ការនាំចេញអង្កររបស់កម្ពុជា ក្នុងខែមករាឆ្នាំ២០១៤ ធ្លាក់ចុះ បើធៀបនឹងរយៈពេលដូចគ្នា ក្នុងឆ្នាំកន្លងទៅ
កម្ពុជានាំចេញអង្ករជាង២ម៉ឺន១ពាន់តោន ក្នុងខែមករា ដើមឆ្នាំ២០១៤។ នេះបើតាមទិន្នន័យពីគេហទំព័រអូរីហ្សា ដែលជាបណ្ដាញស្ថាប័ននាំចេញ-នាំចូលអង្ករ។ ចំនួននេះ ធ្លាក់ចុះបន្តិច បើធៀបទៅនឹងរយៈពេលដូចគ្នាក្នុងឆ្នាំ២០១៣។ ប៉ុន្តែនេះមិនមែនជាក្ដីបារម្ភឡើយ ព្រោះថា តាមបទពិសោធនាំចេញជារៀងរាល់ឆ្នាំ ការនាំចេញក្នុងខែទី១ដើមឆ្នាំមានចំនួនតិច ហើយនឹងកើនឡើងនៅខែបន្តបន្ទាប់។ ប្រទេសថៃ ដែលកម្ពុជានាំអង្ករចេញលំដាប់ទី៦ នៅឆ្នាំ២០១៣ ឥឡូវនេះ មិនបានជាប់ចំណាត់ថ្នាក់នៅក្នុងបញ្ជីប្រទេសទាំង៣២ ដែលកម្ពុជានាំអង្ករចេញទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
អង្ករជាង២ម៉ឺន១ពាន់តោន ដែលកម្ពុជានាំចេញក្នុងខែមករា ដើមឆ្នាំ២០១៤នេះ ជិតពាក់កណ្ដាល ជាអង្ករផ្កាម្លិះ។ ចំនួននេះ បានធ្លាក់ចុះបន្តិចបន្តួច បើធៀបទៅនឹងការនាំចេញក្នុងខែមករា ឆ្នាំ២០១៣កន្លងទៅ ដែលកាលណោះ ការនាំចេញប្រចាំខែ ជាមធ្យមមានចំនួន៣ម៉ឺន១ពាន់តោន។ នេះបើតាមទិន្នន័យពីគេហទំព័រអូរីហ្សា ដែលជាបណ្ដាញស្ថាប័ននាំចេញ-នាំចូលអង្ករ។
បើតាមអូរីហ្សា ជារៀងរាល់ឆ្នាំ ការនាំចេញអង្កររបស់កម្ពុជា ក្នុងខែទី១ជារៀងរាល់ឆ្នាំ មានចំនួនតិច ហើយនឹងកើនឡើងនៅខែបន្តបន្ទាប់។ ដូច្នេះ ការនាំចេញតិចក្នុងខែមករាដើមឆ្នាំ មិនមែនជារឿងគួរឲ្យបារម្ភទេ។
ក្នុងខែមករាកន្លងទៅនេះ កម្ពុជា បាននាំចេញអង្ករទៅកាន់ប្រទេសចំនួន៣២ ក្នុងនោះប្រទេសដែលនៅលំដាប់លើគេ មានដូចជាប្រទេសបារាំង ប៉ូឡូញ ម៉ាឡេស៊ី ហ្គាបុង ហូឡង់ និងចក្រភពអង់គ្លេស។ ប្រទេសថៃ ដែលកម្ពុជានាំអង្ករចេញលំដាប់ទី៦ នៅឆ្នាំ២០១៣ ឥឡូវនេះ មិនបានជាប់ចំណាត់ថ្នាក់នៅក្នុងបញ្ជីប្រទេសទាំង៣២ ដែលកម្ពុជានាំអង្ករចេញទេ។ មូលហេតុគឺដោយសារតែស្តុកអង្ករក្នុងស្រុករបស់ថៃ មានបរិមាណច្រើនលើសលប់។
កាលពីឆ្នាំ២០១៣ កម្ពុជានាំចេញអង្ករបានជាង៣៧ម៉ឺន៨ពាន់តោន កើនឡើងប្រមាណ៨៤ភាគរយ លើសឆ្នាំ២០១២។ ប្រទេសថៃ ម៉ាឡេស៊ី និងបណ្ដាប្រទេសនៅអឺរ៉ុប ជាគោលដៅនាំចេញអង្ករសំខាន់របស់កម្ពុជា។ កាលពីចុងខែមករាកន្លងទៅថ្មីៗនេះ បើតាមគេហទំព័រអូរីហ្សា រដ្ឋាភិបាលប្រទេសអ៊ីតាលី ដែលជាប្រទេសផលិតអង្ករធំជាងគេនៅអឺរ៉ុប បានស្នើឲ្យសហភាពអឺរ៉ុប បញ្ឈប់ការផ្ដល់ការអនុគ្រោះពន្ធលើការនាំចូលអង្ករ ពីកម្ពុជា និងមីយ៉ាន់ម៉ា ដោយលើកហេតុផលថា គោលនយោបាយអនុគ្រោះពន្ធលើការនាំចូលអង្ករនេះ ធ្វើឲ្យប៉ះពាល់ធ្ងន់ធ្ងរដល់ការផលិតអង្កររបស់អឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ