អតីតCNRP អំពាវនាវឲ្យ កម្មករ កសិករ ចូលរួមសង្គ្រោះពន្ធ២០ភាគរយបន្ទាប់ពីអឺរ៉ុបព្យួរ
អតីតគណបក្សសង្គ្រោះជាតិនៅថ្ងៃទី១៣កុម្ភៈបានបង្ហាញការសោកស្ដាយ បន្ទាប់ពីអឺរ៉ុបព្យួរពន្ធ២០ភាគរយពីកម្ពុជាបណ្ដោះអាសន្ន។ អតីតគណបក្សសង្គ្រោះជាតិដែលអះអាងថា មួយផ្នែកនៃការព្យួរពន្ធ២០ភាគរយដោយសារការរំលាយបក្សប្រឆាំង បានអំពាវនាវឲ្យពលរដ្ឋ ជាពិសេស កម្មករ កម្មការិនី និងកសិករចូលរួមជាមួយខ្លួន ដើម្បីជម្រុញលោកនាយករដ្ឋមន្ត្រី ហ៊ុន សែន សង្គ្រោះពន្ធ២០ភាគត្រឡប់មកវិញ មុនសេចក្ដីសម្រេចផ្លូវការចូលជាធរមាននៅខែសីហា។
ចុះផ្សាយនៅថ្ងៃ៖
សេចក្ដីថ្លែងការណ៍របស់អតីតគណបក្សសង្គ្រោះជាតិចុះថ្ងៃទី១៣ខែកុម្ភៈនេះ ធ្វើឡើងមួយថ្ងៃបន្ទាប់ពីគណៈកម្មការអឺរ៉ុបសម្រេចព្យួរពន្ធពីកម្ពុជា២០ភាគរយ ក្នុងការនាំចេញទំនិញ៤០មុខទៅសហភាពអឺរ៉ុប។ តាមរយៈសេចក្ដីសម្រេចនេះ អតីតគណបក្សង្គ្រោះជាតិចាត់ទុកជាលទ្ធផលសោកសង្រេងនៃវិបត្តិនយោបាយ បង្កដោយលោកនាយករដ្ឋមន្ត្រី ហ៊ុន សែន នៅក្នុងឆ្នាំ២០១៧ តាមរយៈយុទ្ធនាការបង្ក្រាបលើគណបក្សប្រឆាំង អង្គការសង្គមស៊ីវិល សហជីព និងអ្នកសារព័ត៌មានជាដើម។
មុនសេចក្ដីសម្រេចចូលជាធរមាននៅរយៈពេល៦ខែខាងមុខ អតីតគណសង្គ្រោះជាតិយល់ថា កម្ពុជានៅមានឱកាសបញ្ចៀសផលប៉ះពាល់ត្រឹមខែសីហាឆ្នាំ២០២០ ដោយគ្រាន់តែកែប្រែស្ថានភាពឲ្យប្រសើរឡើងវិញតាមសំណើររបស់សហភាពអឺរ៉ុប។ អឺរ៉ុបដែលចង់ឃើញអាជ្ញាធរកម្ពុជាបញ្ចប់ការរំលោភសិទ្ធិមនុស្ស សិទ្ធិនយោបាយ និងសិទ្ធិការងារនៅកម្ពុជា។ បន្ថែមលើនេះ អតីតបក្សប្រឆាំងអំពាវឲ្យពលរដ្ឋខ្មែរមកពីវិស័យកាត់ដេរ កសិករ ចូលរួមជាមួយខ្លួន ជម្រុញឲ្យលោកនាយករដ្ឋមន្ត្រី ហ៊ុន សែន ស្វែងរកដំណោះស្រាយដោយសន្តិវិធីនិងតាមបែបប្រជាធិបតេយ្យ ដើម្បីស្ដារលទ្ធិប្រជាធិបតេយ្យតាមការចង់បានរបស់សហភាពអឺរ៉ុប។
ចំណែកក្រសួងការបរទេស ហៅការសម្រេចព្យួរ EBA ផ្ដើមចេញពីការភាន់ច្រឡំ និងការយល់ខុសអំពីតថភាពជាក់ស្ដែងនៅកម្ពុជា។ បន្ថែមលើនេះ កម្ពុជាប្រកាន់យ៉ាងម៉ឺងម៉ាត់ បដិសេធរាល់ការប៉ុនប៉ងពី ដៃគូខាងក្រៅ ដោយយកលេសពាណិជ្ជកម្ម ឬជំនួយអភិវឌ្ឍន៍ មកជ្រៀតជ្រែកចូលកិច្ចការផ្ទៃក្នុងរបស់កម្ពុជា។ តែជាចុងក្រោយ រដ្ឋាភិបាលកម្ពុជា នៅតែប្តេជ្ញាចិត្ត ក្នុងការពង្រឹងទំនាក់ទំនង ជាមួយសហភាពអឺរ៉ុបបន្ថែមទៀត ដោយឈរលើស្មារតីនៃការគោរព និងការទទួលផលប្រយោជន៍ទៅវិញទៅមក។
ផ្អែកតាមសេចក្ដីសម្រេចរបស់គណៈកម្មការអឺរ៉ុបនៅថ្ងៃទី១២ខែកុម្ភៈ មុខទំនិញ៤០មុខលែងទទួលបានការអនុគ្រោះពន្ធពីអឺរ៉ុបរួមមាន៖ ផលិតផលខ្លះក្នុងផ្នែកកាត់ដេរសម្លៀកបំពាក់និងស្បែកជើង ផលិតផលសម្រាប់ធ្វើដំណើរ និងស្ករ។ ផលិតផលទាំងអស់នេះ នាំចេញពីកម្ពុជាទៅអឺរ៉ុបក្នុងតម្លៃសរុបប្រមាណ១ពាន់លានអឺរ៉ូជារៀងរាល់ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ