ប្រមុខរដ្ឋាភិបាលកម្ពុជាផ្តើមទស្សនកិច្ចនៅចិនចំពេលចិន និងវៀតណាមកំពុងមានជម្លោះ
តបតាមការអញ្ជើញរបស់លោក ស៊ី ជិនពីង ប្រធានាធិបតីចិន ប្រមុខរដ្ឋាភិបាលកម្ពុជា លោកនាយករដ្ឋមន្ត្រីហ៊ុន សែន នៅព្រឹកថ្ងៃទី ១៨ ឧសភានេះបានដឹកនាំមន្ត្រីជាន់ខ្ពស់មួយក្រុមចាកចេញពីប្រទេសកម្ពុជាអញ្ជើញទៅចូលរួមកិច្ចប្រជុំកំពូលលើកទី៤ នៃសន្និសីទអន្តរសកម្មភាពនិងវិធានការកសាងទំនុកចិត្តនៅអាស៊ីនៅក្នុងទីក្រុងសៀងហៃ ប្រទេសចិន។ក្រៅពីចូលរួមកិច្ចប្រជុំកំពូលរយៈពេលពីរថ្ងៃនេះ លោក ហ៊ុន សែន ក៏មានជំនួបទ្វេភាគីជាមួយលោកស៊ី ជិនពីង ផងដែរ។ ជាការកត់សម្គាល់ការអញ្ជើញទៅធ្វើទស្សនកិច្ចរបស់នាយករដ្ឋមន្ត្រីកម្ពុជានៅចិននៅពេលនេះ គឺស្របពេលដែលមហាយក្សចិន និង វៀតណាមកំពុងមានជម្លោះនឹងគ្នាយ៉ាងខ្លាំងក្លានៅសមុទ្រចិនខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
លោកនាយករដ្ឋមន្ត្រី ហ៊ុន សែន និង គណៈប្រតិភូជាន់ខ្ពស់មួយក្រុមបានចាកចេញពីប្រទេសកម្ពុជាហើយកាលពីព្រឹកថ្ងៃអាទិត្យនេះ ដើម្បីទៅចូលរួមកិច្ចប្រជុំកំពូលលើកទី៤ នៃសន្និសីទអន្តរសកម្មភាព និងវិធានការកសាងទំនុកចិត្តនៅអាស៊ី ដែលនឹងធ្វើឡើងចាប់ពីថ្ងៃទី ២០ ដល់ថ្ងៃទី ២១ ឧសភា នៅក្នុងទីក្រុងសៀងហៃ ប្រទេសចិន។
គណៈប្រតិភូអមដំណើរលោក ហ៊ុន សែន រួមមាន លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និង សហប្រតិបត្តិការអន្តរជាតិ លោក ជា សុផារ៉ា រដ្ឋមន្ត្រីក្រសួងអភិវឌ្ឃន៍ជនបទ រដ្ឋមន្ត្រីអមនាយករដ្ឋមន្ត្រី បី រូប និង សមាជិកមួយចំនួនទៀតនៃរាជរដ្ឋាភិបាលកម្ពុជា។
ថ្លែងប្រាប់អ្នកកាសែតនៅព្រលានយន្តហោះអន្តរជាតិភ្នំពេញ លោក ស្រ៊ី ថាមរុង្គ រដ្ឋមន្ត្រីអមនាយករដ្ឋមន្ត្រីបានឲ្យដឹងថា ប្រធានបទនៃកិច្ចប្រជុំនេះគឺការពង្រឹងកិច្ចសន្ទនា ទំនុកចិត្ត និង ការសម្របសម្រួលរួមគ្នាកសាងតំបន់អាស៊ីថ្មីមួយដោយមានសន្តិភាព ស្ថិរភាព និងកិច្ចសហប្រតិបត្តិការ។
បើតាមលោកស្រ៊ី ថាមរុង្គ មានប្រមុខរដ្ឋ ប្រមុខរដ្ឋាភិបាលមកពីប្រទេសចំនួន៤៦ដែលនៅតំបន់អាស៊ី មជ្ឈិមបូព៌ា និងអគ្គលេខាធិការអង្គការសហប្រជាជាតិ លោក បាន គីមួនផងដែរចូលរូមក្នុងកិច្ចប្រជុំនេះ។
លោក ស្រ៊ី ថាមរុង្គ បានបញ្ជាក់ឲ្យដឹងដែរថា លោក ហ៊ុន សែន ក៏នឹងមានជំនួបទ្វេភាគីជាមួយនឹងលោក ស៊ី ជិនពីង និងមន្ត្រីជាន់ខ្ពស់ផ្សេងទៀតរបស់សាធារណរដ្ឋប្រជាមានិតចិនផងដែរ ហើយកិច្ចជំនួបទ្វេភាគីនោះ នឹងផ្តោតលើកិច្ចសហប្រតិបត្តិ ការរវាងប្រទេសកម្ពុជា និងប្រទេសចិន។
លោក ហ៊ុន សែន បានធ្វើដំណើរចាកចេញពីប្រទេសកម្ពុជាទៅកាន់ប្រទេសចិននាពេលនេះគឺចំពេលដែលកម្ពុជាកំពុងរៀបចំការបោះឆ្នោតក្រុមប្រឹក្សារាជធានី ខេត្តក្រុង ស្រុកខណ្ឌ អាណត្តីទី២។ ហើយ អ្វីដែលរឹតតែគួរកត់សម្គាល់ជាងនេះទៀតនោះ គឺ ដំណើរទស្សនកិច្ចទៅកាន់មហាយក្សអាស៊ីមុនកិច្ចប្រជុំពីរថ្ងៃនេះ គឺបានធ្វើឡើងស្របដែលចិន និងវៀតណាមកំពុងមានជម្លោះនឹងគ្នាយ៉ាងខ្លាំងនៅសមុទ្រចិនខាងត្បូង។ ជាជម្លោះដែលបញ្ឆេះឲ្យប្រជាជនវៀតណាមនាំគ្នាធ្វើបាតុកម្មប្រឆាំងចិនស្ទើរនៅពាសពេញប្រទេស និង បង្កឲ្យមានកម្មករចិនស្លាប់ និងរងរបូសជាច្រើននាក់។
ជាមួយគ្នានេះប្រជាជនចិននៅវៀតណាមជាច្រើនរយនាក់បានភៀសខ្លួនមកកាន់ប្រទេសកម្ពុជាដើម្បីសុវត្ថិភាព។ កាលពីថ្ងៃសុក្រ សបា្តហ៍នេះ ក្រសួងការបរទេសកម្ពុជា បានទទួលកំណត់ទូតមួយច្បាប់ ពីក្រសួងការបរទេសចិន ដែលបានស្នើឲ្យកម្ពុជា ជួយសម្រួល និងរក្សាសុវត្ថិភាពជនជាតិចិន ដែលបានភៀសខ្លួនពីប្រទេសវៀតណាមចូលមកកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ