ព្រះអង្គម្ចាស់ធម្មិកោ៖ "កុំយកព្រះមហាក្សត្រទៅពាក់ព័ន្ធក្នុងជម្លោះនយោបាយ"
មុនការយាងចេញរបស់ព្រះមហាវីរៈក្សត្រ និងសម្តេចម៉ែទៅធ្វើព្រះរាជទស្សនកិច្ចនៅប្រទេសវៀតណាមដែលគ្រោងចាប់ ផ្តើមពីថ្ងៃអង្គារ៍ទី២២ដល់ថ្ងៃទី២៥មិថុនានោះ ព្រះអង្គម្ចាស់ស៊ីសុវត្ថិ ធម្មិកោ ព្រះរាជលេខាផ្ទាល់របស់សម្តេចឪនរោត្តម សីហនុបានត្រលប់មកបញ្ជាក់សារជាថ្មីម្តងទៀតប្រាប់អ្នកនយោបាយ និងតំណាងសង្គមស៊ីវិលមួយចំនួនមិនអោយយកសម្តេចឪទៅពាក់ព័ន្ធក្នុង បញ្ហាព្រំដែន។
ចុះផ្សាយនៅថ្ងៃ៖
បទអន្តរាគមន៍របស់លាង ដឺលុចពីទីក្រុងភ្នំពេញ
ក្នុងដំណើរយាងទៅធ្វើព្រះរាជទស្សនកិច្ចនៅប្រទេសវៀតណាមនោះ បើយោងតាមបន្ទូលរបស់ព្រះអង្គម្ចាស់ស៊ីសុវត្ថិ ធម្មិកោ ក៏នឹងមានព្រះរាជវត្តមានរបស់ព្រះមហាក្សត្រព្រះបាទព្រះបរមនាថ នរោត្តមសីហមុនីផងដែរ។
អំពីការអត្ថាធិប្បាយរបស់ព្រះអង្គម្ចាស់ស៊ីសុវត្ថិ ធម្មិកោ ដែលជាព្រះរាជលេខាផ្ទាល់របស់សម្តេចឪនរោត្តម សីហនុវិញ។ ព្រះអង្គម្ចាស់ធម្មិកោត្រូវមានបន្ទូលការពារព្រះមហាក្សត្រទាំងបីព្រះអង្គ ដោយសារតែនៅតែមានមតិលើកឡើង ស្នើអោយសម្តេចឪលើកឡើងអំពីបញ្ហាព្រំដែនពិភាក្សាជាមួយថ្នាក់ដឹកនាំវៀតណាម ក្នុងព្រះរាជទស្សនកិច្ចសម្តេចឪ នៅប្រទេសវៀតណាម។ ក្រៅពីលិខិតរបស់គណបក្សសម រង្ស៊ី នៅថ្ងៃច័ន្ទនេះ លោកសឺន ស៊ូប៊ែរ អនុប្រធានរណៈសិរ្សជាតិរំដោះប្រជាពលរដ្ឋខ្មែរក៏បានចេញផ្សាយសេចក្តីថ្លែងការណ៍មួយដែរ។
នៅក្នុងសេចក្តីប្រកាសនោះលោកសឺន ស៊ូប៊ែរបាននិយាយថា ប្រជាពលរដ្ឋខ្មែរ និងប្រជាពលរដ្ឋខ្មែរកម្ពុជាក្រោមទាំងអស់សង្ឃឹមថា ព្រះរាជទស្សនកិច្ចរបស់សម្តេចឪ សម្តេចម៉ែ និងព្រះមហាក្សត្រនៅប្រទេសវៀតណាមនឹងស្តែងចេញជាលទ្ធផលនៃសហប្រតិបត្តិការស្មោះត្រង់នឹងគ្នារវាងប្រទេសទាំងពីរ។ ហើយផ្តើមចេញពីកិច្ចសហប្រតិបត្តិការស្មោះត្រង់នឹងគ្នានេះ លោកសឺន ស៊ូប៊ែរអំពាវនាវដល់មេដឹកនាំប្រទេសវៀតណាមអនុវត្តការគ្រប់គ្រងរួមគ្នាជាមួយកម្ពុជា លើទឹកដីកោះត្រល់ និងទឹកដីកម្ពុជាក្រោម។
ព្រះអង្គម្ចាស់ធម្មិកោបានអំពាវនាវមិនអោយអ្នកនយោបាយ និងសង្គមស៊ីវិលយកព្រះនាមព្រះមហាក្សត្រ សម្តេចឪ និងសម្តេចម៉ែទៅពាក់ព័ន្ធបញ្ហានយោបាយ។ នយោបាយនៅត្រង់ថា សម្រាប់ព្រះអង្គម្ចាស់ធម្មិកោ លិខិតរបស់គណបក្សសម រង្ស៊ីផ្ញើថ្វាយសម្តេចឪនោះ មិនមានចរិតស្មោះត្រង់នោះទេ។ ព្រោះលិខិតនោះត្រូវបានគណបក្សសម រង្ស៊ីផ្សព្វផ្សាយទៅសារព័ត៌មាន មុនលិខិតនោះទៅដល់ព្រហស្ថរបស់សម្តេចឪទៅទៀត។ ប៉ុន្តែ ទោះយ៉ាងណាក៏ដោយ ព្រះអង្គម្ចាស់ធម្មិកោពន្យល់ថា ទាំងព្រះមហាក្សត្រ ទាំងសម្តេចឪ និងសម្តេចម៉ែ ព្រះអង្គទាំងបីមិនអាចលូកព្រហស្ថចូលក្នុងកិច្ចការរបស់រដ្ឋាភិបាលបានទេ។ លើកលែងតែមានការស្នើពីរដ្ឋាភិបាល។
ក្នុងសំណុំរឿងព្រំដែនដដែល ព្រះអង្គម្ចាស់ធម្មិកោបានមើលឃើញថា អ្វីដែលគណបក្សសម រង្ស៊ីបានលើកឡើងចំពោះរដ្ឋាភិបាល គឺជារឿងនយោបាយ។ ជាការប្រកួតប្រជែងផ្នែកនយោបាយដែលព្រះមហាក្សត្រមិនអាចលូកព្រហស្ថក្នុងជម្លោះកាន់ជើងម្ខាងៗនោះឡើយ។
លោកយឹម សុវណ្ណពន្យល់ថាបញ្ហាព្រំដែនដែលគណបក្សសម រង្ស៊ីរបស់លោកលើកឡើងនោះ គឺជាបញ្ហារបស់ជាតិទាំងមូល មិនមែនជាបញ្ហាគណបក្សនោះទេ។ ហើយការដែលគណបក្សរបស់លោកសរសេរលិខិតថ្វាយសម្តេចឪអោយលើកបញ្ហាព្រំដែនជាមួយថ្នាក់ដឹកនាំវៀតណាមនោះ គឺដោយសារគណបក្សលោកគោរពសម្តេចឪ ជឿជាក់លើព្រះរាជតំរិះដោះស្រាយរបស់សម្តេចឪក្នុងបញ្ហាទឹកដី ដូចជារឿងប្រាសាទព្រះវិហារជាដើម។
សង្គ្រាមប៉ាកានៅតែកើតមានបន្ត ជុំវិញព្រះរាជដំណើរទស្សនកិច្ចរបស់សម្តេចឪ សម្តេចម៉ែ និងព្រះមហាក្សត្រនៅប្រទេសវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ