ការដោះស្រាយញត្តិតវ៉ារបស់ក្រុមបាតុករត្រូវបង្វែរពីស្ថានទូតវៀតណាម ទៅតាមផ្លូវការបរទេសវិញ
ក្រុមបាតុករដែលរួមមានព្រះសង្ឃ សមាគមខ្មែរកម្ពុជាក្រោម និង សហព័ន្ធ និស្សិត បញ្ញវន្តកម្ពុជាយល់ព្រមប្រកាសរំសាយនៅរសៀល ថ្ងៃអង្គារនេះ ពីមុខស្ថានទូត វៀតណាម បន្ទាប់ពីតំណាងសាលារាជធានីភ្នំពេញទទួលយកញត្តិ តវ៉ារបស់ពួកគេ ដើម្បីបន្តចំណាត់ការតាមរយៈក្រសួងការបរទេសនៃប្រទេសទាំងពីរ។ មេដឹកនាំចលនាបាតុកម្ម ឲ្យដឹងថា ពួកគេអាចទទួលយកបានចំពោះកិច្ចអន្តរាគមន៍របស់អាជ្ញាធរក្រុង បន្ទាប់ពីមានកិច្ចប្រជុំមួយកាលពីព្រឹកមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ក្រុមបាតុករប្រមាណជា៥០០នាក់ មកពីសហព័ន្ធនិស្សិតបញ្ញវន្តកម្ពុជា អង្គការសមាគមខ្មែរកម្ពុជាក្រោម និងប្រជាពលរដ្ឋដទៃទៀត បានបន្តការតវ៉ារបស់ពួកគេឈានចូលដល់ថ្ងៃទីពីរ
ហើយនៅថ្ងៃអង្គារនេះ ដើម្បីឲ្យតំណាងស្ថានទូតវៀតណាមនៅកម្ពុជា ទទួលញតិ្តរបស់ពួកគេ និងស្នើសុំឲ្យអ្នកនាំពាក្យស្ថានទូតក្រុងហាណូយ ធ្វើការសុំទោសជាសាធារណៈចំពោះការលើកឡើងរបស់ខ្លួនថា ទឹកដីកម្ពុជាក្រោមជារបស់ប្រទេសវៀតណាមតាំងពីយូរយារណាស់មកហើយ។
លោក ម៉ៅ ពិសេស ប្រធានសហព័ន្ធនិស្សិតបញ្ញវន្តកម្ពុជាថ្លែងបន្ទាប់ពីជួបប្រជុំជាមួយតំណាងសាលារាជធានីភ្នំពេញនៅថ្ងៃនេះថា ក្រុមអ្នកតវ៉ាយល់ព្រមបន្ទន់ឥរិយាបថ តាមសំណើរបស់សាលារាជធានីភ្នំពេញ ដែលសុខចិត្ត ទៅទទួលយកញតិ្តពីដៃបាតុករនៅមុខស្ថានទូតវៀតណាម ហើយបញ្ជូនទៅកាន់ក្រសួងការបរទេសកម្ពុជា ដើម្បីឲ្យក្រសួងការបរទេសកម្ពុជាផ្ញើកំណត់ហេតុនៃការទាមទារនេះទៅកាន់ក្រសួងការបរទេសវៀតណាមជាចុងក្រោយ។
ការទទួលញតិ្តនឹងត្រូវធ្វើឡើងនៅវេលាថ្ងៃត្រង់ថ្ងៃនេះដោយមន្ត្រីសាលាក្រុង ហើយបាតុករ
នឹងត្រូវប្រកាសរំសាយភា្លមៗ បន្ទាប់ពីការទាមទាររបស់ពួកគេត្រូវបានសន្យាដោយមន្ត្រីផ្លូវការ។
កាលពីថ្ងៃចន្ទម្សិលមិញ ក្រុមអ្នកតវ៉ាជាច្រើនពាន់នាក់បានដង្ហែក្បួនដាក់ញត្តិតាមស្ថានទូត
បរទេសមួយចំនួនរួមមាន ស្ថានទូតបារាំង អង់គ្លេស សហភាពអឺរ៉ុប រុស្សី ចិនប្រជាមានិត និងស្ថានទូតវៀតណាមចុងក្រោយគេ។ ក៏ប៉ុន្តែ ស្ថានទូតវៀតណាមបដិសេធមិនទទួលញតិ្តរបស់ក្រុមបាតុករឡើយ។ មន្ត្រីស្ថានទូតវៀតណាមបានបង្វែរការដាក់ញ្ញតិនេះទៅសាលា
រាជធានីភ្នំពេញវិញ។
អ្នកនាំពាក្យសាលារាជធានីភ្នំពេញលោក ឡុង ឌីម៉ង់ កាលពីម្សិលមិញដែរ បានបញ្ជាក់ពីភាពមិនសមរម្យចំពោះការដែលអ្នកតវ៉ាត្រូវដាក់ញតិ្តនៅទីនោះ ដោយសារសាលាក្រុងមិនមែនជាសាខាស្ថានទូតវៀតណាមនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ