មេធាវីបក្សប្រឆាំង៖រឿងសកម្មជន១១រូប ជារឿងនយោបាយ ប៉ុន្តែបក្សទាំង២ថាសម្រេចតាមយន្តការច្បាប់
ជំនួបចរចាអ្នកនយោបាយកំពូលរវាងគណបក្សប្រជាជន កម្ពុជា និងគណបក្សសង្រោ្គះជាតិ បានសម្រេចថា ជោគវាសនារបស់សកម្មជនទាំង១៤រូបរបស់គណបក្សសង្គ្រោះជាតិ គឺស្ថិតនៅក្នុងដៃរបស់តុលាការដែលគណបក្សទាំងពីរនឹងមិនលូកដៃប៉ះពាល់ឡើយ។ ដោយឡែកមេធាវីការពារក្តីសកម្មជនទាំង១៤នាក់ បានអះអាងថា ខ្លួនមានភស្តុតាងរឹងមាំដើម្បីដោះបន្ទុកកូនក្តីរបស់ខ្លួនបើមិនមានសំពាធពីនយោបាយនោះទេ។
ចុះផ្សាយនៅថ្ងៃ៖
ស្តាប់ - ០២:១៧
វាសនាសកម្មជនគណបក្សសង្គ្រោះជាតិទាំង១១រូបដែលកំពុងជាប់ឃុំនៅមិនទាន់ច្បាស់លាស់ទេ។ ក្រុមមេធាវីការពារក្តីបានអះអាងថាសំពាធនយោបាយជាឧបសគ្គក្នុងការដោះ ស្រាយ។ លោក ហែម សុជាតិ មេធាវីការពារក្តីបន្ថែម៖«...»
អ្នកនាំពាក្យតុលាការ និងអ្នកនាំពាក្យក្រសួងយុត្តិធម៌មិនអាចទាក់ទងបំភ្លឺពីការចោទប្រកាន់របស់មេធាវីបក្សប្រឆាំងបាននោះទេរហូតមកដល់ពេលនេះ។ ប៉ុន្តែលោក សុខ ឥសាន្ត អ្នកនាំពាក្យគណបក្សកាន់អំណាចបានគូសបញ្ជាក់ថា គណបក្សមិនមានសិទ្ធបញ្ជាតុលាការដែលជាស្ថាប័នឯករាជ្យនោះទេ។ បើតាមអ្នកនាំពាក្យរូបនេះ មេធាវីការពារក្តីត្រូវតែប្រកាន់វិជ្ជាជីវៈរបស់ខ្លួន ហើយកុំដាក់ខ្លួនជាមេធាវីនយោបាយ។
យ៉ាងណាក៏ដោយមេធាវីសកម្មជនគណបក្សប្រឆាំងលោក ហែម សុជាតិដដែល បានគូសបញ្ជាក់ថា ក្រុមមេធាវីមានភស្តុតាងរឹងមាំដើម្បីដោះបន្ទុក និងលើកលែងការចោទប្រកាន់ទៅលើសកម្មជនគណបក្សប្រឆាំងដែលត្រូវជាប់ពន្ធនាគារពី៧ ទៅ២០ឆ្នាំ។ ក្រុមមេធាវីបានលើកឡើងថា វីដេអូឯកសារ និងភស្តុតាងជាពាក្យសំដីរបស់ជនជាប់ចោទ គឺមិនមានស្ថានទំងន់ទោសនោះឡើយ។ មិនមានទំងន់ព្រោះថាអ្នកទាំង១១នាក់គឺមិនមែនជាអ្នកដឹកនាំ និងចូលរួមប្រើប្រាស់អំពើហិង្សានៅពេលរំដោះទីលានប្រជាធិបតេយ្យនោះដែរ។ ដោយឡែកការប្រើប្រាស់ពាក្យសម្តីរបស់លោកមាជ សុវណ្ណារ៉ាគឺលើកស្ទួយលទ្ធិប្រជាធិបតេយ្យប៉ុណ្ណោះ មិនមែនជាការញុះញង់ឱ្យបង្កអំពើហិង្សាឡើយ។
ការលើកឡើងពីភស្តុតាងរបស់ក្រុមមេធាវីនេះ គឺមួយថ្ងៃបន្ទាប់ពីអ្នកនយោបាយកំពូលនៃគណបក្សកាន់អំណាច និងបក្សប្រឆាំងបានសម្រេចជាធ្លុងមួយថា មិនប្រើកម្លាំងនយោបាយប៉ះពាល់កិច្ចការតុលាការនោះទេ ប៉ុន្តែគណបក្សកាន់អំណាចជំរុញឱ្យបក្សប្រឆាំងប្តឹងទៅសាលាឧទ្ធរណ៍ សម្រាប់អ្នកដែលត្រូវបានកាត់ទោសរួចហើយ ចំណែកឯអ្នកដែលកំពុងជាប់ឃុំវិញ បក្សប្រឆាំងគួររកមេធាវីការពារនៅសាលាដំបូង។ សូមបញ្ជាក់ថា រហូតមកដល់ពេលនេះ តុលាការបានកាត់ទោសសកម្មជនគណបក្សសង្គ្រោះជាតិចំនួន១១នាក់ហើយដាក់ពន្ធនាគារពីបទដឹកនាំបាតុកម្ម និងចូលរួមកុប្បកម្មខុសច្បាប់។
ដោយឡែក សកម្មជន៣រូបផ្សេងទៀតកំពុងជាប់ឃុំ ខណៈសកម្មជនចំនួន២ រូប និងតំណាងរាស្ត្រចំនួន៧រូបទៀតកំពុងជាប់ចោទក្នុងសំណុំរឿងដដែលនេះកាលពីឆ្នាំ២០១៤។
ការចោទតុលាការថានៅក្រោមសំពាធនយោបាយពីមេធាវីបក្សប្រឆាំងនេះ គឺបន្ទាប់ពីតុលាការបានចាប់ខ្លួនសកម្មជនទាំង១១រូបភ្លាមៗក្រោយការប្រកាសពីលោកនាយករដ្ឋមន្ត្រីហ៊ុន សែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ