សម្ព័ន្ធភាពហ៊្វុនស៊ិនប៉ិច-ជាតិនិយមលេចចេញជារូបរាងនៅថ្ងៃចន្ទសប្តាហ៍ក្រោយ
បន្ទាប់ពីបានចំណាយពេលជាច្រើនខែរួចមក គណបក្សទាំងពីរហ៊្វុនស៊ិនប៉ិច-ជាតិនិយម នឹងចុះហត្ថលេខាបង្កើតសម្ព័ន្ធភាពជាផ្លូវការនៅថ្ងៃចន្ទខាងមុននេះ។ ការបង្កើតសម្ព័ន្ធភាពរបស់ គណបក្សជាតិនិយមនិងហ៊្វុនស៊ិនប៉ិចនៅពេលនេះ គឺ ក្នុងគោលដៅប្រមែប្រមូលសំឡេង ឆ្នោតដែលបានបាត់បង់កាលពីការបោះឆ្នោតនាពេលកន្លងមក។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គី សុខលីម
ដើម្បីបញ្ចប់ការទន្ទឹងរង់ចាំមើលរបស់មហាជននោះ តំណាងគណបក្សហ៊្វុនស៊ិនប៉ិច និងគណបក្សជាតិនិយមដែលជាអតីតគណបក្ស នរោត្តមរណឫទ្ធិ បានបញ្ជាក់ប្រាប់នៅព្រឹកថ្ងៃសៅរ៍នេះថា ការចុះហត្ថលេខាបង្កើតសម្ព័ន្ធភាពជាផ្លូវការនឹងប្រព្រឹត្តធ្វើឡើងនៅថ្ងៃចន្ទសប្តាហ៍ក្រោយនេះ នៅវេលាម៉ោង៣រសៀលនៅក្នុងទីស្នាក់ការកណ្តាលរបស់គណបក្សហ៊្វុនស៊ិនប៉ិច។
ការសម្រេចប្រកាសសម្ព័ន្ធភាពជាផ្លូវការនៅពេលនេះ បានធ្វើឡើងបន្ទាប់ពីគណបក្សទាំងពីរបានចំណាយពេលជិត៧ខែ ដើម្បីធ្វើការចរចា និងបានចំណាយកិច្ចប្រជុំផ្លូវការ និងមិនផ្លូវការជាច្រើនលើកច្រើនសាថែមទៀតផង។
សម្ព័ន្ធភាពនេះមានឈ្មោះជាផ្លូវការថាសម្ព័ន្ធភាពហ៊្វុនស៊ិនប៉ិច-ជាតិនិយម។ ជាតិនិយមនេះគឺជាឈ្មោះប្តូរមកពីគណបក្ស នរោត្ត រណឫទ្ធិ ដែលធ្លាប់ដឹកនាំដោយព្រះអង្គម្ចាស់ នរោត្តម រណឫទ្ធិ។
លោក ប៉ែន សង្ហា អ្នកនាំពាក្យគណបក្សជាតិនិយមបាននិយាយថា ការសម្រេចជ្រើសរើសបេក្ខភាពថ្នាក់ដឹកនាំសម្ព័ន្ធភាពអាចធ្វើឡើងនៅព្រឹកថ្ងៃចន្ទឯណោះ។
លោក ប៉ែន សង្ហា និង លោក កែវ ពុទ្ធរស្មី ប្រធានគណបក្សហ៊្វុនស៊ិនប៉ិចបានបញ្ជាក់ប្រាប់ដូចគ្នានៅថ្ងៃសៅរ៍នេះថា ជាគោលការណ៍គណបក្សទាំងពីរមានបំណងចង់រំលាយបញ្ចូលគ្នានៅមុនការបោះឆ្នោតឃុំសង្កាត់នៅឆ្នាំ២០១២ ឬការបោះឆ្នោតតំណាងរាស្រ្តនៅឆ្នាំ២០១៣ខាងមុខនេះ។ ប៉ុន្តែត្រង់ចំណុចនេះគណបក្សទាំងពីរមិនទាន់បានចរចាអោយលម្អិតនៅឡើយទេ។
លោក ប៉ែន សង្ហា បានបញ្ជាក់ទៀតថា ប្រសិនបើគណបក្សទាំងពីរមិនបែកបាក់គ្នាទេនោះ គណបក្សទាំងពីរអាចទទួលបានកៅអីនៅក្នុងរដ្ឋសភាជាតិរហូតទៅដល់១៧កៅអីឯណោះ សម្រាប់ការបោះឆ្នោតជាតិឆ្នាំ២០០៨កន្លងមក ប៉ុន្តែដោយសារគណបក្សហ៊្វុនស៊ិនប៉ិចបែកចេញជាពីរ។ ដូច្នេះគណបក្សជម្លោះពីរនេះទទួលបានកៅអីម្នាក់ៗតែពីរប៉ុណ្ណោះ។
គណបក្សហ៊្វុនស៊ិនប៉ិច កាលពីការបោះឆ្នោតឆ្នាំ១៩៩៣ទទួលកៅអីរដ្ឋសភា៥៨កៅអី។ ឆ្នាំ១៩៩៨គណបក្សទទួលបាន៤៣អាសនៈ។ ឆ្នាំ២០០៣គណបក្សទទួលបាន២៦កៅអី ប៉ុន្តែក្រោយការបែកបាក់ជាពីរ គណបក្សនីមួយៗទទួលបានកៅអីម្នាក់ៗតែ២ប៉ុណ្ណោះ។
លោក គល់ បញ្ញា នាយកប្រតិបត្តិនៃអង្គការសង្កេតការណ៍បោះឆ្នោតComfrelបានពន្យល់ថាការចងសម្ព័ន្ធភាពនេះគឺជាការពង្រឹងកម្លាំងផ្ទៃក្នុងរបស់គណបក្សខ្លួនឯងឡើងវិញផង និងម៉្យាងទៀតគឺជាការល្អក្នុងការថ្លឹងកម្លាំងនយោបាយក្នុងរបបនយោបាយសភាពហុបក្ស។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ