អង្គការឃ្លាំមើលសិទ្ធិមនុស្ស៖ អ្នកប្រកបមុខរបររកស៊ីផ្លូវភេទ ប្រឈមនឹងការចាប់ខ្លួន និងឃុំខ្លួន ដោយខុសច្បាប់
អង្គការឃ្លាំមើលសិទ្ធិមនុស្ស Human Rights Watch បានរកឃើញថា អ្នកប្រកបមុខរបររកស៊ីផ្លូវភេទ ប្រឈមនឹងការចាប់ខ្លួន និងឃុំខ្លួន ដោយខុសច្បាប់។ ក្នុងរបាយការណ៍កម្រាស់ ៧៦ ទំព័រដែលបានផ្សព្វផ្សាយនៅថ្ងៃអង្គារ ទី២០ កក្កដានេះ Human Rights Watch បានជម្រុញរដ្ឋាភិបាលកម្ពុជា ឲ្យបញ្ឈប់ជាបន្ទាន់នូវរាល់អំពើហិង្សាប្រឆាំងនឹងអ្នកប្រកបរបរ ផ្លូវភេទ និងបិទជាស្ថាពរនូវមជ្ឈមណ្ឌលសង្គមកិច្ច ដែលជាកន្លែងឃុំឃាំងអ្នកប្រកបរបរផ្លូវភេទទាំងនោះ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ លី ម៉េងហួរ ពីទីក្រុងភ្នំពេញ
របាយការណ៍ដែលមានចំណងជើងថា បង្ក្រាបអ្នកប្រកបមុខរបររកស៊ីផ្លូវភេទ នាំឲ្យមានការឃុំខ្លួនតាមអំពើចិត្ត និងអំពើរំលោភផ្សេងទៀត ប្រឆាំងនឹងអ្នកប្រកបរបររកស៊ីផ្លូវភេទ នៅក្នុងប្រទេសកម្ពុជា អង្គការឃ្លាំមើលសិទ្ធិមនុស្ស Human Rights Watch បានពិពណ៌នានូវរបៀបដែលអ្នកប្រកបរបររកស៊ីផ្លូវភេទ ប្រឈមនឹងការរំលោភដ៏រីករាលដាល មានជាអាទិ៍ ការវាយដំ អំពើជម្រិតយកលុយ និងអំពើរំលោភសេពសន្ថវៈ នៅក្នុងដៃអាជ្ញាធរ ជាពិសេស នៅក្នុងរាជធានីភ្នំពេញ។
អង្គការឃ្លាំមើលសិទ្ធិមនុស្សដែលមានមូលដ្ឋាននៅទីក្រុងញូយ៉ក សហរដ្ឋអាមេរិកមួយនេះ ក៏បានរកឃើញថា មន្ត្រីប៉ូលីសកម្ពុជា ពេលខ្លះ អាចប្រើច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ឆ្នាំ២០០៨ ដើម្បីបង្ក្រាបផ្ទះបន និងដើម្បីបិទបាំងកំហុសឆ្គងរបស់ខ្លួន ដែលបានយាយីលើស្ត្រីប្រកបរបរផ្លូវភេទ។
ការលើកឡើងនេះ Human Rights Watch បានផ្អែកលើការសម្ភាសន៍ និងការពិភាក្សាជាមួយក្រុមអ្នកប្រកបរបរផ្លូវភេទ ជាស្ត្រី និងស្រីស្រស់ ដែលជាក្រុមប្រុសខ្ទើយ ច្រើនជាង ៩០ នាក់នៅក្នុងរាជធានីភ្នំពេញ ខេត្តបាត់ដំបង បន្ទាយមានជ័យ និងនៅខេត្តសៀមរាប។
ក្នុងសន្និសីទកាសែតផ្សព្វផ្សាយរបាយការណ៍ នៅថ្ងៃអង្គារនេះ លោកស្រី អេឡេន ភាសុន ( Elaine Pearson ) នាយកស្តីទី ប្រចាំតំបន់អាស៊ីរបស់អង្គការឃ្លាំមើលសិទ្ធិមនុស្ស Human Rights Watch បានលើកឡើងថា អស់ពេលជាយូរមកហើយ ប៉ូលីស និងអាជ្ញាធរកម្ពុជាបានចាក់សោបង្ខំាងអ្នកប្រកបរបររកស៊ីផ្លូវភេទដោយខុសច្បាប់ វាយដំ និងរំលោភលើផ្លូវភេទរបស់ពួកគេ ហើយលួចលុយ និងទ្រព្យសម្បត្តិ ដែលមានជាប់ខ្លួន ក្រុមអ្នកប្រកបរបរផ្លូវភេទថែមទៀតផង។
ចំពោះការរកឃើញដូច្នេះ Human Rights Watch បានជម្រុញទៅកាន់រដ្ឋាភិបាលកម្ពុជា ឲ្យធ្វើសកម្មភាពបញ្ឈប់ជាបន្ទាន់ នូវរាល់អំពើហិង្សាប្រឆាំងនឹងអ្នកប្រកបរបរផ្លូវភេទ។ រដ្ឋាភិបាល ក៏គួរបិទជាស្ថាពរនូវមជ្ឈមណ្ឌលសង្គមកិច្ច នៅព្រៃស្ពឺ និងកោះគ ដែលស្ត្រីប្រកបរបររកស៊ីផ្លូវភេទទាំងឡាយ ត្រូវបានគេឃុំឃាំងខ្លួន ដោយខុសច្បាប់ និងដោយរំលោភនៅទីនោះ។ ម្យ៉ាងទៀត រដ្ឋាភិបាលកម្ពុជា ក៏គួរតែពិនិត្យ កែសម្រួលច្បាប់ ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ព្រោះច្បាប់នេះបានសម្របសម្រួលឲ្យប៉ូលីសប្រព្រឹត្តអំពើយាយី និងអំពើរំលោភបំពានលើក្រុមអ្នកប្រកបរបរផ្លូវភេទ ជាពិសេស ច្បាប់ឆ្នាំ២០០៨នោះបានហាមមិនឲ្យមានផ្ទះបនស្រី ជាចំហឡើយ។
ចំពោះរបាយការណ៍នេះ ត្រូវបានលោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃបានបដិសេធថា ប៉ូលីសមិនបានវាយដំ និងដេញចាប់ក្រុមអ្នកប្រកបរបរផ្លូវភេទទាំងដូចការលើកឡើងនោះទេ។ កន្លងមក អាជ្ញាធរសមត្ថកិច្ចប៉ូលីស គ្រាន់តែឃាត់ខ្លួនអ្នកទាំងនោះមិនឲ្យរកស៊ីផ្លូវភេទ ដោយឈរបោយដៃ នៅតាមផ្លូវសាធារណៈ និងសួនច្បារក្នុងរាជធានីភ្នំពេញ ជាដើម។ លោកឧត្តមសេនីយ៍ ខៀវ សុភ័គ បានបញ្ជាក់ថា ការឃាត់ខ្លួនក្រុមអ្នកប្រកបរបរផ្លូវភេទ ដើម្បីអប់រំ និងណែនាំ ដោយបញ្ជូនពួកគេទៅកាន់មជ្ឈមណ្ឌលស្តារនីតិសម្បទា។ នៅទីនោះ មិនមែនជាកន្លែងឃុំឃាំង និងវាយដំធ្វើទារុណកម្មទេ តែជាកន្លែងអប់រំ និងបង្រៀនវិជ្ជាជីវៈមួយសមស្រប ដូចជា វិជ្ជាជីវៈកាត់ដេរជាដើម។
យ៉ាងណាក៏ដោយ លោកឧត្តមសេនីយ៍ ខៀវ សុភ័គ បានគូសបញ្ជាក់ថា ច្បាប់កម្ពុជាមិនអនុញ្ញាតឲ្យមានការរកស៊ីផ្លូវភេទ ជារបរស្របច្បាប់ទេ មិនថា នារី បុរស ឬអ្នកភេទទី៣ទេ។ ម្យ៉ាងទៀត ប្រជាជនកម្ពុជាភាគច្រើនដាច់ខាត បានគាំទ្រច្បាប់ដែលមិនឲ្យមានការរកស៊ីផ្លូវភេទ ព្រោះរបរនេះប៉ះពាល់ទៅដល់សីលធម៌ និងប្រពៃណីដ៏ល្អប្រសើរបស់ប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ