ម្ចាស់រថយន្តចង្កូតស្ដាំព្រមានបិទផ្លួវនាល្ងាចនេះទៀតដើម្បីប្រឆាំងការកែចង្កូតស្ដាំទៅឆ្វេង
នៅម៉ោង២រសៀលនេះ តំណាង១០នាក់ នៃម្ចាស់រថយន្តចង្កូតស្ដាំនឹងជួបចរចានៅសាលារាជធានីភ្នំពេញ អំពីដំណោះស្រាយនៃការតម្រូវឲ្យកែចង្កូតរថយន្តពីស្ដាំទៅឆ្វេង។ ការជួបចរចាធ្វើឡើងបន្ទាប់ពីក្រុមម្ចាស់រថយន្តចង្កូតស្ដាំនៅ ព្រឹកថ្ងៃពុធនេះ ជាង១០០ នាក់បានបិទផ្លូវចំនួនបីកន្លែងប្រឆាំងនឹងការតម្រូវឲ្យចង្កូត ពីស្ដាំទៅឆ្វេង។ ហើយមកដល់ម៉ោងនេះពួកគេសម្រេចដកថយ និង បើកផ្លូវឲ្យមានចរាចរណ៍ឡើងវិញ នឹង បានព្រមានពីបិទផ្លូវជាថ្មីនៅល្ងាចនេះ។
ចុះផ្សាយនៅថ្ងៃ៖
ស្តាប់ - ០២:០៥
ការតវ៉ារឿងផ្លាស់ប្ដូរចង្កូតរថយន្តនេះ បានផ្ទុះឡើងជាលក្ខណៈទ្រង់ទ្រាយធំជាថ្មីនៅព្រឹកថ្ងៃពុធទី២៣ធ្នូនេះ បន្ទាប់ពីម្ចាស់រថយន្តប្រភេទធំជាង១០០គ្រឿងបានបិទផ្លូវបីកន្លែងចូលក្នុងក្រុងរួមមាន៖ផ្លូវជាតិលេខ៣ ផ្លូវជាតិលេខ១ និង នៅម្ដុំព្រែកហូរ។ ពួកគេបានព្រមានថា នឹងមានការបិទផ្លូវនៅល្ងាចនេះទៀតប្រសិនបើការស្នើសុំរបស់ពួកគេត្រូវបានបដិសេធ ហើយនៅខណៈនេះពួកគេបានដកថយសិនបន្ទាប់ពីមានអន្តរាគមន៍និងការសន្យារកដំណោះស្រាយ។ នេះបើតាមការបញ្ជាក់ពីលោក ប៊ុន ចាន់ត្រា ម្ចាស់រថយន្តចង្កូតស្ដាំ។
ថ្លែងប្រាប់វិទ្យុបារាំងអន្តរជាតិRFI លោក ប៊ុន ចាន់ត្រា បន្តថា នេះជាលើកទី១០ហើយនៃការតវ៉ារបស់ម្ចាស់រថយន្តចង្កូតស្ដាំដែលបន្តគ្មានដំណោះស្រាយ។ លោក ប៊ុន ចាន់ត្រា បញ្ជាក់ពីហេតុផលថា កាលដែលរដ្ឋតម្រូវឲ្យកែចង្កូតពីស្ដាំទៅឆ្វេងមានផលប៉ះពាល់ខ្លាំងគឺធ្វើឲ្យបាត់បង់គុណភាពរថយន្ត៨០ភាគរយ។ និងម្យ៉ាងទៀតការកែចង្កូតរថយន្តនេះ តម្រូវឲ្យមានគ្រឿងបន្លាស់ច្រើនជាហេតុធ្វើឲ្យខាតពេលវេលាក្នុងការប្រកបរបរប្រចាំថ្ងៃហើយ ប៉ះពាល់ជាមួយបំណុលធនាគារដែលបានខ្ចីមកទិញរថយន្ត។ លោក ប៊ុន ចាន់ត្រា ក៏បានលើកជាឧទាហរណ៍កើតមានស្រាប់រួចទៅហើយក្រោយការចង្កូតនេះរថយន្តមួយចំនួនបានដាច់ចង្កូតនៅពេលពួកគេបើកបរ។
ដូច្នេះហើយពួកគេបានស្នើទៅលោកនាយករដ្ឋមន្ត្រី ហ៊ុន សែន ជួយអន្តរាគមន៍លើបញ្ហានេះដោយម្ចាស់រថយន្តចង្កូតស្ដាំទាំងនេះសន្យាថា នឹងបង់ពន្ធជូនរដ្ឋមិនឲ្យខកខានដើម្បីជាថ្នូរបានសិទ្ធរក្សាទុកចង្កូតស្ដាំដដែល។ ការតវ៉ានេះធ្វើឡើងទន្ទឹមនឹងពេលវេលានៃការអនុវត្តន៍ច្បាប់ចរាចរណ៍ផ្លូវគោកថ្មីកាន់តែខិតជិតមកដល់នៅ ថ្ងៃ ទី១ មករា ឆ្នាំ ២០១៦។ នេះជាការបន្ថែមរបស់លោក ប៊ុន ចាន់ត្រា។
សូមបញ្ជាក់ថា ការជួបចរចាគ្នានៅម៉ោង២រសៀលនេះធ្វើឡើង នៅសាលារាជធានីភ្នំពេញមានការសម្របសម្រួលពីលោក ប៉ា សុជាតិវង្ស និង តំណាងក្រសួងសាធារណៈការ១រូប តំណាងអគ្គនាយកដ្ឋានពន្ធដា១រូប និង តំណាងម្ចាស់រថយន្តចង្កូតស្ដាំចំនួន១០រូប។ គួររម្លឹកជូនថា ការតម្រូវឲ្យមានការកែចង្កូតរថយន្តពីស្ដាំទៅឆ្វេងធ្វើឡើងនៅបន្ទាប់ពីការចេញបញ្ជារបស់ស្ថាប័នពាក់ព័ន្ធក្នុងការលុបបំបាត់រថយន្តគេចពន្ធដែលបន្តហូរចូលមកកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ