ក្រសួងបរទេស៖អាជីវករខ្មែរពីរនាក់នៅផ្សាររ៉ុងក្លឿសម្រេចជាប់ឃុំបីខែតាមអំណាចសាលក្រមតុលាការថៃ
តុលាការថៃគ្រប់ជាន់ថ្នាក់បានបដិសេធរាល់សំណើសុំនៅក្រៅឃុំ របស់មេធាវីការពារក្ដីអាជីវករខ្មែរពីរនាក់ បន្ទាប់ពីពួកគេត្រូវដាក់ឲ្យជាប់ឃុំរយៈពេលបីខែ ក្នុងហេតុការណ៍ផ្ទុះហិង្សាជាមួយប៉ូលីសកម្មសិទ្ធិបញ្ញារបស់ថៃកាលពី ថ្ងៃទី៣កុម្ភៈ។ ប្រឈមនឹងបញ្ហានេះគ្រួសារអាជីវករខ្មែរទាំងពីរនាក់ឯកភាពជាមួយ ក្រសួងការបរទេសកម្ពុជាសម្រេចឲ្យពួកគេជាប់ឃុំរយៈពេលបីខែតាមសាល ក្រមរបស់តុលាការថៃ។ ដោយឡែកស្ថានភាពទូទៅក្នុងផ្សាររ៉ុងក្លឿវិញ គឺអាជីវករខ្មែរនៅតែមានការភ័យខ្លាចក្នុងការបើកតូបលក់ដូរ បន្ទាប់ពីអាជ្ញាធរថៃទុកឱសានវាទពីរខែដើម្បី លក់ចេញឲ្យអស់រាល់មុខទំនិញនាំចូលពីក្រៅប្រទេស។
ចុះផ្សាយនៅថ្ងៃ៖
ស្តាប់ - ០២:៣២
លោក ជុំ សន្ទរី អ្នកនាំពាក្យក្រសួងការបរទេសកម្ពុជាបានបញ្ជាក់ប្រាប់វិទ្យុបារាំងអន្តរជាតិRFIនៅព្រឹកថ្ងៃអាទិត្យថា អាជីវករខ្មែរលក់ដូរនៅផ្សាររ៉ុងក្លឿមានចំនួនបីពាន់តូប។ក្នុងនោះ ១ភាគ៣នៃតូប លក់ទំនិញពាក់ព័ន្ធកម្មសិទ្ធបញ្ញានាំចូលពីក្រៅ។ ហើយ២ភាគ៣នៃតូបមានលក់ទំនិញជជុះនិងគ្មានស្លាកយីហោ។ ក្រោយផ្ទុះហិង្សាមកដល់ពេលនេះមានតែអាជីវករខ្មែរ៣០ភាគរយបើកតូបលក់ដូរ។
លោក ជុំ សន្ទរី ទទួលស្គាល់ថា មានការលំបាក់ក្នុងការដោះស្រាយដោយសារតែច្បាប់របស់ថៃគោរពទៅលើកម្មសិទ្ធិបញ្ញាពោលគឺមិនឲ្យនាំចូលទំនិញខុសច្បាប់ពីក្រៅលក់ក្នុងទឹកដីរបស់គេ។ ហើយអគ្គកុងស៊ុលខ្មែរក៏បានសំណូមពរទៅអាជីវករខ្មែរឲ្យបញ្ឈប់ការលក់ទំនិញក្លែងក្លាយនេះ។ ក្រុមអាជីវករក៏បានស្នើត្រឡប់មកវិញដោយសុំទុកពេលឲ្យពួកគេលក់ទំនិញទាំងនោះឲ្យអស់។
ទន្ទឹមនឹងនេះថៃបានព្រមានថា ប្រសិនបើអាជីវករខ្មែរបន្តលក់ទំនិញក្លែងក្លាយទៀតពួកគេនឹងជួបការលំបាក់នៅពេលក្រោយ ព្រោះច្បាប់ថៃគ្មានឡើយការទំនិញក្លែងក្លាយ។
សូមបញ្ជាក់ថា កាលពីថ្ងៃទី ០៣ ខែកុម្ភៈ កើតមានហេតុការណ៍ ប៉ះទង្គិច គ្នារវាងក្រុមអាជីវករខ្មែរ និងក្រុមស៊ើបអង្កេត ពិសេសថៃមកពី ទីក្រុងបាងកក ដែលចុះមកពិនិត្យ កម្មសិទ្ធិបញ្ញាលើទំនិញ នៅផ្សាររ៉ុងក្លឿ ។ ក្នុងហេតុការណ៍នោះនាំឲ្យអាជីវករខ្មែរពីរនាក់ត្រូវបានចាប់និងឃុំខ្លួនរយៈពេលបីខែ។ អាជ្ញាធរកម្ពុជាក៏បានអន្តរាគមន៍សុំធានាពួកគេទាំងពីរនាក់បាននៅក្រៅឃុំតែត្រូវបានបដិសេធជាបន្តបន្ទាប់ដោយតុលាការថៃ។
មេធាវីតំណាងឲ្យអាជីវករលើកឡើងថា ក្នុងករណីដែលកម្ពុជាបន្តដោះស្រាយផ្នែកច្បាប់បន្តទៀតនឹងធ្វើឲ្យសំណុំរឿងនេះបន្តអូសបន្លាយពេលយូររហូតដល់ទៅពីរឬបីឆ្នាំទៀតដែរ។តែយ៉ាងណាក៏ដោយក្រុមគ្រួសារទទួលយកយោបល់មេធាវីហើយបានឯកភាពជាមួយក្រសួងការបទេសសម្រេចឲ្យពួកគេជាប់ឃុំរយៈពេលបីខែតាមអំណាចសាលក្រមរបស់ថៃ។
ដោយឡែកទាក់ទងស្ថានភាពទូទៅនៅផ្សាររ៉ុងក្លឿនាថ្ងៃសៅរិ៍នេះ អាជីវករប្រមាណតែ៤០ភាគរយប៉ុណ្ណោះបើកតូបលក់ដូរ។ អាជីវករម្នាក់សុំមិនបញ្ចេញឈ្មោះបានប្រាប់វិទ្យុបារាំងថា អាជ្ញាធរថៃទុកពេលឲ្យពួកគាត់លក់ទំនិញដែលនាំចូលពីក្រៅឲ្យអស់ក្នុងរយៈពេលពីរខែ។ អាជីវករដដែលឲ្យដឹងថា ក្រោយប៉ូលីសថៃចុះចាប់ទំនិញក្លែងក្លាយផ្សារមានសភាពស្ងប់ស្ងាត់ទាំងអ្នកលក់និងអ្នកទិញ។ តាមគម្រោងនៅថ្ងៃទី១ខែមិនាប៉ូលីសកម្មសិទ្ធិបញ្ញារបស់ថៃមកពីបាងកកនឹងចុះមកធ្វើការត្រួតពិនិត្យទំនិញនៅផ្សាររ៉ុងក្លឿជាថ្មីម្ដងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ