សានុវង្ស ធ្វើពិធីរាប់បាត្រនៅខាងក្នុងព្រះមរមរាជវាំង។
លោក អ៊ុំ ដារ៉ាវុធ ទីប្រឹក្សាព្រះរាជលេខាធិការដ្ឋានរបស់ សម្ដេចព្រះមហាក្សត្រីមុនីនាថ សីហនុ បានមានប្រសាសន៍ប្រាប់វិទ្យុបារាំងអន្តរជាតិRFI នៅថ្ងៃពុធនេះដែរថា កម្មវិធីសម្រាប់ព្រះបរមរាជវាំង ត្រូវបានបញ្ចប់បន្ទាប់ពីពិធីរាប់បាតពេញមួយព្រឹក។
ដោយឡែកគណបក្សប្រឆាំងរបស់ប្រទេសកម្ពុជា គឺគណបក្សសង្គ្រោះបានប្រារព្ធពិធីរំលឹកវិញ្ញានក្ខន្ធនេះដែរ នៅទីស្នាក់ការធំរបស់ខ្លួន។ លោក យ៉ែម បុញ្ញឬទ្ធិ អ្នកនាំពាក្យគណបក្សសង្គ្រោះជាតិថ្លែងថា ការប្រារព្ធពិធីនៅទីស្នាក់ការបក្សបែបនេះ គឺដោយសារមិនមានការអញ្ជើញពីគណកម្មការរៀបចំបុណ្យជាតិដូចជាស្ថាប័នរដ្ឋនានា។
សូមបញ្ជាក់ថាព្រះមហាវីរក្សត្រ ព្រះបរមកោដ្ឋ នរោត្តម សីហនុ បានសោយទីវង្គត កាលពីថ្ងៃទី១៥ខែតុលា ឆ្នាំ២០១២ នៅមន្ទីពេទ្យទីក្រុងប៉េកាំងដោយរោគាពាធ។ព្រះបរមសពត្រូវបានដង្ហែមកកាន់ប្រទេសកម្ពុជាដើម្បីតម្កល់នៅក្នុងព្រះបរមរាជវាំងរយៈពេលបីខែ ដើម្បីឲ្យប្រជារាស្ត្រ ធ្វើពិធីគោរពព្រះវិញ្ញាណក្ខន្ធ និងមានការធ្វើពិធីរំលាយព្រះសព ដោយមានការចូលរួមពីថ្នាក់ដឹកនាំ ជាតិនិងបរទេស ព្រមទាំងប្រជាពលរដ្ឋខ្មែរយ៉ាងច្រើនសន្ធឹកសន្ធាប់។
ចាប់តាំងពីសម្តេចឳសោយទីវង្គត រហូតដល់ពិធីរំលាយព្រះសព គុណូបការៈ និងស្នាព្រះហស្ថព្រះអង្គ ទាក់ទងទៅនឹងការបង្រួបប្រួមជាតិ ឯកភាពជាតិខ្មែរ និងដំណោះស្រាយនយោបាយធំៗរបស់ជាតិ ព្រមទាំងសមិទ្ធិផលសម័យសង្គមរាស្ត្រនិយម ត្រូវបានលើកយកជជែកនិងផ្សព្វផ្សាយជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ