រដ្ឋាភិបាលឡាវពន្យារពេលសាងសង់ទំនប់វារីអគ្គិសនីដនសាហុង និងបើកអោយមានការសិក្សាឆ្លងដែន
នៅទីបំផុតទៅរដ្ឋាភិបាលឡាវបានសំរេចដកឃ្លារយៈពេល៦ខែ ដើម្បីដាក់អោយសិក្សាឡើង វិញ លើគំរោងសាងសង់ទំនប់វារីអគ្គិសនី ដនសាហុង ដែលស្ថិតនៅចំងាយតែ១គីឡូម៉ែត្រ ពីព្រំដែនកម្ពុជា។ ការសាងសង់ទំនប់វារីអគ្គិសនីដនសាហុង កាត់ដងទន្លេមេគង្គដែលគេជឿថា នឹងធ្វើអោយប៉ះពាល់ធ្ងន់ធ្ងរដល់ប្រជាពលរដ្ឋដែលរស់នៅតាមដងទន្លេមេគង្គដែលមានប្រជាជនជាង៦០លាននាក់។ ភ្លាមៗនេះ អង្គការ WWF បានចេញសេចក្តីថ្លែងការណ៍សាទរ និងហៅសេចក្តីសំរេចនេះថា គឺជាការពន្យារពេល នៃគំរោងសាងសង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
សេចក្តីសំរេចដែលនាំទៅដល់ការសារទរពីគ្រប់មជ្ឈដ្ឋាននេះ បានធ្វើឡើង ក្រោយពីកិច្ចប្រជុំលើកទី២០ នៃក្រុមប្រឹក្សាគណៈកម្មការទន្លេមេគង្គ (MRC) ដែលបានធ្វើឡើងនៅឯប្រទេសថៃរយៈពេល២ថ្ងៃ ចាប់ពីថ្ងៃទី២៦ដល់ថ្ងៃទី២៧មិថុនា ដោយមានតំណាងមកពីប្រទេសកម្ពុជា ថៃ ឡាវ និងវៀតណាមចូលរួម។ ជាសេចក្តីសំរេច ដែលរដ្ឋាភិបាលឡាវ បានយល់ព្រមបញ្ជូនទំនប់វារីអគ្គិសនីដនសាហុងឲ្យឆ្លងការពិគ្រោះយោបល់ជាមុន ក្រោមកិច្ចព្រមព្រៀងមេគង្គនាឆ្នាំ១៩៩៥ និងច្បាប់អន្តរជាតិនានា ដោយបានសុំឲ្យផែនការកសាងទំនប់ដនសាហុង ត្រូវតែឆ្លងការពិគ្រោះយោបល់ជាមុន។
ការសិក្សានឹងបើកទូលាយអោយមានការសិក្សាឆ្លងដែន ទៅលើផលប៉ះពាល់ បរិស្ថាន និងការរស់នៅរបស់ប្រជាជននៅតាមដងទន្លេ មុនពេលចាប់ផ្តើមសាងសង់។ មានន័យថា ការសិក្សានឹងមិនធ្វើតែនៅក្នុងទឹកដីឡាវនោះទេ តែនឹងធ្វើផងដែរ នៅក្នុងប្រទេសកម្ពុជា និងវៀតណាម ដែលប្រឆាំងនឹងគំរោងនេះយ៉ាងខ្លាំងក្លានោះ។
ភ្លាមៗនេះ អង្គការ WWF បានចេញសេចក្តីថ្លែងការណ៍សាទរ និងហៅសេចក្តីសំរេចនេះថា គឺជាការពន្យារពេលនៃគំរោងសាងសង់។ លោក Marc Goichot តំណាងអង្គការ WWF ប្រចាំតំបន់ទន្លេមេគង្គទទួលបន្ទុកផ្នែកវារីអគ្គិសនី បានហៅការសំរេចចិត្តនេះថា គឺជាការអនុវត្តន៍ការសន្យារបស់ខ្លួនទៅតាមអ្វីដែលរដ្ឋាភិបាលឡាវ បានចុះហត្ថលេខាលើកិច្ចព្រមព្រៀងទន្លេមេគង្គ។ ប៉ុន្តែតំណាងអង្គការ WWFបានកត់សម្គាល់ថា សម្ពាធពីប្រទេសកម្ពុជា-វៀតណាម និងពីអង្គការការពារបរិស្ថានផ្សេងៗ បានជំរុញអោយរដ្ឋាភិបាលឡាវសំរេចចិត្តឡើងវិញ។
លោក ឈិត សំអាត នាយកអង្គការWWF ប្រចាំនៅកម្ពុជា បាននិយាយថា យោងតាមការសិក្សារបស់អង្គការ WWF កន្លងមក ប្រសិនបើការសាងសង់ទំនប់វារីអគ្គិសនីដនសាហុង ត្រូវបានធ្វើមែន វានឹងធ្វើអោយប៉ះពាល់ដល់ជីវិតរស់នៅរបស់សត្វផ្សោតទន្លេមេគង្គយ៉ាងធំធេង ហើយការធ្វើចររាចរណ៍របស់ត្រី ក៍ជួបបញ្ហា រួមទាំងប៉ះពាល់ដល់ការរកស៊ីចិញ្ចឹមជីវិតរបស់ប្រជាជនជាង៦០លាននាក់ ដែលរស់នៅតាមដងទន្លេមេគង្គ។
ទំនប់វារីអគ្គិសនីដនសាហុង ដែលមានចំងាយតែជាង១គីឡូម៉ែត្រពីព្រំដែនប្រទេសកម្ពុជា គឺជាទំនប់វារីអគ្គិសនីទី២ ដែលរដ្ឋាភិបាលឡាវកំពុងតែសាងសង់ នៅនឹងតួរទន្លេមេគង្គ បន្ទាប់ពីទំនាប់វារីអគ្គិសនី ហ្សាយ៉ាបូរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ