កម្ពុជាដាក់កំណត់ទូតតវ៉ារឿងថៃបាញ់ពលរដ្ឋខ្មែរតាមព្រំដែន
ក្រសួងការបរទេសកម្ពុជា បានផ្ញើកំណត់ទូតជាផ្លូវការមួយផ្សេងទៀតទៅកាន់រដ្ឋាភិបាលថៃ នៅថ្ងៃទី៤ខែឧសភានេះ ដើម្បីប្រឆាំងនឹងសកម្មភាពអមនុស្សធម៌របស់ទាហានថៃដែលបានបាញ់សម្លាប់ពលរដ្ឋកម្ពុជាឆ្លងដែនចូលទឹកដីថៃ។ ចាប់ពីខែមករា មានពលរដ្ឋកម្ពុជា ១០ នាក់ត្រូវបានថៃបាញ់សម្លាប់នៅជាយដែន។ ក៏ប៉ុន្តែរដ្ឋាភិបាលកម្ពុជា បានបញ្ជាក់ជាថ្មី ដោយទទូចឲ្យអាជ្ញាធរថៃ ចាត់វិធានការឲ្យសមរម្យ ដើម្បីការពារកុំឲ្យមានសកម្មភាពអមនុស្សធម៌ បាញ់សម្លាប់ក្រៅច្បាប់ លើអ្នកភូមិកម្ពុជា តទៅទៀត
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ករណីទាហានថៃ បាញ់សម្លាប់ពលរដ្ឋកម្ពុជា ដែលបានឆ្លងកាត់ព្រំដែន ចូលទៅធ្វើការនៅខេត្តស្រះកែវ ប្រទេសថៃ កាលពីថ្ងៃទី២ឧសភា ឆ្នាំ២០១២ ត្រូវបានក្រសួងការបរទេសកម្ពុជា បានសរសេរកំណត់ទូត ជាលិខិត លាយលក្ខណ៍អក្សរ តវ៉ាទៅកាន់រដ្ឋាភិបាលថៃ។ ករណីចុងក្រោយនោះ គឺពលរដ្ឋកម្ពុជា លោក សំ រៀម អាយុ ៣១ឆ្នាំ ត្រូវទាហានថៃ បាញ់សម្លាប់ ដូច ៥ ករណីផ្សេងទៀត ដែលបានកើតឡើង ចាប់តាំងពីខែមករា។
កំណត់ទូតចុះថ្ងៃ៤ឧសភា បង្ហាញថា អំពើបាញ់ប្រហាររបស់កងទាហានការពារព្រំដែនថៃមកលើពលរដ្ឋកម្ពុជា នៅតែបន្តដោយសកម្មភាពចេតនា អមនុស្សធម៌ និងឃោរឃៅ ព្រៃផ្សៃ ដែលរំលោភបំពានទៅលើស្មារតីនៃកិច្ចប្រជុំសហប្រតិបត្តិការទ្វេភាគី រវាងកម្ពុជា-ថៃ កាលពីឆ្នាំ២០០៩។ ការបាញ់ប្រហារពលរដ្ឋកម្ពុជា ក៏បំពានគោលការណ៍មនុស្សធម៌ដែលទទួលស្គាល់ដោយអន្តរជាតិ។
ដោយថ្កោលទោសទាហានថៃ ដែលបានបាញ់សម្លាប់ពលរដ្ឋខ្មែរ នៅតាមជាយដែន ក្រសួងការបរទេសកម្ពុជា បានទទូចឲ្យរដ្ឋាភិបាលថៃពិចារណាឡើងវិញចាត់វិធានការឲ្យសមរម្យដើម្បីការពារកុំឲ្យមានសកម្មភាពអមនុស្សធម៌ បាញ់សម្លាប់ក្រៅច្បាប់ លើអ្នកភូមិកម្ពុជាបន្តទៀត។
អ្នកនាំពាក្យក្រសួងការបរទេស លោក កុយ គួង បានលើកឡើងថា កម្ពុជាតែងតែធ្វើកំណត់ទូតតវ៉ា ទាមទារឲ្យថៃ ចាប់ពលរដ្ឋកម្ពុជា ដែលឆ្លងដែនខុសច្បាប់ យកទៅផ្តន្ទាទោសតាមច្បាប់ ដោយថៃមិនត្រូវកាត់ទោសពលរដ្ឋកម្ពុជា តាមរយៈការបាញ់ប្រហារដូច្នេះទេ។
ចាប់ពីខែមករា មកដល់ពេលនេះ ក្រសួងការបរទេសកម្ពុជាបានកត់ត្រាថា មានពលរដ្ឋកម្ពុជា ១០ នាក់ ត្រូវបានថៃបាញ់សម្លាប់ ពេលឆ្លងដែនខុសច្បាប់ ចូលទឹកដីថៃ ខណៈដែលកាលពីឆ្នាំ២០១១ មាន ១២ នាក់។
កន្លងមក រដ្ឋាភិបាលថៃ បានឆ្លើយតបនឹងកំណត់ទូតកម្ពុជាថា ពលរដ្ឋកម្ពុជា បានឆ្លងដែនខុសច្បាប់ ចូលទឹកដីថៃ ពិសេសបានចូលលួចកាប់ឈើតាមតំបន់ជាយដែន។ ម្យ៉ាងទៀត ថៃលើកឡើងថា ពលរដ្ឋខ្មែរឆ្លងដែនទាំងនោះ សុទ្ធតែមានកាំភ្លើង។
អាជ្ញាធរកម្ពុជា និងថៃ តាមព្រំដែន បានព្រមពៀងជួបគ្នា ដើម្បីរកដំណោះស្រាយ រកវិធីបញ្ចប់ការបាញ់សម្លាប់ប្រជាពលរដ្ឋខ្មែរ។ នៅរសៀលថ្ងៃ៤ឧសភានេះ កិច្ចប្រជុំ ត្រូវបានធ្វើឡើង នៅទឹកដីរវាងអាជ្ញាធរខេត្តបន្ទាយមានជ័យ និងខេត្តស្រះកែវ នៅក្នុងប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ