លោក ហ៊ុន សែន ចេញទៅបំពេញបេសកម្មនៅប្រទេសចិនចំថ្ងៃភ្ជុំខណៈមេដឹកនាំបក្សប្រឆាំងទៅវត្ត
លោកនាយករដ្ឋមន្ត្រី ហ៊ុន សែន មិនមានវត្តមាននៅក្នុងប្រទេសទេចំថ្ងៃបុណ្យភ្ជុំបិណ្ឌ។អវត្តមានលោកនាយករដ្ឋមន្ត្រីដោយសារតែទៅចូលរួមវេទិកានិងសន្និសីទមួយចំនួននៅទីក្រុងម៉ាកាវប្រទេសចិនចាប់ពីថ្ងៃទី១២ដល់ថ្ងៃទី១៧តុលា។ ចំណែកឯមេដឹកនាំគណបក្សប្រឆាំងបានអញ្ជើញទៅវត្តជាធម្មតាតាមការវិភាគដែលបានគ្រោងទុកហើយក៏គ្មានគម្រោងទៅក្រៅប្រទេសក្នុងឱកាសនេះដែរ។
ចុះផ្សាយនៅថ្ងៃ៖
ស្តាប់ - ០១:៥៧
លោក ហ៊ុន សែន ជាមួយភរិយា លោកស្រី ប៊ុន រ៉ានី រួមនិងមន្ត្រីរដ្ឋាភិបាលដទៃទៀតរួមមានលោក សុខ អាន លោក ថោង ខុន និង លោក ប្រាក់ សុខុន ជាដើម បានចាកចេញពីប្រទេសកម្ពុជាវេលាម៉ោង៨ព្រឹកនៅថ្ងៃអាទិត្យទី១១តុលាឆ្ពោះទៅកាន់ទីក្រុងម៉ាកាវ ប្រទេសចិន គឺដើម្បីទៅចូលរួមវេទិកាចំនួនបួនដូចជា.វេទិកាសេដ្ឋកិច្ចទេសចរណ៍សកលម៉ាកាវ ឆ្នាំ២០១៥ . សន្និសីទពិសេសរបស់គណបក្សនយោបាយនៅអាស៊ីស្តីពីវិថីសូត្រ . វេទិកាស្តីពីការកាត់បន្ថយភាពក្រីក្រសកលនិងការអភវឌ្ឍន៍ឆ្នាំ២០១៥.វេទិកាសៀងសានលើកទី៦។
ក្រៅពីនេះតាមគម្រោងលោកនាយករដ្ឋមន្ត្រី ហ៊ុន សែន នឹងជួបទ្វេភាគីជាមួយថ្នាក់ដឹកនាំ ប្រទេសចិន។ ជាការគត់សម្គាល់ដំណើរចេញទៅបំពេញការងារនៅក្រៅប្រទេសរបស់លោក ហ៊ុន សែន ធ្វើឡើងក្នុងឱកាសដែលពលរដ្ឋកម្ពុជារៀបចំពិធីបុណ្យភ្ជុំបិណ្ឌប្រចាំឆ្នាំ។
ទោះអវត្តមានពីប្រទេសតែក្នុងឱកាសបុណ្យកាន់បិណ្ឌនាពេលកន្លងមកលោកនាយករដ្ឋមន្ត្រី ហ៊ុន សែន បានអញ្ជើញទៅកាន់បិណ្ឌក្នុងវត្តលង្ការាជធានីភ្នំពេញនិងវត្តចំពុះក្អែកខេត្តកណ្ដាល។ តាមរយៈសារជូនពរនៅក្នុងបណ្ដាញសង្គមហេ្វសប៊ុកផ្ទាល់ខ្លួនលោក ហ៊ុន សែន បានផ្ញើសារសួរសុខទុក្ខដល់កងទ័ពជាតិទូទាំងប្រទេសនិងបានជូនពរដល់ពួកគេឲ្យកងទ័ពជួបសេចក្ដីសុខក្នុងឱកាសបុណ្យភ្ជុំបិណ្ឌនេះ។
លោក សួស យ៉ារ៉ា អ្នកនាំពាក្យគណបក្សប្រជាជនកម្ពុជាក៏ឲ្យដឹងដែរទោះជាអវត្តមានប្រធាន គណបក្សលោក ហ៊ុន សែន មន្ត្រីគណបក្សអញ្ជើញទៅវត្តជាលក្ខណៈគ្រួសាររៀងខ្លួន។បក្សប្រជាជនមិនបានរៀបចំពិធីអ្វីទេក្នុងពេលនេះ។
ស្របពេលនេះមេដឹកនាំគណបក្សសង្គ្រោះជាតិទាំងលោក សម រង្ស៊ី និង លោក កឹម សុខា គ្មានគម្រោងចេញទៅក្រៅប្រទេសទេនៅក្នុងឱកាសនេះ។ ហើយនៅថ្ងៃអាទិត្យដែលជាវេន កាន់បិណ្ឌទី១៤ លោក កឹម សុខា និង លោក សម រង្ស៊ី បានអញ្ជើញទៅវត្តជាលក្ខណៈគ្រួសារ ។ លោក សម រង្ស៊ី បានចូលរួមកាន់បិណ្ឌ វេនទី១៤ នៅវត្ដសន្សំកុសល និង បន្តហួសជួប អាជីវករ នៅផ្សារបឹងទំពុន។ ចំពោះគណបក្សសង្គ្រោះជាតិក៏គ្មានគម្រោងរៀបចំកម្មវិធីអ្វីដែរក្នុងឱកាសបុណ្យភ្ជុំបិណ្ឌនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ