តុលាការខ្មែរក្រហម ជំនុំជម្រះរឿង ខៀវ សំផន សុំនៅក្រៅឃុំ ជាលើកទី៣
អង្គបុរេជំនុំជម្រះ របស់តុលាការខ្មែរក្រហម បានបើកសវនាការ ជំនុំជម្រះលើបណ្តឹង ឧទ្ធរណ៍របស់លោក ខៀវ សំផន ប្រឆាំងនឹងដីកាឃុំខ្លួនបណ្តោះអាសន្ន ជាលើកទី៣ នៅព្រឹកថ្ងៃសុក្រ ទី១២កុម្ភៈនេះ។ លោក ខៀវ សំផន បានប្រកែកជំទាស់ថា ក្នុងនាមជាប្រមុខរដ្ឋ ខ្លួនមិនមានអំណាចអ្វី លើការសម្លាប់ជីវិតមនុស្សជិត ២ លាននាក់ ក្នុងសម័យខ្មែរក្រហមនោះឡើយ។
ចុះផ្សាយនៅថ្ងៃ៖
សវនាការនេះ ជាលើកទី៣ ហើយ ដែលអតីតប្រមុខរដ្ឋសម័យខ្មែរក្រហម អាយុ ៧៨ ឆ្នាំ លោក ខៀវ សំផន បានប្តឹងសុំនៅក្រៅមន្ទីរឃុំឃាំងរបស់តុលាការខ្មែរក្រហម។
លោក ខៀវ សំផន ត្រូវបាននាំខ្លួន មកឃុំឃាំងនៅតុលាការខ្មែរក្រហម កាលពីថ្ងៃទី១៩ វិច្ឆិកា ឆ្នាំ២០០៧។ បើតាមច្បាប់ ដីកាបន្តឃុំខ្លួនអតីតមេខ្មែរក្រហម មានសុពលភាព រយៈពេល ១ ឆ្នាំ ហើយចៅក្រមស៊ើបអង្កេត ក៏អាចចេញដីកាសម្រេចបន្តឃុំខ្លួនជនត្រូវចោទ ជាមេខ្មែរក្រហម បានរយៈពេលតែ ៣ ឆ្នាំប៉ុណ្ណោះ។
មេធាវីការពារលោក ខៀវ សំផន គឺលោកមេធាវី ស សូវ៉ាន ទាមទារឲ្យតុលាការដោះលែងរូបលោក ចេញពីមន្ទីរឃុំឃាំងរបស់តុលាការខ្មែរក្រហម ឬក៏ដាក់ឲ្យគាត់ ជាប់ឃុំនៅផ្ទះ ដោយស្ថិតក្រោមការត្រួតពិនិត្យរបស់តុលាការ។ លោកមេធាវី បានធានាប្រាប់តុលាការនៅថ្ងៃនេះថា លោក ខៀវ សំផន មិនរត់គេចទៅណាទេ។ បើលែងលោក ខៀវ សំផន ក៏មិនប៉ះពាល់ដល់សុវត្ថិភាពផ្ទាល់ខ្លួនគាត់ ឬក៏នាំដល់ការចលាចលសន្តិសុខសង្គមនោះឡើយ។
លោកមេធាវីជនជាតិ បារាំង ហ្សាក់ វែរហ្សែស ដែលជាមេធាវីអន្តរជាតិការពារលោក ខៀវ សំផន មិនបានបង្ហាញខ្លួនទេ នៅក្នុងសវនាការកាលពីព្រឹកថ្ងៃសុក្រនោះ។
ចំណែក ភាគីតំណាងព្រះរាជអាជ្ញា និងក្រុមមេធាវីការពារជនរងគ្រោះ បានលើកឡើងនូវទឡ្ហីករណ៍ផ្លូវច្បាប់ដដែលៗ ដើម្បីជំទាស់នឹងបំណងចង់នៅក្រៅឃុំរបស់លោក ខៀវ សំផន។ ជាពិសេសគឺបើដោះលែងលោក ខៀវ សំផន និងប៉ះពាល់ដល់សុវត្ថិភាពរបស់លោក ព្រោះថា មកទល់នឹងពេលនេះ គេនៅតែមានអារម្មណ៍ចងកំហឹង ចង់សងសឹកនឹងមេខ្មែរក្រហមនៅឡើយ ។
នៅមុនពេលបិទសវនាការ លោក ខៀវ សំផន ក្នុងសំដីចុងក្រោយបានប្រកែកជំទាស់ នឹងបទចោទប្រកាន់លើរូបលោក ក្នុងរឿងឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មប្រល័យពូជសាសន៍ ដែលនាំដល់ការសម្លាប់មនុស្សជិត ២ លាននាក់ ក្នុងរបបខ្មែរក្រហម។
នៅថ្ងៃនេះ និងជាលើកដំបូង ដែលលោក ខៀវ សំផន បានថ្លែងការពារខ្លួនជាសាធារណៈ ដោយសម្លេងញ័រៗ តែឮខ្លាំងៗ និងលើកដៃជាកាយវិការផង។ ក្នុងឋានៈជាប្រមុខរដ្ឋ ឬ ប្រធានរដ្ឋសម័យខ្មែរក្រហម បន្តវេនពីសម្តេចឪ នរោត្តម សីហនុ លោក ខៀវ សំផន អះអាងថា ខ្លួនគ្មានអំណាចអ្វីទាល់តែសោះ ពិសេសក្នុងរឿងសម្លាប់មនុស្សនៅជំនាន់នោះ។
យ៉ាងណាក៏ដោយ សេចក្តីសម្រេចលើរឿងលោក ខៀវ សំផន នឹងត្រូវប្រកាសនាពេលក្រោយ។ កាលពីថ្ងៃព្រហស្បតិ៍ ទី១១កុម្ភៈ តុលាការខ្មែរក្រហម ក៏បានបើកសវនាការលើករណីសុំនៅក្រៅឃុំរបស់ អៀង សារី អតីតរដ្ឋមន្ត្រីការបរទេសខ្មែរក្រហម។ ចំណែកនៅថ្ងៃច័ន្ទ ទី១៥កុម្ភៈ ឆ្នាំ២០១០ ដល់វេនលោកស្រី អៀង ធីរិទ្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ