ពលរដ្ឋខ្មែរបានទទួលវ៉ាក់សាំងជំងឺផ្តាសាយប្រភេទថ្មី A/H1N1លើកដំបូង
ថ្នាំវ៉ាក់សាំងការពារជំងឺផ្តាសាយប្រភេទថ្មីA/H1N1ត្រូវបានផ្តើម ប្រើប្រាស់ហើយ នៅព្រឹកថ្ងៃ ពុធ ទី ២៤ មីនានេះ នៅក្នុងមន្ទីរពេទ្យបង្អែកខណ្ឌចំការមន បន្ទាប់ពីថ្នាំវ៉ាក់សាំងនេះបានមកដល់ប្រទេសកម្ពុជា។ ថ្នាំវ៉ាក់សាំងនឹងត្រូវប្រើប្រាស់ ជាជំហានដំបូង នៅក្នុងរាជធានីភ្នំពេញ ខេត្តកណ្តាល កំពង់ស្ពឺ និងខេត្តកំពង់ឆ្នាំង។
ចុះផ្សាយនៅថ្ងៃ៖
យុទ្ធនាការចាក់ថ្នាំវ៉ាក់សាំងការពារជំងឺផ្តាសាយប្រភេទថ្មីA/H1N1 ដែលគេនិយមហៅថា ផ្តាសាយជ្រូកនោះ បានចាប់ផ្តើម ជាលើកដំបូងហើយ នៅកម្ពុជា នៅព្រឹកថ្ងៃពុធទី២៤មិនានេះ។ ពិធីផ្លូវការត្រូវបានរៀបចំធ្វើ នៅក្នុងមន្ទីរពេទ្យបង្អែកខណ្ឌចំការមន ក្បែរវិមានឯករាជ្យ ដើម្បីចាក់ថ្នាំវ៉ាក់សាំងនេះទៅលើក្រុមពលរដ្ឋដែលមានជំងឺសួត រ៉ាំរ៉ៃ ស្ត្រីមានផ្ទៃពោះ និងកុមារដែលមានអាយុពី ៦ខែ ដល់២៤ខែ។ ក្រៅពីនេះ ក្រុមគ្រូពេទ្យ នៅទូទាំងប្រទេស ក៏ត្រូវទទួលការចាក់ថ្នាំវ៉ាក់សាំងនេះដែរ។ លោកម៉ម ប៊ុនហេង រដ្ឋមន្ត្រីក្រសួងសុខាភិបាល លោកភីតថឺ វ៉ាន់ម៉ារ៉េន(Pieter Van Marren) ប្រធានតំណាងអង្គការសុខភាពពិភពលោកប្រចាំកម្ពុជា និងលោក កែប ជុតិមាអភិបាលរាជធានីភ្នំពេញបានចូលរួមក្នុងពិធីផ្តើមយុទ្ធនាការ ចាក់ថ្នាំវ៉ាក់សាំងជំងឺផ្តាសាយប្រភេទថ្មីនេះ។
ថ្នាំវ៉ាក់សាំង A/H1N1ចំនួន៣សែនដប គឺជាជំនួយរបស់រដ្ឋាភិបាលបារាំងដែលផ្តល់មកអោយកម្ពុជាតាមរយៈ អង្គការសុខភាពពិភពលោក។ លោកភីតថឺ វ៉ាន់ម៉ារ៉េន ប្រធានតំណាងអង្គការសុខភាពពិភពលោកប្រចាំកម្ពុជាបានអត្ថាធិប្បាយថា ទស្សនៈរបស់អង្គការសុខភាពពិភពលោក គឺផ្តល់វ៉ាក់សាំងដល់ប្រទេសក្រីក្រ គឺមិនមែនចាក់ជូនដល់ប្រជាជនប្រទេសជឿនលឿនទេ ហើយទស្សនៈនេះក៏មានការគាំទ្រពីប្រទេសអភិវឌ្ឍន៍ និងបណ្តារោងចក្រនានាដែលបានខិតខំស្រាវជ្រាវ ផលិតវ៉ាក់សាំងនេះដែរ។
បើ តាមការបញ្ជាក់របស់លោកម៉ម ប៊ុនហេង រដ្ឋមន្ត្រីក្រសួងសុខាភិបាល យុទ្ធនាការចាក់ថ្នាំវ៉ាក់សាំង A/H1N1 ដំណាក់កាលទី២ នឹងធ្វើលើខេត្តចំនួន២០ទៀត នៅពេលក្រសួងសុខាភិបាលបានទទួលវ៉ាក់សាំងគ្រប់គ្រាន់។ លោករដ្ឋមន្ត្រីសុខាភិបាលបានរម្លឹកថា ជំងឺផ្តាសាយថ្មីនេះ បានរីករាលដាលស្ទើរពេញពិភពលោក ចាប់ឮពីខែមិថុនា ឆ្នាំ២០០៩មក ដោយបណ្តាលឲ្យមនុស្សស្លាប់ចំនួនជាង ១៦ ០០០នាក់។ ហើយនៅប្រទេសកម្ពុជាវិញ គិតត្រឹមថ្ងៃទី១២ មីនា កម្ពុជាមានអ្នកជំងឺនេះចំនួន ៥៦៦ ករណី ក្នុងនោះ ៦នាក់បានបាត់បង់ជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ