មីទ្ទីញរម្លឹកខួបអនុស្សាវរីយ៍ លើកទី ៥៩ ថ្ងៃបង្កើតគណបក្សប្រជាជនកម្ពុជា
ថ្ងៃ ២៨ មិថុនា ឆ្នាំ១៩៥១- ថ្ងៃ ២៨ មិថុនា ឆ្នាំ២០១០ ថ្ងៃនេះ ជាខួបលើកទី៥៩ ឆ្នាំ នៃថ្ងៃបង្កើតគណបក្សប្រជាជនកម្ពុជា។ អង្គមីទ្ទិញនៅទីស្នាក់ការកណ្តាលគណបក្សប្រជាជនកម្ពុជា ក្នុងរាជធានីភ្នំពេញ នៅព្រឹកមិញ បានប្រារព្ធឡើងយ៉ាងអធិកអធមដូចរៀងរាល់ឆ្នាំ។ ក៏ប៉ុន្តែ លោកនាយករដ្ឋមន្ត្រី ហ៊ុន សែន អនុប្រធានគណបក្សប្រជាជនកម្ពុជា មិនបានចូលរួមក្នុងពិធីជួបជុំនោះទេ។ មូលហេតុ ត្រូវបានគេប្រកាសថា លោក ហ៊ុន សែន មានបញ្ហាសុខភាព។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ លី ម៉េងហួរ
គណបក្សប្រជាជនកម្ពុជា ត្រូវបានបង្កើតឡើងនៅតំបន់រំដោះ កាលពីថ្ងៃ ២៨មិថុនា ឆ្នាំ១៩៥១ មានឈ្មោះដើមថា បក្សប្រជាជនបដិវត្តន៍ខ្មែរ ដើម្បីតស៊ូប្រឆាំងពួកអាណានិគមបារាំង។ រហូតដល់ខែតុលា ឆ្នាំ១៩៩១ ទើបមានការកែប្រែឈ្មោះ ពីបក្សប្រជាជនបដិវត្តន៍កម្ពុជា មកជា គណបក្សប្រជាជនកម្ពុជា។
ថ្នាក់ដឹកនាំកំពូលៗរបស់គណបក្សប្រជាជន បានចូលរួមជាមួយកងទ័ពវៀតណាម ដើម្បីវាយផ្តួលរំលំរបបខ្មែរក្រហម នៅថ្ងៃ៧មករា ឆ្នាំ១៩៧៩ និងបានឡើងដឹកនាំប្រទេសកម្ពុជា មកដល់សព្វថ្ងៃ។
ក្នុងពិធីរម្លឹកខួប លើកទី៥៩ ថ្ងៃបង្កើតគណបក្សប្រជាជនកម្ពុជា នៅទីស្នាក់ការកណ្តាលគណបក្សប្រជាជនកម្ពុជា ក្នុងរាជធានីភ្នំពេញ នៅព្រឹកមិញ មានសកម្មជនជាថ្នាក់ដឹកនាំតាមមូលដ្ឋានរាប់រយនាក់ ពាក់មួក និងអាវយឺតស រូបសញ្ញា ទេវតាបាចផ្កា របស់គណបក្សប្រជាជនកម្ពុជា គណបក្សដៃគូសម្ព័ន្ធភាព ស្ថាប័នរដ្ឋ និងអង្គទូតនានា។ ពិធីនៅព្រឹកមិញ ប្រារព្ធឡើងក្រោមវត្តមានរបស់ថ្នាក់ដឹកនាំបក្សប្រជាជនកំពូលៗ រួមមាន៖ លោក ជា ស៊ីម ប្រធានគណបក្សប្រជាជនកម្ពុជា និងលោក ហេង សំរិន ប្រធានកិត្តិយសគណបក្សប្រជាជនកម្ពុជា។
ចំណែកលោកនាយករដ្ឋមន្ត្រី ហ៊ុន សែន អនុប្រធានគណបក្សប្រជាជនកម្ពុជា ដែលជាបុរសមានអំណាចខ្លាំង មិនបានបង្ហាញមុខ ក្នុងពិធីប្រចាំឆ្នាំ របស់គណបក្សកាន់អំណាចនោះទេ។ អវត្តមានរបស់លោកនាយករដ្ឋមន្ត្រី ហ៊ុន សែន នៅក្នុងពិធីដ៏មានអត្ថន័យរបស់គណបក្សប្រជាជនកម្ពុជា បានក្លាយជាប្រធានបទ ដែលមហាជនចាប់អារម្មណ៍យ៉ាងខ្លាំង។
ក៏ប៉ុន្តែអវត្តមានរបស់លោកនាយករដ្ឋមន្ត្រី ហ៊ុន សែន ក្នុងពិធីបក្ស នៅថ្ងៃនេះ ត្រូវបានគេប្រកាសថា ដោយសារតែ លោក ហ៊ុន សែន ដែលមានអាយុ ៦០ ឆ្នាំគត់ នៅឆ្នាំនេះ មានបញ្ហាសុខភាព។ បញ្ហាសុខភាពរបស់លោកនាយករដ្ឋមន្ត្រី ហ៊ុន សែន ត្រូវបានលោក ជាម យៀប សមាជិកគណៈអចិន្ត្រៃយ៍គណបក្សប្រជាជនកម្ពុជា បានឲ្យដឹងថា ភ្នែករបស់លោកនាយករដ្ឋមន្ត្រី ដែលពិការ ធ្វើទុក្ខ ហើយគួបផ្សំនឹងធាតុអាកាសមិនសូវល្អ ធ្វើឲ្យលោកនាយករដ្ឋមន្ត្រី ផ្តាសាយធំ។ លោកសម្រាកនៅផ្ទះ និងព្យួរស៊ឺរ៉ូម។ មិនធ្ងន់ធ្ងរទេ តែ២-៣ ថ្ងៃទៀត ជាសះស្បើយវិញហើយ។ កាលពីប៉ុន្មានថ្ងៃមុននេះ លោកនាយករដ្ឋមន្ត្រី ហ៊ុន សែន បានប្រកាសជាញឹកញាប់ថា លោកឈឺភ្នែក ខាងស្តាំ ដែលពិការដោយសារតែសង្គ្រាម ក្នុងរបបខ្មែរក្រហម អំឡុងចុងឆ្នាំ១៩៧៨។
អវត្តមានរបស់លោកនាយករដ្ឋមន្ត្រី ហ៊ុន សែន ក្នុងពិធី គណបក្សប្រជាជនកម្ពុជា នៅព្រឹកមិញ ក៏ត្រូវបានមជ្ឈដ្ឋានខ្លះយល់ថា មកពីជម្លោះ បែកបាក់ផ្ទៃក្នុងបក្សប្រជាជន។ ក៏ប៉ុន្តែនៅមុននេះ លោក ជាម យៀប បានបញ្ជាក់ថា មិនមានបញ្ហាជម្លោះ ឬបែកបាក់ផ្ទៃក្នុង កើតឡើងទេ។
យ៉ាងណាក៏ដោយ ក្នុងអង្គមីទ្ទីញ នៅព្រឹកមិញ លោកប្រមុខគណបក្សប្រជាជនកម្ពុជា ជា ស៊ីម បានអំពាវនាវដល់គណៈកម្មាធិការគណបក្សគ្រប់ថ្នាក់ និងមន្ត្រីគណបក្សគ្រប់ៗរូប ឲ្យបន្តពង្រឹងសាមគ្គីភាព ឯកភាពផ្ទៃក្នុង លុបបំបាត់រាល់ភាពអសកម្ម និងខិតខំពង្រីកតែអំពើល្អ។
នៅចំពោះមុខថ្នាក់ដឹកនាំ និងសកម្មជនរាប់រយនាក់ ក្នុងអង្គមីទ្ទីញ លោក ជា ស៊ីម ប្រធានគណបក្សប្រជាជនកម្ពុជា បានថ្លែងសុន្ទរកថា កម្រាស់ ៦ ទំព័រ និយាយរម្លឹកពីប្រវត្តិតស៊ូរបស់បក្ស និងសមិទ្ធផលនានា ដែលគណបក្សប្រជាជន សម្រេចបានក្នុងរយៈពេល ៥៩ ឆ្នាំ ជាពិសេស សកម្មភាព និងសមិទ្ធផល នៅក្នុងរយៈពេល ៣ ទសវត្សចុងក្រោយនេះ។
លោកប្រមុខគណបក្សប្រជាជន ក៏បានប្រកាសជំហរ គាំទ្រគោលនយោបាយ និងវិធានការដ៏ម៉ឺងម៉ាត់របស់រដ្ឋាភិបាល ក្នុងការបន្តប្រយុទ្ធប្រឆាំងអំពើពុករលួយ ការបង្ក្រាបបទល្មើសព្រៃឈើ និងជលផល ការបញ្ឈប់រាល់សកម្មភាពអនាធិបតេយ្យ ទន្ទ្រានយកដីរដ្ឋគ្រប់ប្រភេទ ការថែរក្សានិរន្តរភាពនៃបរិស្ថាន និងការធ្វើអាជីវកម្មលើធនធានធម្មជាតិ។
អំពីដំណើរការ កាត់ទោសមេខ្មែរក្រហម លោកប្រធានគណបក្សប្រជាជនកម្ពុជា ក៏បានប្រកាសជំហរគាំទ្រ ប៉ុន្តែលោកព្រមានចំពោះការប៉ុនប៉ងណាមួយ ដែលចង់ប្រើប្រាស់សាលាក្តីខ្មែរក្រហម ក្នុងបំណងមិនល្អ ធ្វើឲ្យប៉ះពាល់ដល់សន្តិភាព ស្ថិរភាព និងការបង្រួបបង្រួមជាតិ។
ក្នុងសំណុំរឿងព្រំដែនវិញ លោក ជា ស៊ីម ក៏បានប្រកាសគាំទ្រលើការងារខណ្ឌសីមា និងបោះបង្គោលព្រំដែនរវាងកម្ពុជា ជាមួយវៀតណាម និងជាមួយប្រទេសឡាវ។ ក៏ប៉ុន្តែលោក ជា ស៊ីម បានថ្កោលទោសយ៉ាងម៉ឺងម៉ាត់ ចំពោះការឃោសនា មួលបង្កាច់ ហើយបង្កសកម្មភាពរារាំង និងបំផ្លាញដំណើរការបោះបង្គោលព្រំដែនកម្ពុជាវៀតណាម ដោយលោកជា ស៊ីម ចាត់ទុកជាអំពើឧក្រិដ្ឋធ្ងន់ធ្ងរប្រឆាំងនឹងផលប្រយោជន៍ជាតិ។ គណបក្សប្រជាជន ក៏គាំទ្រចំពោះការដោះស្រាយបញ្ហាព្រំដែនជាមួយប្រទេសថៃ ដោយសន្តិវិធី នាពេលនេះ។
ជាចុងក្រោយ ក្នុងនាមគណបក្សប្រជាជនកម្ពុជា លោក ជា ស៊ីម ក៏បានបញ្ជាក់យ៉ាងឧឡារិកជាថ្មីទៀតនូវការគាំទ្រលោក ហ៊ុន សែន ជានាយករដ្ឋមន្ត្រី សម្រាប់អាណត្តិក្រោយៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ