លោក ហ៊ុន សែន ថាការលាបពណ៌នាំឲ្យប្រទេសមានគ្រោះថ្នាក់
លោកនាយករដ្ឋមន្ត្រី ហ៊ុន សែន នៅព្រឹកថ្ងៃអាទិត្យទី១០មេសានេះបានចំអកមិនចំឈ្មោះទៅកាន់គណបក្ស នយោបាយដែល លោកអះអាងថា តែងតែលាបពណ៌អ្នកគាំទ្រខ្លួនថា ជាវៀតណាមនៅពេលពួកគេឈប់គាំទ្រឬចុះចូលគណបក្សផ្សេង។ ក្នុងន័យនេះលោក ហ៊ុន សែន បានព្រមានទុកជាមុនថា ជាតិនឹងមានគ្រោះថ្នាក់ព្រោះមនុស្សធន់នេះ ។ ទោះមិននិយាយចំតែគេអាចដឹងបានថា លោក ហ៊ុន សែន សំដៅលើថ្នាក់ដឹកនាំគណបក្សសង្គ្រោះជាតិដែលតែងតែលើកបញ្ហាជាតិ សាសន៍មកឃោសនា។ ប៉ុន្តែផ្ទុយមកវិញលោក យឹម សុវណ្ណ ថាគណបក្សសង្គ្រោះជាតិទេ ដែលជាអ្នករងគ្រោះដោយការលាបពណ៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
ថ្លែងនៅក្នុងពិធី ប្រគល់ រង្វាន់ជ័យលាភី"ខ្ញុំជាយុវជនគំរូកម្ពុជា" នៅព្រឹកថ្ងៃអាទិត្យទី១០មេសានេះ ប្រធានគណបក្សកាន់អំណាច លោក ហ៊ុន សែន បានថ្លែងការពារខ្លួនថា លោកមិនដែលលាបពណ៌អ្នកណានោះទេ។ ប៉ុន្តែលោកបានទុកសិទ្ធិឲ្យគេបោះឆ្នោតគាំទ្ររូបលោក បើគិតថា លោកធ្វើសកម្មភាពត្រឹមត្រូវនាំមកនូវសន្តិភាព និង ការអភិវឌ្ឍ។
នាយករដ្ឋមន្រ្តីប្រាំអាណត្តិរូបនេះ បានប្រដូចការលាបពណ៌អ្នកធ្លាប់គាំទ្របក្សជាវៀតណាមនាពេលបច្ចុប្បន្នថា ដូចសម័យប៉ុលពតអីចឹង! សម័យប៉ុលពតដែលលោក ហ៊ុន សែន អះអាងថា មានការលាបពណ៌មនុស្សគ្រប់រូប ថាជានាយទុន សក្តិភូមិ ចារកម្មយួនជាដើម។ សកម្មភាពទាំងនេះហើយដែលលោក ហ៊ុន សែន ជឿថា នាំមកនូវភាពអន្តរាយដល់ប្រទេស។
បន្ថែមពីលើនេះទៀតប្រមុខរដ្ឋាភិបាលលោក ហ៊ុន សែន ហ៊ានទាយទុកជាមុនថា នៅពេលអត់ពីលោកទៅ សង្គ្រាមដែលកើតចេញពីការលាបពណ៌នឹងផ្ទុះឡើងភ្លាម។តែយ៉ាងណាក៏ដោយ លោក ហ៊ុន សែន អំពាវនាវឲ្យមានការរួបរួមគ្នាដោយមិនប្រកាន់និន្នាការពណ៌ ព្រោះនេះជាតម្រូវការរបស់មនុស្ស។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិទទួលស្គាល់ថា ការលាបពណ៌គ្នាជាឧបស្គធំរាំងស្ទះក្នុងការអភិវឌ្ឍប្រទេស។ ប៉ុន្តែយ៉ាងណាម៉ិញលោកថា គណបក្សសង្គ្រោះជាតិទេជាអ្នករងគ្រោះនៃការលាបពណ៌នេះ។ លោកបានបញ្ជាក់ថា ជំហរផ្លាស់ប្ដូររបស់អ្នកគាំទ្រ គណបក្សសង្គ្រោះជាតិមិនដែលលាបពណ៌នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ