កម្ពុជាបារម្ភថា ខ្លួនអាចក្លាយជាជនរងគ្រោះដោយសារវិបត្តិផ្ទៃក្នុងថៃទៀត
កម្ពុជានិងថៃមិនទាន់បានសម្រេចគ្នាអំពីការចាប់ផ្តើមអនុវត្តសាលដីកាតុលាការឡាអេ ថ្ងៃទី១១វិច្ឆិកា នៅឡើយទេ រហូតដល់ពេលនេះ។ ខណៈនេះ វិបត្តិនយោបាយផ្ទៃក្នុងថៃកំពុងតែពុះកញ្ជ្រោលឡើងវិញទៀតហើយ។ អ្នកប្រវត្តិសាស្ត្រ និងអ្នកស្រាវជ្រាវមួយចំនួនបានសំដែងការព្រួយបារម្ភថា វិបត្តិនយោបាយថៃនឹងប៉ះពាល់ដល់ការអនុវត្តន៍សាលដីកា ស្តីពីបញ្ហាព្រំដែនប្រាសាទព្រះវិហារ។ ប៉ុន្តែ អ្នកជំនាញព្រំដែនរបស់កម្ពុជា និយាយថា បញ្ហាតុលាការឡាអេ ជារឿងដាច់ដោយឡែកពីវិបត្តិផ្ទៃក្នុងថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ប្រមុខរដ្ឋាភិបាលទាំងពីរ កម្ពុជា ថៃបានសន្យាជាមួយគ្នា ហើយក៏បានប្រកាសប្រាប់ពលរដ្ឋរៀងខ្លួនដែរថា រដ្ឋាភិបាលទាំងពីរនឹងអនុវត្តសាលដីកាតុលាការឡាអេ ក្នុងសំណុំរឿងតំបន់ប្រាសាទព្រះវិហារ បើទោះជាសាលដីកានោះ មានអំណោយផលទៅប្រទេសណាក៏ដោយ។ ក្រោយការប្រកាសសាលដីកាដ៏រសើបមួយនេះ លោកស្រីនាយករដ្ឋមន្ត្រីថៃបានប្រកាសថា ប្រមុខការទូតនៃប្រទេសទាំងពីរនឹងជួបគ្នាដើម្បី និយាយអំពីយន្តការនៃការអនុវត្តន៍សាលដីកានេះ។
តាំងពីថ្ងៃទី១១វិច្ឆិកាមក រហូតដល់ពេលនេះ នៅតែមិនទាន់មានព័ត៌មានស្តីអំពីការចាប់ផ្តើមអនុវត្តសាលដីកានៅឡើយទេ ខណៈដែលវិបត្តិនយោបាយផ្ទៃក្នុងថៃបានផ្ទុះឡើងវិញយ៉ាងក្តៅគគុក។
លោករស់ ចន្ត្រាបុត្រ អ្នកប្រវត្តិសាស្ត្រមួយរូបរបស់កម្ពុជា បានពន្យល់ថា សាលដីកាតុលាការយុត្តិធម៌អន្តរជាតិបានបង្គាប់យ៉ាងដាច់ណាត់ អោយភាគីទាំងពីរត្រូវគោរពសេចក្តីសម្រេចរបស់តុលាការ។ ប៉ុន្តែ ប្រវត្តិវិទូរូបនេះហាក់មិនទុកចិត្តថា វិបត្តិផ្ទៃក្នុងថៃនឹងមិនបង្កផលប៉ះពាល់ដល់ការអនុវត្តន៍សាលដីកាឡាអេនោះទេ។
លោករស់ ចន្ត្រាបុត្របញ្ជាក់ថា នៅពេលនេះក្រុមគណបក្សប្រឆាំងរបស់លោកអាប់ភីស៊ីតកំពុងវាយប្រហាររដ្ឋាភិបាលនៃគណបក្សភឿថៃក្នុងសំណុំរឿងច្បាប់លើកលែងទោសមែន ប៉ុន្តែលោកថា នៅពេលខាងមុខគ្មានអ្នកណាហ៊ានអះអាងថា ក្រុមលោកអាប់ភីស៊ីតមិនលើកបញ្ហាព្រំដែនមកនិយាយនោះឡើយ។ នេះជាការព្រួយបារម្ភរបស់អ្នកលោករស់ ចន្ត្រាបុត្រ។
លោក កែម ឡី ដែលជាអ្នកស្រាវជ្រាវសង្គមឯណោះវិញ ក៏បានបញ្ចេញទស្សនៈព្រួយបារម្ភស្រដៀងគ្នានឹងលោកប្រវត្តិវិទូដែរ។ អ្នកស្រាវជ្រាវរូបនេះ អត្ថាធិប្បាយថា ការបណ្តុះគំនិតជាតិនិយម និងការបញ្ចូលមេរៀនប្រវត្តិសាស្ត្រមិនគ្រប់ជ្រុងជ្រោយនៅក្នុងប្រ័ន្ធអប់រំថៃ សុទ្ធតែបង្កផលលំបាកនៅក្នុងការដោះស្រាយបញ្ហាព្រំដែន សម្រាប់រដ្ឋាភិបាលថៃ។ លោកកែម ឡី បានមើលឃើញយន្តការអង្គការសហប្រជាជាតិ ដែលអាចបង្ខំអោយថៃអនុវត្តសាលដីកាតុលាការឡាអេ។
អះអាងខុសពីអ្នកប្រវត្តិសាស្ត្រ និងអ្នកស្រាវជ្រាវខាងលើ លោកវ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន បាននិយាយតែអំពីឆន្ទៈរបស់រដ្ឋាភិបាលទាំងពីរ។ ប្រធានគណៈកម្មការកិច្ចព្រំដែនកម្ពុជាថៃរូបនេះ ពន្យល់យ៉ាងច្បាស់លាស់ថា សាលដីកាតុលាការឡាអេ និងវិបត្តិនយោបាយផ្ទៃក្នុងថៃ គឺជារឿង២ដាច់ដោយឡែកពីគ្នា។
ទោះយ៉ាងណាក៏ដោយ គេនៅរង់ចាំមើលទិដ្ឋភាព និងការវិវត្តន៍ជាក់ស្តែងនៃស្ថានភាពនេះ។ ស្ថានភាពដែលកម្ពុជាធ្លាប់ឆ្លងកាត់ហើយ ដោយបានក្លាយជាជនរងគ្រោះនៃវិបត្តិផ្ទៃក្នុងរបស់ថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ