កម្ពុជា ក្រោម«យុទ្ធសាស្ត្រលួងលោម»របស់ថៃ
ចុះផ្សាយនៅថ្ងៃ៖
ស្តាប់ - ០៥:០១
បន្ទាប់ពីបានបំបាក់មុខកម្ពុជាយ៉ាងខ្លាំងតាមរយៈការចាប់បញ្ជូនពលករខ្មែរយ៉ាងគំហុកមកទម្លាក់ចោលនៅព្រំដែនដោយមិនបានជូនដំណឹងជាមុននោះ រដ្ឋាភិបាលយោធាក្រុងបាងកកបានប្រញាប់បញ្ជូនរដ្ឋមន្ត្រីស្តីទីក្រសួងការបរទេសរបស់ខ្លួនមកដល់កម្ពុជា។ ទស្សនកិច្ចនេះត្រូវគេមើលឃើញថាមានគោលដៅ«លួងលោម»ទីក្រុងភ្នំពេញដើម្បីលុបលាងកំហុសឆ្គងរបស់ខ្លួនផងនិងដើម្បីទាក់ទាញកម្ពុជាឲ្យប្រញាប់បញ្ជូនពលករទៅធ្វើការស្របច្បាប់ក្នុងប្រទេសថៃវិញផង។ ក្រោម«យុទ្ធសាស្ត្រលួងលោម»នេះ ទីក្រុងបាងកកទំនងជាទទួលផលហួសពីការរំពឹងទុក ខណៈដែលទីក្រុងភ្នំពេញវិញទំនងជារំពឹងការឆ្លើយតបជាវិជ្ជមានដូចគ្នាពីភាគីថៃ។
ទស្សនកិច្ចរបស់រដ្ឋមន្ត្រីស្តីទីក្រសួងការបរទេសថៃលោក ស៊ីហាសាក់ ភួងកេតកែវ (SihasakPhuangketkoew) នៅកម្ពុជាមិនមែនជារឿងចៃដន្យទេ។ មិនចៃដន្យពីព្រោះថាទស្សនកិច្ចនេះធ្វើឡើងភ្លាមៗក្រោយពីរបបសឹកទីក្រុងបាងកកបានចាប់បញ្ជូនពលករខ្មែរយ៉ាងគំហុកមកកម្ពុជាវិញដោយមិនបានប្រាប់ជាមុន។ ព្រឹត្តិការណ៍នេះមិនគ្រាន់តែជាការបំបាក់មុខកម្ពុជាដែលជាប្រទេសជិតខាងប៉ុណ្ណោះទេ ប៉ុន្តែ ក៏បានទទួលការរិះគន់ពីគ្រប់មជ្ឈដ្ឋានផងដែរ។
ម្យ៉ាងទៀត ចំណាត់ការដ៏តក់ក្រហល់របស់រដ្ឋាភិបាលយោធាទីក្រុងបាងកកក៏បានធ្វើឲ្យប៉ះពាល់ធ្ងន់ធ្ងរដល់សេដ្ឋកិច្ចរបស់ប្រទេសខ្លួនឯងផងដែរ។ សូមកុំភ្លេចថារោងចក្រ សហគ្រាស សិប្បកម្ម និងកសិដ្ឋានជាច្រើនរបស់ថៃស្ទើរតែដំណើរការលែងកើតបន្ទាប់ពីពលកររាប់សិបម៉ឺននាក់ដែលបម្រើការក្នុងវិស័យទាំងនោះត្រូវបានចាប់បញ្ជូនឲ្យត្រឡប់ទៅប្រទេសកំណើតវិញដោយមិនបានប្រាប់ដំណឹងមុន។ ប្រឈមមុខនឹងស្ថានការណ៍បែបនេះ ទីក្រុងបាងកកប្រាកដជាមិនអាចឈរស្ងៀមបានទេ។
ដូច្នេះ វត្តមានរបស់មន្ត្រីជាន់ខ្ពស់ការបរទេសថៃនៅកម្ពុជាពេលនេះត្រូវគេមើលឃើញថាស្ថិតនៅក្នុងក្របខ័ណ្ឌយុទ្ធសាស្ត្រ«លួងលោម»ដែលមានគោលដៅពីរទន្ទឹមគ្នាគឺដើម្បីលុបលាងអាកប្បកិរិយាមិនគប្បីរបស់ខ្លួនចំពោះកម្ពុជាផង និងដើម្បីទាក់ទាញទីក្រុងភ្នំពេញឲ្យប្រញាប់បញ្ជូនពលកររបស់ខ្លួនត្រឡប់ទៅធ្វើការនៅក្នុងប្រទេសថៃវិញផង។ ដើម្បីសម្រេចគោលដៅនេះ មន្ត្រីការទូតថៃបានប្រើការសន្យាជាមួយកម្ពុជាថានឹងជួយសម្រួលបញ្ហាមួយចំនួន៖ ការផ្តល់បែបបទស្របច្បាប់របស់ពលករខ្មែរ បញ្ឈប់ការបាញ់ប្រហារទៅលើពលករឆ្លងដែនខុសច្បាប់ទៅកាប់ឈើក្នុងទឹកដីថៃ និងការសន្យាអនុវត្តន៍កិច្ចព្រមព្រៀងស្តីពីបញ្ហាព្រះវិហារជាដើម។
គោលដៅទាំងពីររបស់ទីក្រុងបាងកកបានទទួលការឆ្លើយតបជាវិជ្ជមានពីព្រោះកម្ពុជាបានសម្តែងការយោគយល់ចំពោះថៃបើទោះជាប្រទេសជិតខាងមួយនេះបំបាក់មុខអំពីបញ្ហាពលករក៏ដោយ។ កម្ពុជាក៏បានយល់ព្រមបញ្ជូនពលកររបស់ខ្លួនត្រឡប់ទៅធ្វើការក្នុងទឹកដីថៃវិញដោយមិនមិនបង្អង់យូរ។ លើសពីនេះទៅទៀត គណៈប្រតិភូថៃក៏បានវិលត្រឡប់ទៅវិញជាមួយសកម្មជនអាវលឿងដ៏សំខាន់ម្នាក់របស់ខ្លួនគឺ វីរៈ ស៊ុមខ្វាមឃីត ដែលត្រូវបានដោះលែងចេញពីពន្ធនាគារកម្ពុជាយ៉ាងតក់ក្រហល់។
ជាការពិតណាស់ រដ្ឋាភិបាលកម្ពុជាតែងតែប្រកាន់ជំហរនយោបាយការទូតទន់ភ្លន់ជាមួយប្រទេសជិតខាង។ នេះជានយោបាយ«សន្តិភាពនិយម»មួយគួរឲ្យលើកទឹកចិត្តនិងការឆ្លើយតបវិញសមស្រប។ ប៉ុន្តែ នយោបាយការទូតទន់ភ្លន់របស់កម្ពុជាជាញឹកញាប់ត្រូវបានប្រទេសជិតខាងចាត់ទុកជាភាពទន់ជ្រាយងាយលួងលោមទៅវិញ។ ជាក់ស្តែង នៅចំពោះមុខបញ្ហាពលករ កម្ពុជាគួរតែឆ្លៀតពេលដែលថៃកំពុងត្រូវការពលករខ្មែរជាចាំបាច់ដើម្បីទាមទារមកវិញនូវការធានាខាងក្របខ័ណ្ឌគតិយុត្តិឲ្យបានច្បាស់លាស់ពីភាគីថៃទាក់ទងនឹងការគោរពសិទ្ធិពលករខ្មែរជាជាងការសន្យាដោយមាត់ទទេ។
ម្យ៉ាងទៀត ការដោះលែងអ្នកទោសថៃក៏គួរតែទទួលបានការសន្យាឲ្យបានច្បាស់លាស់ជាងនេះដែរអំពីជោគវាសនារបស់ពលករខ្មែរដែលថៃចាប់ខ្លួន។ សូមកុំភ្លេចថា នេះមិនមែនជាលើកទី១ទេដែលមន្ត្រីថៃបានសន្យាទាំងបញ្ហាពលករឆ្លងដែនខុសច្បាប់ទាំងបញ្ហាព្រះវិហារ។ ប៉ុន្តែ ពាក្យសន្យាទាំងនោះមិនត្រូវបានគោរពនោះទេ។ យ៉ាងណាក៏ដោយចុះ ឥឡូវនេះគណៈប្រតិភូក្រសួងការបរទេសថៃបានវិលត្រឡប់ទៅវិញហើយដោយនាំយកទៅជាមួយនូវជោគជ័យដែលទំនងជាហួសពីការរំពឹងទុកផងពីព្រោះយុទ្ធសាស្ត្រ«លួងលោម»របស់ថៃមិនត្រឹមតែទទួលលទ្ធផលជាទីគាប់ចិត្តប៉ុណ្ណោះទេ ប៉ុន្តែ គណៈប្រតិភូថៃក៏បានវិលត្រឡប់ជាមួយនឹងវត្តមានសមាជិកថ្មីម្នាក់ទៀតដែលអាចចាត់ទុកជាកាដូរបស់ទីក្រុងភ្នំពេញក៏ថាបាន។
ដូច្នេះ អំណឹះតទៅ អ្វីដែលកម្ពុជារំពឹងទុកមុនគេនោះគឺ ការដោះលែងពលករខ្មែរទាំង១៤នាក់ដែលកម្ពុជាបានស្នើសុំ។ បន្ទាប់មក អ្វីដែលសំខាន់ជាងនេះទៅទៀតនោះគឺ តើទាហានថៃពិតជាឈប់បាញ់ប្រហារទៅលើពលករខ្មែរឆ្លងដែនទៅកាប់ឈើក្នុងទឹកដីរបស់ខ្លួនទៀតដែរឬទេ? និងថាតើថៃពិតជាគោរពសេចក្តីសម្រេចរបស់តុលាការយុត្តិធម៌អន្តរជាតិទីក្រុងឡាអេស្តីពីបញ្ហាព្រះវិហារដូចការសន្យាមែនដែរឬទេ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ