គណៈកម្មការមូលបត្រកម្ពុជាដាស់តឿនសាធារណជនប្រយ័ត្នចាញ់បោកការវិនិយោគជាលក្ខណៈបណ្តាញតៗគ្នា
គណៈកម្មការមូលបត្រកម្ពុជាបានដាស់តឿនដល់សាធារណជនឲ្យមានការប្រុងប្រយ័ត្នខ្ពស់ក្នុងការដាក់ប្រាក់វិនិយោគក្នុងគម្រោងវិនិយោគរបស់ក្រុមហ៊ុនដែលធ្វើសកម្មភាពអាជីវកម្មមានលក្ខណៈជាគម្រោងវិនិយោគរួម ឫអាជីវកម្មដែលធ្វើការប្រមូលប្រាក់វិនិយោគពីសាធារណជនជាលក្ខណៈបណ្តាញតៗគ្នា។ការអំពាវនាវនេះបានធ្វើឡើងស្របពេលដែលប្រភេទក្រុមហ៊ុនទាំងនេះបាននិងកំពុងទាក់ទាញសាធារណជនយ៉ាងសន្ធឹកសន្ធាប់នៅក្នុងប្រទេសកម្ពុជា និង បន្ទាប់ពីក្រុមហ៊ុនTelexFree ដែលធ្វើការប្រមូលប្រាក់ពីសាធារណជនជាលក្ខណៈបណ្តាញតៗគ្នាកំពុងត្រូវបានគណៈកម្មការមូលបត្រសហរដ្ឋអាមេរិកធ្វើការស៊ើបអង្កេតករណីឆបោកប្រាក់ពីសាធារណជន។ គណៈកម្មការមូលបត្រកម្ពុជាអះអាងថា ខ្លួនកំពុងស៊ើបអង្កេតលើប្រភេទក្រុមហ៊ុនទាំងនោះ និងចាត់វិធានការតាមផ្លូវច្បាប់ប្រសិនបើទទួលបានព័ត៌មានច្បាស់លាស់។
ចុះផ្សាយនៅថ្ងៃ៖
ស្តាប់ - ០២:២៧
នៅក្នុងសេចក្តីជូនដំណឹងរបស់ខ្លួនកាលពីថ្ងៃទី ២៤ មេសា គណៈកម្មការមូលបត្រកម្ពុជាបានអំពាវនាវដល់សាធារណជនឲ្យមានការប្រុងប្រយ័ត្នខ្ពស់ក្នុងដាក់ប្រាក់វិនិយោគជាមួយក្រុមហ៊ុនធ្វើអាជីវកម្មជាលក្ខណៈរួម និង ប្រមូលប្រាក់វិនិយោគជាលក្ខណៈបណ្តាញតៗគ្នា។
លោក សៀង ធីរិទ្ធ ប្រធាននាយកដ្ឋានកិច្ចការគតិយុត្តិនៃគណៈកម្មការមូលបត្រកម្ពុជាបានឲ្យដឹងថា បច្ចុប្បន្នមានប្រជាពលរដ្ឋខ្មែរមួយចំនួនបានចាញ់បោកធ្វើសកម្មភាពចូលរួមវិនិយោគបែបនេះ។បើតាមប្រធាននាយកដ្ឋានរូបនេះ ក្រុមហ៊ុនវិនិយោគរួម ឫជាបណ្តាញតៗគ្នាទាំងនេះមិនបានចុះបញ្ជីតាមផ្លូវច្បាប់ គ្មានឯកសារត្រឹមត្រូវ និង គ្មានទីស្នាក់ការនៅក្នុងប្រទេសកម្ពុជានោះឡើយ។
លោក សៀង ធីរិទ្ធបានបញ្ជាក់ថាគណៈកម្មការមូលបត្រកម្ពុជាបាន និងកំពុងធ្វើការស៊ើបអង្កេតលើបណ្តាក្រុមហ៊ុនទាំងនេះ ហើយប្រសិនបើប្រមូលបានព័ត៌មានពិតប្រាកដ ច្បាស់លាស់ និង គ្រប់គ្រាន់នោះ គណៈកម្មការមូលបត្រកម្ពុជានឹងចាត់វិធានការទៅតាមផ្លូវច្បាប់។ លោក សៀង ធីរិទ្ធបានរម្លឹកដល់ប្រជាពលរដ្ឋកម្ពុជាថា មុនធ្វើការវិនិយោគ គួរពិចារណាទៅលើក្រុមហ៊ុនណាដែលមានអាជ្ញាបណ្ណ ឫការអនុញ្ញាតត្រឹមត្រូវពីអាជ្ញាធរដើម្បីជៀសវាងការចាញ់បោកក្រុមហ៊ុនទាំងនោះ។
ការអំពាវនាវរបស់គណៈកម្មការមូលបត្រកម្ពុជានៅពេលនេះបានធ្វើឡើងក្រោយពេលដែលក្រុមហ៊ុន TelexFree ដែលធ្វើការប្រមូលប្រាក់ពីសាធារណជនជាលក្ខណៈបណ្តាញតៗគ្នាកំពុងត្រូវបានគណៈកម្មការមូលបត្រសហរដ្ឋអាមេរិកធ្វើការស៊ើបអង្កេតករណីឆបោកប្រាក់ពីសាធារណជនកាលពីសប្តាហ៍មុន។
គួរកត់សម្គាល់ថា នាពេលថ្មីៗនេះមានអង្គការ និង ក្រុមហ៊ុនមួយចំនួនបាន និងកំពុងផ្សព្វផ្សាយនៅរាជធានីភ្នំពេញ និងតាមបណ្តាខេត្តនានាដូចជា បាត់ដំបង បន្ទាយមានជ័យ សៀមរាប កំពង់ចាមជាដើម ព្រមទាំងបានប្រើប្រាស់ប្រព័ន្ធទាក់ទាញអតិថិជនជាលក្ខណៈបណ្តាញតៗគ្នាដើម្បីឲ្យសាធារណជនដាក់ប្រាប់វិនិយោគដោយផ្ទាល់ ឫបើកគណនីនៅធនាគារ ឫតាមអនឡាញនៅក្នុងវិនិយោគផ្សេងៗដូចជា គម្រោងវិនិយោគលើប្រេង ជួញដូរហាងឆេងរូបិយបណ្ណ ហាងឆេងមាស ដោយសន្យាផ្តល់ដល់អ្នកដាក់ប្រាក់វិនិយោគទាំងនោះនូវផលប្រយោជន៍ជាកម្រៃហិរញ្ញវត្ថុប្រចាំសប្តាហ៍ ឫប្រចាំខែក្នុងប្រាក់ចំណេញខ្ពស់ខុសពីធម្មតា។
គណៈកម្មការមូលបត្រកម្ពុជាបានបញ្ជាក់ឲ្យដឹងថា ខ្លួនមិនទាន់ផ្តល់ការអនុញ្ញាតឫអាជ្ញាបណ្ណឲ្យក្រុមហ៊ុនណាមួយធ្វើអាជីវកម្មប្រភេទនេះនៅឡើយទេដោយគណៈកម្មការមូលបត្រកម្ពុជាកំពុងសិក្សាលើហានិភ័យផ្សេងៗ និង រៀបចំក្របខណ្ឌច្បាប់លម្អិតឲ្យបានច្បាសលាស់ជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ