លោករុន រ័ត្នវាសនា ៖ ជិតពីរខែនេះ អ្នកបើកបរស្រវឹងជាងពីររយនាក់ត្រូវបានបញ្ជូនទៅកាន់តុលាការ
លោករុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនៃក្រសួងមហាផ្ទៃ បានឲ្យដឹងថា គិតមកដល់ពេលនេះ អ្នកបើកបរក្រោមឥទ្ធិពលគ្រឿងស្រវឹងកម្រិតខ្ពស់ ចំនួនជាង២០០នាក់ ត្រូវបាននគរបាលចរាចរណ៍បញ្ជូនទៅតុលាការ ដើម្បីធ្វើការផាកពិន័យ និង ផ្ទន្ទាទោសទៅតាមច្បាប់ចរាចរណ៍ផ្លូវគោកថ្មី។
ចុះផ្សាយនៅថ្ងៃ៖
ស្តាប់ - ០២:១២
ថ្លែងប្រាប់វិទ្យុបារាំងអន្តរជាតិតាមរយៈខ្សែទូរស័ព្ទនៅព្រឹកថ្ងៃអាទិត្យនេះ លោករុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃក្រសួងមហាផ្ទៃ បានបញ្ជាក់ថា អ្នកបើកបរដែលត្រូវបានបញ្ជូនទៅកាន់តុលាការជាង២០០នាក់នេះ គឺសុទ្ធតែបានរកឃើញថា មានជាតិអាល់កុលលើសពី០,៤០មីលី្លក្រាមក្នុងមួយលីត្រខ្យល់។
លោករុន រ័ត្នវាសនា នៅក្នុងការចុះត្រួតពិនិត្យជាតិស្រវឹងជារៀងរាល់យប់ អះអាងថា នគរបាលចរារចណ៍ផ្លូវគោកបានឃាត់ខ្លួនជាមធ្យមអ្នកបើកបរក្នុងជាតិស្រវឹងកម្រិតខ្ពស់ប្រមាណ២៥នាក់នៅទូទាំងប្រទេសកម្ពុជា។ ជាក់ស្តែងកាលពីយប់ថ្ងៃសៅរ៍ ទី២៧ កុម្ភៈ អ្នកបើកបរយានយន្តចំនួន១៣នាក់ ត្រូវបានកម្លំាងសម្ថកិច្ចនគរបាលចរាចរណ៍ធ្វើការឃាត់ខ្លួនពាក់ព័ន្ធការបើកបរក្រោមឥទ្ធិពលនៃគ្រឿងស្រវឹងក្នុងកម្រិតខ្ពស់ដែលមិនអាចពិន័យ និងអប់រំបាននៅនឹងកន្លែង។
អ្នកបើកបរក្រោមជាតិស្រវឹងទាំងនេះ ត្រូវបាននគរបាលឃាត់ខ្លួនរយៈពេល៤៨ម៉ោងរហូតដល់ពួកគាត់ស្វាងពីស្រវឹងទើបបញ្ជូនទៅកាន់តុលាការ ដើម្បីដាក់ទោសទណ្ឌ។ ក៏ប៉ុន្តែ ពួកគេតែងតែស្នើដាក់ប្រាក់តម្តល់ ដើម្បីសុំនៅក្រៅឃុំបណ្តោះអាសន្ន។ នេះបើតាមលោករុន រ័ត្នវាសនា។ ចំណែកការអនុវត្តទោសទណ្ឌលើអ្នកបើកបរក្រោមឥទ្ធិពលក្នុងកម្រិតខ្ពស់ទាំងជាង២០០នាក់ ត្រូវបានប្រធាននាយករដ្ឋានចរាចរណ៍ផ្លូវគោកគូសបញ្ជាក់ថា តុលាការបានព្យួរទោសពួកគេនោះទាំងអស់។
ដោយឡែកទាក់ទងនឹងការបង់ប្រាក់ពិន័យដែលនគរបាលចរាចរណ៍ផ្លូវគោកទទួលបាននៅក្នុងរយៈពេលជិតពីរខែនេះ មិនទាន់ត្រូវបានបូកសរុបនៅឡើយទេ។ តែទោះជាយ៉ាងណា លោករុន រ័ត្នវាសនា អះអាងថា អ្នកល្មើសច្បាប់ចរាចរណ៍ ប្រមាណជា៨៨ទៅ៩០ភាគរយ បានទៅបង់ប្រាក់ពិន័យតាមការល្មើសរបស់ពួកគេនីមួយៗ។ គួរជំរាបជូនថា កាលពីខែមករាកន្លងទៅ នគរបាលចរាចរណ៍ផ្លូវគោក ទទួលបានទឹកប្រាក់ជាង៣ពាន់លានរៀលពីការផាកពិន័យអ្នកល្មើសច្បាប់ចរាចរណ៍។
បើតាមក្រសួងមហាផ្ទៃ ទឹកប្រាក់ដែលបានពីការផាកពិន័យទាំងនេះ នឹងត្រូវបែងចែកជូនកងកម្លាំងនគរបាលចរាចរណ៍នៅក្នុងខែមីនាខាងមុខនេះ ហើយប្រាក់រង្វាន់ដែលលោកស ខេងបានប្រកាសផ្តល់ជូន ៤០០០រៀលក្នុងមួយថ្ងៃដល់នគរបាលចរាចរណ៍នោះ ក៏ត្រូវផ្តល់ជូនជាមួយគ្នានេះផងដែរ។ យ៉ាងណាក៏ដោយ លោកស ខេង រដ្ឋមន្ត្រីក្រសួងមហាផ្ទៃកម្ពុជា បានបញ្ជាឲ្យមន្រ្តីថ្នាក់ក្រោម ត្រូវបែងចែកប្រាក់ទាំងនេះឲ្យបានត្រឹមត្រូវ ហើយមន្រ្តីនគរបាលទាំងអស់ត្រូវបើកគណនីនៅធនាគារ ដើម្បីបើកប្រាក់ទាំងអស់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ