សាលាក្រុងមិនអនុញ្ញាតឲ្យ CNRP ដង្ហែញត្តិសុំអន្តរាគមន៍ពីបរទេស
សាលាក្រុងភ្នំពេញបានប្រកាសនៅថ្ងៃសៅរ៍នេះថា នឹងមិនអនុញ្ញតឲ្យគណបក្សសង្គ្រោះជាតិដាក់ញត្តិទៅកាន់ស្ថានទូតប្រទេសហត្ថលេខីនៃសន្ធិសញ្ញាទីក្រុងប៉ារីស ទាំង៥និង សមាជិកអាស៊ានមួយចំនួននៅថ្ងៃចន្ទសប្ដាហ៍ក្រោយនោះទេ។ ការបិទភ្លើងខៀវរបស់សាលាក្រុងធ្វើឡើងតែមួយថ្ងៃប៉ុណ្ណោះ បន្ទាប់ពីគណបក្សសង្គ្រោះជាតិបានបង្ហាញពីបំណងនៃការដាក់ញត្តិកាលពីថ្ងៃទី០២ កញ្ញា ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ការបដិសេធរបស់សាលាក្រុងភ្នំពេញចំពោះសំណើរបស់គណបក្សសង្គ្រោះជាតិដោយសារតែគណបក្សប្រឆាំងមួយនេះ មិនបានគោរពលក្ខខណ្ឌនិងនីតិវិធីនៃច្បាប់ស្ដីពីបាតុកម្មដោយសន្តិវិធី។
លោក មាន ចាន់យ៉ាដា អ្នកនាំពាក្យសាលារាជធានីភ្នំពេញបានគូសបញ្ជាក់ថា គណបក្សសង្គ្រោះជាតិបានដាក់លិខិតមកសាលារាជធានីភ្នំពេញកាលពីល្ងាចថ្ងៃសុក្រទី២ កញ្ញា ។ ប៉ុន្តែលិខិតនេះត្រូវបានសាលាក្រុងធ្វើការបដិសេធភ្លាមៗដោយសារគណបក្សសង្គ្រោះជាតិធ្វើខុសនីតិវិធីព្រោះថា តាមគោលការណ៍ច្បាប់គណបក្សសង្គ្រោះជាតិត្រូវជូនដំណឹងមកសាលាក្រុងឲ្យបានមុនយ៉ាងតិចបីថ្ងៃនៃថ្ងៃធ្វើការ។
សាលាក្រុងបានព្រមានថា ប្រសិនបើគណបក្សសង្គ្រោះជាតិនៅតែបន្តសកម្មភាពនៃការដង្ហែញត្តិ នោះអាជ្ញាធរនឹងប្រើវិធានការដែលមានចែងនៅក្នុងច្បាប់។
សូមបញ្ជាក់ថា គណបក្សសង្គ្រោះជាតិនៅថ្ងៃទី២កញ្ញាបានប្រកាសថាតំណាងរាស្ត្រគណបក្សទាំងអស់នឹងយកញត្តិសុំអន្តរាគមន៍ទៅកាន់បណ្តាប្រទេសមហាអំណាចនិងសមាជិកអាស៊ានចំពោះស្ថានភាពនយោបាយនៅកម្ពុជា នាថ្ងៃចន្ទសប្ដាហ៍ក្រោយ។ ជាញត្តិដែលបក្សប្រឆាំងស្នើភាគីទាំងអស់សម្របសម្រួលស្ថានការណ៍នៅកម្ពុជាប្រក្រតីឡើងវិញ។
លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិ បានអះអាងថាការស្វែងរកកិច្ចអន្តរាគមន៍ពីបរទេសនេះគឺដោយសារតែស្ថានភាពនយោបាយនៅតែបន្តតានតឹងខណៈសមាជិកសភាគណបក្សសង្គ្រោះជាតិជាពិសេសប្រធានគណបក្សប្រឆាំងទាំងពីររូបកំពុងប្រឈមនឹងប្រព័ន្ធតុលាការ។ លោកសមរង្ស៊ី កំពុងមានបណ្តឹងជាប់ខ្លួនចំនួន ៥បណ្តឹងដោយឡែកលោកកឹមសុខាកំពុងរងបណ្តឹងរបស់តុលាការចំនួន៣ផងដែរ។ នេះគឺមិនទាន់រាប់បញ្ជូលបណ្តឹងលើសមាជិករដ្ឋសភាព្រឹទ្ធសភានិង សកម្មជននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ