កុនខ្មែរដាក់បញ្ចាំងនៅមហោស្រពភាពយន្តអន្តរជាតិ
នៅក្នុងមហោស្រពភាពយន្តអន្តរជាតិ នៅទីក្រុងកានឆ្នាំនេះ នឹងមានដាក់បញ្ចាំងកុនឯកសារមួយរបស់ខ្មែរ គឺកុនមានចំណងជើងថា រំឭកអំពីឳពុករបស់ខ្ញុំ ដែលដឹកនាំថតដោយលោក Guillaume Suon ។ សេង ឌីណា បានជួបសម្ភាសជាមួយលោក Guillaume Suon ក៏កំពុងស្ថិតនៅក្នុងទីក្រុងកាននោះដែរ។
ចុះផ្សាយនៅថ្ងៃ៖ កែប្រែថ្ងៃទី៖
បទយកការណ៍របស់ សេង ឌីណា ពីទីក្រុងកាន
រឿង រំឭកពីឳពុកខ្ញុំ រៀបរាប់អំពីការព្យាយាមរបស់លោកស្រីភឹង ស៊ុនថារី ក្នុងការស្វែងរកការពិត ជុំវិញការស្លាប់របស់ឳពុករបស់លោកស្រី គឺលោកអតីតសាស្រ្តាចារ្យ ភឹង តុន។ តាមរយៈឯកសារ និងរូបថត នៅគុកទួលស្លែង លោកស្រីស៊ុនថារី បានដឹងត្រឹមតែថា ឳពុកលោកស្រីត្រូវបានគេចាប់យកទៅដាក់ក្នុងគុកទួលស្លែង ដោយមានពាក់លេខ ១៧ ជាសម្គាល់។ ក៏ប៉ុន្តែ ឳពុកលោកស្រីស្លាប់នៅថ្ងៃណា? ស្លាប់ដោយជំងឺ ឬដោយទារុណកម្ម? សាកសពកប់នៅឯណា? គឺជាសំណួរដែលលោកស្រីព្យាយាមស្វែងរកចម្លើយ។
លោកស្រីបានដាក់ពាក្យបណ្តឹងសុំតាំងខ្លួនជាដើមបណ្តឹងរដ្ឋប្បវេណី ក្នុងសំណុំរឿងកាត់ទោស ឌុច អតីតមេគុកទួលស្លែង។ នៅក្នុងសវនាការ លោកស្រីបានឈ្លេចសួរឌុច ពីរឿងឳពុកលោកស្រី។ ក៏ប៉ុន្តែ អ្វីដែលឌុចឆ្លើយ ភាគច្រើនគឺ “ខ្ញុំមិនបានដឹង” ...
រឿង រំឭកពីឳពុកខ្ញុំ នឹងត្រូវដាក់បញ្ចាំងនៅក្នុងផ្សារភាពយន្ត នៃមហោស្រពភាពយន្តអន្តរជាតិ ទីក្រុងកាន (Cannes) នៅថ្ងៃទី២០ ឧសភា ២០១០ ខាងមុខ។ លោកហ្គីយ៉ូម សួន ដែលជាអ្នកថតភាពយន្តនេះ ត្រូវបានជ្រើសរើសឲ្យចូលក្នុងគណៈប្រតិភូមួយក្រុមរបស់Pavillon les cinémas du mondeដែលមានសមិទ្ធិករភាពយន្តចំនួន១២រូបមកពីបណ្តាប្រទេសនានាដែលវិស័យភាពយន្តមិនសូវរីកចម្រើន។
ឆ្លៀតយកឱកាសមហោស្រពភាពយន្តអន្តរជាតិដ៏ល្បីល្បាញ ដែលចូលរួមដោយអ្នកជំនាញអាជីពខាងភាពយន្តល្បីៗនេះ លោកហ្គីយ៉ូម សួន គ្រោងនឹងធ្វើការផ្សព្វផ្សាយភាពយន្តឯកសារ រំឭកពីឳពុកខ្ញុំ ឲ្យបានច្រើនបំផុត តាមតែអាចធ្វើទៅបាន។
លោកហ្គីយ៉ូម សួន ក៏បានប្រាប់ឲ្យដឹងផងដែរថា ក្រៅពីកុនឯកសារ ដែលនិយាយពីប្រវត្តិសាស្រ្ត លោក រួមជាមួយនឹងមជ្ឈមណ្ឌលបូផាណា ក៏មានគម្រោងថតកុន ដែលនិយាយពីសង្គមខ្មែរ នាពេលបច្ចុប្បន្ននេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ