សម្ពោធស្ថានីយ៍ចម្រោះទឹកសំណល់និងប្រព័ន្ធលូនៅសៀមរាប
នៅថ្ងៃនេះ រដ្ឋាភិបាលកម្ពុជា និងធនាគារអភិវឌ្ឍន៍អាស៊ី បានបើកដាក់ឲ្យប្រើប្រាស់នូវស្ថានីយ៍ច្រោះសម្អាតទឹកសំណល់ និងប្រព័ន្ធលូបង្ហូរទឹក ក្នុងខេត្តសៀមរាប។ សមិទ្ធិផលដែលមានតម្លៃជាង ១០លានដុល្លារនេះសាងសង់ឡើង ដើម្បីដោះស្រាយបញ្ហាទឹកជំនន់ដ៏ធ្ងន់ធ្ងរ ដែលតែងតែកើតមាន ក្នុងតំបន់ទេសចរណ៍អង្គរវត្តដ៏ល្បីល្បាញរបស់កម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
សំឡេងរបស់លី ម៉េងហួរ
គម្រោងកែលម្អប្រព័ន្ធចម្រោះទឹកសំណល់ និងប្រព័ន្ធលូ នៅតំបន់ទេសចរណ៍អង្គរវត្ត ខេត្តសៀមរាបទទួលបានថវិកា កម្ចីសម្បទាន ចំនួន ១០,៩៣ លានដុល្លារអាមេរិក ពីធានាគារអភិវឌ្ឍន៍អាស៊ី រួមទាំងថវិកាបដិភាគ របស់រដ្ឋាភិបាលកម្ពុជា ចំនួន ៦ លាន ៨ សែន ២ ម៉ឺន ដុល្លារអាមេរិកសំរាប់សាងសង់ហេដ្ឋារចនាសម្ព័ន្ធ ប្រព័ន្ធលូ អាងចម្រោះទឹក និងដោះស្រាយផលប៉ះពាល់ដល់ប្រជាជន។
គម្រោងថ្មីដែលបានបើកឲ្យដំណើរការ នៅព្រឹកថ្ងៃទី២២ ខែមេសា ឆ្នាំ២០១០ រួមមានការធ្វើប្រព័ន្ធបង្ហូរទឹកក្នុងក្រុង នៅផ្នែកខាងលិចខេត្តសៀមរាប និងស្ថានីយ៍ចម្រោះទឹកសំណល់មួយ ដែលមានបឹងរក្សាកម្រិតទឹក សម្រាប់ចម្រោះកាកសំណល់តាមផ្ទះ និងតាមអាជីវកម្មនានា ក្នុងខេត្តសៀមរាប។
ខេត្តសៀមរាប ជាតំបន់ទេសចរណ៍ដ៏ល្បីល្បាញបានទទួលរងគ្រោះ ដោយទឹកជំនន់ជាញឹកញាប់ នៅរដូវវស្សា។ ពេលភ្លៀងម្តងៗ នៅតំបន់ព្រៃ និងភ្នំគូលេន ទឹកបានហូរមកប្រមូលផ្ដុំ មកកាន់ទីរួមខេត្ត តាមស្ទឹងសៀមរាប ទើបបន្ដហូរចូលទៅក្នុងបឹងទន្លេសាប។ ពេលខ្លះ តំបន់ប្រាង្គប្រាសាទមួយនេះ ត្រូវរងគ្រោះដោយទឹកជំនន់ទន្លេសាប។ ក្នុងរយៈពេលកន្លងមក ដោយសារតែប្រព័ន្ធលូបង្ហូរទឹកមានសភាពចាស់ទ្រុឌទ្រោម មិនអាចរំដោះទឹកជំនន់បានទេ។
ផ្លូវសំខាន់ៗ និងសណ្ឋាគារមួយចំនួន ត្រូវលិចលង់។ ការលិចលង់ទាំងអស់នេះបានបង្កការគម្រាមកំហែង ចំពោះសុវត្ថិភាព និងសុខភាពសាធារណៈ បង្កបញ្ហាចំពោះការប្រើប្រាស់ផ្លូវថ្នល់ ជាពិសេសប៉ះពាល់យ៉ាងធ្ងន់ធ្ងរដល់វិស័យទេសចរណ៍របស់កម្ពុជា។
ការកែលំអប្រព័ន្ធគ្រប់គ្រងទឹកសំណល់ និងប្រព័ន្ធលូបង្ហូរទឹកនេះ នឹងដោះស្រាយវិបត្តិលិចលង់ទីរួមខេត្តទេសចរណ៍ដ៏សំខាន់នេះ។ មិនត្រឹមតែជួយដល់វិស័យទេសចរណ៍ក្នុងប្រទេសប៉ុណ្ណោះទេ ប៉ុន្តែគម្រោងថ្មីនេះ ក៏ស្ថិតនៅក្នុងក្របខណ្ឌអភិវឌ្ឍន៍ទេសចរណ៍របស់មហាអនុតំបន់ទន្លេមេគង្គ ដែលរួមមាន៖ ប្រទេសកម្ពុជា ចិន ឡាវ ភូមា ថៃ និងវៀតណាម។
នាយកធានាគារអភិវឌ្ឍន៍អាស៊ី លោក ពូទូ កាម៉ាយ៉ាណា បានលើកឡើងក្នុងសេចក្តីប្រកាសនៅថ្ងៃនេះថា ការកែលម្អហេដ្ឋារចនាសម្ព័ន្ធក្នុងប្រទេសតំបន់ទន្លេមេគង្គ គឺជាការងារមួយយ៉ាងសំខាន់ ដើម្បីទាក់ទាញភ្ញៀវទេសចរបន្ថែមទៀត។
ចំណែកលោកនាយករដ្ឋមន្ត្រីហ៊ុន សែន ក្នុងពិធីនៅព្រឹកមិញ ក៏បានលើកឡើងថា ប្រព័ន្ធលូ និងស្ថានីយ៍ចម្រោះទឹកកាកសំណល់នេះ មានតួនាទីយ៉ាងសំខាន់ សំរាប់រួមចំណែកជំរុញកំណើនសេដ្ឋកិច្ច ការអភិវឌ្ឍន៍សង្គម និងជួយលើកស្ទួយដល់កិត្ដិយសប្រទេសកម្ពុជាទៀតផង។
ក៏ប៉ុន្តែ សមិទ្ធិផលប្រព័ន្ធចម្រោះទឹក និងប្រព័ន្ធលូបង្ហូរទឹកកខ្វក់រាប់ពាន់ម៉ែត្រ ដែលបើកឲ្យប្រើប្រាស់ នៅថ្ងៃនេះ គ្រាន់តែជួយរំដោះទឹកចេញពីខេត្តសៀមរាបបានមួយផ្នែកប៉ុណ្ណោះ។ រដ្ឋាភិបាលកម្ពុជាកំពុងរៀបចំគូសប្លង់សាងសង់បន្ថែមនូវប្រព័ន្ធលូសំអាតទឹកសំណល់ និងកែលំអស្ទឹងសៀមរាប ក្រោមប្រាក់កម្ចីសម្បទានពីប្រទេសកូរ៉េចំនួន ៣០លាន ដុល្លារអាមេរិក។ គំរោងថ្មីនេះ អាចនឹងចាប់ផ្តើមនៅឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ