សមយុទ្ធយោធាពហុសាសន៍២៦ប្រទេសនៅកម្ពុជាសប្តាហ៍ក្រោយ
នៅសប្តាហ៍ក្រោយនេះ ចាប់ពីថ្ងៃទី១៧កក្កដារហូតដល់ចុងខែកក្កដា កម្ពុជានឹងធ្វើជាម្ចាស់ផ្ទះរៀបចំសមយុទ្ធយោធាពហុសាសន៍មួយដែលមាន យោធាមកពីប្រទេសចំនួន២៦ចូលរួម។ សមយុទ្ធទ្រង់ទ្រាយធំលើកទី១នៅកម្ពុជានឹងត្រូវប្រព្រឹត្តទៅក្នុង ក្របខណ្ឌអង្គការសហប្រជាជាតិដើម្បីការពង្រឹងសន្តិសុខអន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ លាង ដឺលុច
ប្រទេសទាំង២៦នោះមានមកពីគ្រប់ទ្វីបនៅលើពិភពលោក សុទ្ធសឹងជាប្រទេសសមាជិកអង្គការសហប្រជាជាតិ។ ប្រទេសទាំងនោះរួមមាន ប្រទេសបង់ក្លាដេស ម៉ុងហ្គោលី នេប៉ាល់ ឥណ្ឌូនេស៊ី ហ្វីលីពីន តុងហ្កា ចិន បារាំង អាមេរិក អូស្ត្រាលី ឥណ្ឌា ថៃ កម្ពុជា ប្រុយនេ អ៊ីតាលី ជប៉ុន អាល្លឺម៉ង់ និងអង់គ្លេសជាដើម។ ហើយបើនិយាយពីចំនួនយោធាដែលនឹងត្រូវចូលរួមវិញនោះ មានចំនួនប្រមាណ១០៣៩នាក់។
បើតាមលោកឧត្តមសេនីយឯក ឈុំ សុជាតិ ដែលជាអ្នកនាំពាក្យក្រសួងការពារជាតិ ប្រទេសដែលបញ្ជូនទាហានច្រើនជាងគេ ដើម្បីអោយចូលរួមក្នុងសមយុទ្ធពហុសាសន៍នេះ គឺមានកម្ពុជា និងសហរដ្ឋអាមេរិក។ ប៉ុន្តែប្រហែលជាធម្មតាទេសម្រាប់កម្ពុជា ព្រោះថា កម្ពុជាជាម្ចាស់ផ្ទះ ហើយថាអាមេរិកនោះជាអ្នកជួយរៀបចំផងដែរ។
សមយុទ្ធនេះត្រូវរៀបចំក្នុងក្របខណ្ឌអង្គការសហប្រជាជាតិដើម្បីបង្ហាញពីសមត្ថភាពនៃការពង្រឹងសន្តិសុខថ្នាក់តំបន់ ឬថ្នាក់អន្តរជាតិ។ ហើយថា នេះមិនមែនជាការរៀបចំលើកដំបូងនោះ។ សមយុទ្ធទ្រង់ទ្រាយធំយ៉ាងនេះ ត្រូវបានរៀបចំច្រើនលើករួចមកហើយ។ ហើយកម្ពុជាក៏បានបញ្ជូនកំលាំងយោធារបស់ខ្លួនទៅចូលរួមផងដែរ។
បើតាមការអះអាងរបស់អ្នកនាំពាក្យក្រសួងការពារជាតិ លោក ឈុំ សុជាតិ ការរៀបចំសមយុទ្ធនេះនៅកម្ពុជា គឺជាសំណូមពរ ឬក៏ការចង់បានរបស់អង្គការសហប្រជាជាតិតែម្តង។ លោក ឈុំ សុជាតិ មិនបានដឹងមូលហេតុពិតប្រាកដនោះយ៉ាងណាទេ។ ប៉ុន្តែលោកបង្ហើបអោយដឹងថា អង្គការសហប្រជាតិ និងប្រទេសធំៗមួយចំនួនធ្លាប់បានកោតសរសើរសមត្ថភាពកំលាំងយោធាកម្ពុជា ជាពិសេសក្រុមទាហានបោសសម្អាតមីន។ ហើយថា កម្ពុជាក៏មានគោលជំហរ និងឆន្ទៈមោះមុតក្នុងការចូលរួមរក្សាសន្តិភាពតំបន់ និងពិភពលោកផងដែរ។ ដូច្នេះ សម្រាប់អ្នកនាំពាក្យក្រសួងការពារជាតិ ទាំងនេះអាចជាមូលហេតុដែលនាំអោយមានការរៀបចំសមយុទ្ធអន្តរជាតិនៅក្នុងប្រទេសកម្ពុជានោះ។
កាលពីថ្ងៃទី៨កក្កដា អង្គការHuman Rights Watchបាននិយាយរិះគន់ទាំងអាមេរិកដែលបានគាំទ្រការរៀបចំសមយុទ្ធពហុសាសន៍នេះនៅកម្ពុជា ហើយក៏រិះគន់កម្លាំងប្រដាប់អាវុធកម្ពុជាថា មិនបានធ្វើការដើម្បីការពារសិទ្ធិមនុស្សទេ តែច្រើនពាក់ព័ន្ធនឹងការរំលោភសិទ្ធិអ្នកក្រីក្រទន់ខ្សោយវិញ។ កម្ពុជាមិនយកចិត្តទុកដាក់ទៅលើការរិះគន់របស់Human Rights Watch នេះទេ។ លោកឧត្តមសេនីយ ឈុំ សុជាតិ បានចាត់ទុកថា ការរិះគន់របស់ Human Rights Watchគឺជាការព្យាយាមបន្តុះបង្អាប់កម្ពុជា បន្តុះបង្អាប់កងយោធពលខេមរភូមិន្ទខ្មែរដែលកំពុងទទួលបានការសរសើរពីប្រទេសមហាអំណាចធំៗ មានតាំងពីអាមេរិក បារាំង អូស្ត្រាលីជាដើម។ អ្នកនាំពាក្យក្រសួងការពារជាតិបានបញ្ជាក់ថា បើប្រទេសធំៗទាំងនេះមិនមើលឃើញពីចំណុចល្អរបស់កងកម្លាំងប្រដាប់អាវុធកម្ពុជា មិនមែនពួកគេគាំទ្រអោយមានការរៀបចំសមយុទ្ធអន្តរជាតិនេះនៅកម្ពុជានោះទេ។
លោកឧត្តមសេនីយឯក ឈុំ សុជាតិ បានរៀបរាប់អោយដឹងថា សមយុទ្ធទ្រង់ទ្រាយធំនេះ នឹងត្រូវរៀបចំធ្វើ២ក្រុមផ្សេងគ្នាដែលមានរយៈពេល២សប្តាហ៍ឯណោះ។ ពោលគឺពីថ្ងៃទី១៧ដល់ថ្ងៃទី៣០ខែកក្កដានេះ។ អ្នកនាំពាក្យក្រសួងការពារជាតិបានប្រាប់ថា សមយុទ្ធក្រុមទីមួយនោះ គឺជាសមយុទ្ធថ្នាក់បញ្ជាការដ្ឋាន។ បានន័យថា ជាការហ្វឹកហាត់ការដាក់បញ្ជាពីបញ្ជាការដ្ឋានទៅសមរភូមិ។
រីឯសមយុទ្ធក្រុមទី២ គឺជាការធ្វើសមយុទ្ធនៅលានផ្ទាល់តែម្តងដែលនឹងប្រព្រឹត្តទៅនៅមូលដ្ឋានហ្វឹកហាត់កងកាំភ្លើងធំនៅក្នុងខេត្តកំពង់ស្ពឺ។ ក្នុងនោះក៏មានការអនុវត្តន៍លំហាត់ផ្នែកជួយសង្គ្រោះផ្នែកមនុស្សធម៌ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ