គណៈកម្មាធិការជាតិអូឡាំពិកកម្ពុជា ត្រៀមរៀបចំទស្សនាវើលខាប់រួមគ្នា នៅថ្ងៃផ្តាច់ព្រ័ត្រ
គណៈកម្មាធិការជាតិអូឡាំពិកកម្ពុជា នឹងរៀបចំឲ្យមានការទស្សនារួមគ្នាមួយនៃការប្រកួតកីឡាបាល់ទាត់ដណ្តើមពានរង្វាន់ពិភពលោក (World Cup) នៅវគ្គផ្តាច់ព្រ័ត្រខាងមុខនេះ ខណៈដែលសហព័ន្ធកីឡាបាល់ទាត់កម្ពុជា មិនបានធ្វើសកម្មភាពអ្វីនោះទេ។ សហព័ន្ធកីឡាទាំងអស់ នឹងត្រូវអញ្ជើញឲ្យចូលរួមទស្សនា ហើយអ្នកសារព័ត៌មានក៏នឹងអញ្ជើញឲ្យចូលរួមផងដែរ។
ចុះផ្សាយនៅថ្ងៃ៖
ស្តាប់ - ០១:៥០
នៅក្នុងអំឡុងពេលដែលប្រជាពលរដ្ឋនៅលើពិភពលោក រួមទាំងប្រជាពលរដ្ឋកម្ពុជាមួយចំនួនផង កំពុងផ្តោតអារម្មណ៍ទៅលើការតាមដានការប្រកួតកីឡាបាល់ទាត់ពិភពលោកនៅឯប្រទេសប្រេស៊ីលនោះ នៅកម្ពុជាឯណេះវិញ គណៈកម្មាធិការជាតិអូឡាំពិកកម្ពុជា ក៏ត្រៀមរៀបចំអោយមានកម្មវិធីមួយចំនួនផងដែរ។
ក្នុងនោះគណៈកម្មាធិការជាតិអូឡាំពិកកម្ពុជានឹងត្រៀមរៀបចំអោយមានការទស្សនារួមគ្នាមួយនៃការប្រកួតនេះ នៅថ្ងៃផ្តាច់ព្រ័ត្រ។ ការទស្សនានឹងធ្វើឡើងតាមរយៈផ្ទាំងសំពត់សរ ដោយមានការចូលរួមពីសហព័ន្ធកីឡាទាំងអស់នៅកម្ពុជា ហើយអ្នកសារព័ត៌មានក៍ត្រូវបានអញ្ជើញអោយចូលរួមផងដែរ។ នេះបើតាមការបញ្ជាក់ពីលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា។ ប៉ុន្តែលោកបានបញ្ជាក់ថា ពេលម៉ោងខុសគ្នានៃការប្រកួតនៅប្រទេសប្រេស៊ីល និងប្រទេសកម្ពុជា វាអាចជាឧបសគ្គសំរាប់អ្នកចង់ចូលរួមទស្សនា។
ក្នុងនាមជាស្ថាប័ណគ្រប់គ្រងកីឡានៅកម្ពុជា គណៈកម្មាធិការជាតិអូឡាំពិកកម្ពុជា ក៍បានបញ្ជូនបេសកជនមួយរូប គឺលោក ខេន ហ្គាដាហ្វី ទីប្រឹក្សាគណៈកម្មាធិការជាតិអូឡាំពិកកម្ពុជា ទៅកាន់ប្រទេសប្រេស៊ីល ដើម្បីដកស្រង់បទពិសោធន៍ពីព្រឹត្តិការណ៍នេះ រួមទាំងការបន្តផ្តល់ព័ត៌មានជុំវិញលទ្ធផលនៃការប្រកួតតាមរយៈបណ្តាញផ្សព្វផ្សាយព័ត៌មានរបស់គណៈកម្មាធិការជាតិអូឡាំពិកកម្ពុជា។
ចំណែកឯសហព័ន្ធកីឡាបាល់ទាត់កម្ពុជា មិនបានរៀបចំសកម្មភាពអ្វី គួរអោយចាប់អារម្មណ៍នោះទេ ប៉ុន្តែលោក គល់ សុផាន់ណា អគ្គលេខាធិការសហព័ន្ធកីឡាបាល់ទាត់កម្ពុជា បានអំពាវនាវអោយកីឡាករកម្ពុជាគួរដកស្រង់បទពិសោធន៍និងបច្ចេកទេសល្អៗ ដើម្បី ពង្រឹងសមត្ថភាពរបស់ខ្លួនផងដែរ។
សូមបញ្ជាក់ថា ការប្រកួតកីឡាបាល់ទាត់ពិភពលោកនៅប្រេស៊ីល កំពុងប្រកួតជំរុះក្នុងពូលនីមួយៗ ដោយមានក្រុមកីឡាបាល់ទាត់ជំរើសជាតិ៣២ក្រុមចូលរួម ហើយការប្រកួតផ្តាច់ព្រ័ត្រ នឹងធ្វើឡើងនៅថ្ងៃទី១៤ ខែកក្កដាខាងមុខនេះ នាវេលាម៉ោង២ទៀបភ្លឺ ម៉ោងនៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ