លីកាដូចេញផ្សាយរបាយការណ៍ទារុណកម្មនៅកម្ពុជា
អង្គការលីកាដូនៅថ្ងៃទី២៦ មិថុនាដែលជាទិវាអន្តរជាតិការពារជនរងគ្រោះនៃអំពើទារុណកម្ម បានចេញរបាយការណ៍មួយរបស់ខ្លួនបញ្ជាក់ថា អំពើទារុណកម្មនៅកម្ពុជាលើអ្នកទោសគឺមិនបានថយចុះនោះទេ។ ការវាយដំ ទាត់ ទះ ឬដាល់ជាដើម គឺត្រូវបានប្រើប្រាស់ជារឿយៗ ហើយកាំភ្លើង ដំបងឈើ ដំបងដែក និងដំបងឆក់ គឺជាឧបករណ៍សម្រាប់ធ្វើទារុណកម្ម។
ចុះផ្សាយនៅថ្ងៃ៖
ស្តាប់ - ០២:០៩
ការវាយដំ ទាត់ ទះ ឬដាល់ជារឿយៗរហូតដល់សន្លប់ និងហូឈាមដោយប្រើកាំភ្លើង និងដំបងឆក់ជាដើមនេះ គឺជាអំពើទារុណកម្មដែលអង្គកាលីកាដូបានលើកឡើងថា នៅតែបន្តកើតឡើងក្នុងពន្ធនាគាកម្ពុជា។ ក្នុងសេចក្តីថ្លែងការណ៍របស់ខ្លួនចំថ្ងៃទិវាអន្តរជាតិការពារជនរងគ្រោះនៃអំពើទារុណកម្ម អង្គកាលីកាដូបានបញ្ជាក់ថា មិនមានសញ្ញាណអំពើទារុណកម្មទៅលើអ្នកជាប់ពន្ធនាគារ និងជនសង្ស័យមិនមានការផ្លាស់ប្តូរជាក់ស្តែងនោះទេគួរឱ្យកត់សំគាល់នោះទេក្នុងរយៈពេលប៉ុន្មានឆ្នាំថ្មីៗមកនេះ។ ហើយអំពើនេះ បានប្រព្រឹត្តនៅពីរដំណាក់កាល គឺដំណាក់កាលចាប់ខ្លួន និងអំឡុងពេលបញ្ជូនទៅឃុំខ្លួនទៅកាន់ពន្ធនាគារ។ បើតាមរបាយការណ៍របស់លីកាដូ ជនរងគ្រោះមានទាំងពីស្ត្រី និងអនិតិជន។
លោក អំ សំអាតអ្នកសម្របសម្រួលបច្ចេកទេសស៊ើបអង្កេតនៃអង្គការ លីកាដូ បានបញ្ជាក់ថា របាយការណ៍នេះ គឺដើម្បីក្រើនរម្លឹកទៅដល់រដ្ឋាភិបាលកម្ពុជាក្នុងខណៈដែលអំពើទារុណកម្មនៅតែបន្តកើតមានជាដដែល។ សូមបញ្ជាក់ថា កម្ពុជាកាលពីឆ្នាំ២០០៧ បានផ្តល់សច្ចានុម័តរបស់អង្គការសហប្រជាជាតិ ដើម្បីទប់ស្កាត់ អំពើទារុណកម្ម និងអំពើឃោរឃៅផ្សេងទៀត។ បើតាមលោក អំ សំអាតដដែល ចម្លើយរបស់ជនសង្ស័យណាមួយដែលកើតឡើងចេញពីការធ្វើទារុណកម្មនោះ គឺមិនត្រូវចាត់ទុកជាជាចម្លើយសម្រាប់ដាក់បន្ទុកនោះទេ។
ជាការឆ្លើយតប លោក គុយ ប៊ុនសន អគ្គនាយកដ្ឋានពន្ធនាគានៃក្រសួងមហាផ្ទៃ បានឆ្លើយយ៉ាងខ្លីថា របាយការណ៍របស់លីការដូមិនពិតនោះទេ។ ហើយអ្នកជាប់ពន្ធនាគាទាំងជាង១ម៉ឺននាក់ ទទួលបានអាហារសេវាការពារគ្រប់គ្រាន់។ សូមរម្លឹកជូនថា តាមរបាយការណ៍របស់លីកាដូ តាំងពីឆ្នាំ២០០៨មក មានអំពើទារុណកម្មចំនួន៨០០ករណី។ ហើយក្នុងរយៈពេល៥ខែដើមឆ្នាំ២០១៤នេះ មានអំពើទារុណកម្មចំនួន ៤៩ករណីហើយដែលត្រូវបានរកឃើញ។
ដូចនេះលោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការ លីកាដូបានស្នើឱ្យរដ្ឋាភិបាលកម្ពុជា គួរបង្កើតមជ្ឈមណ្ឌលសុវត្ថិភាព ការព្យាបាល និងស្ថានិតិសម្បទារបស់អ្នកទោសដែលត្រូវបានធ្វើទារុណកម្ម។ ហើយណែនាំជាដាច់ខាតដល់មន្ត្រីពន្ធនាគាកុំឱ្យប្រើប្រាស់អំពើទារុណកម្ម និងមិនត្រូវចាត់ទុកថា ចម្លើយដែលចេញពីការសារភាពគឺជាចម្លើយដាក់បន្ទុកសំខាន់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ