បង្កើតសម្លេងរម្លឹករដ្ឋាភិបាលស្តីពីការកាត់បន្ថយភាពក្រីក្រ
អង្គការសង្គមស៊ីវិលនិងអាជ្ញាធរ បានផ្តើមរៀបចំកម្មវិធីនានាដើម្បីបង្កើតសម្លេងរម្លឹកទៅដល់ រដ្ឋាភិបាលអំពីការអនុវត្តន៍គោលដៅអភិវឌ្ឍន៍សហស្សវត្សរ៍ឆ្នាំ ២០១៥ ឆ្ពោះទៅរកការកាត់បន្ថយភាពក្រីក្រ។ សម្រាប់រយៈពេល៣ថ្ងៃ សាលារាជធានីភ្នំពេញ ដោយមានការគាំទ្រពីភ្នាក់ងារអង្គការសហប្រជាជាតិបានរៀបចំការ តាំងពិពណ៌ ការប្រគុំភ្លេងក្នុងប្រធានបទ ក្រោកឈរឡើង ធ្វើសកម្មភាព និងបង្កើតសម្លេងគាំទ្រគោលដៅអភិវឌ្ឍន៍សហស្សវត្សរ៍កម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាងដឺលុច
ចាប់ពីថ្ងៃទី១៧ដល់ថ្ងៃទី១៩កញ្ញា នៅក្នុងទីក្រុងភ្នំពេញ ខេត្តសៀមរាប ព្រៃវែង តាកែវ កំពង់ឆ្នាំង មានរៀបចំកម្មវិធីនិងសកម្មភាពជាច្រើនដោយអាជ្ញាធរ និងអង្គការសហប្រជាជាតិក្រោមប្រធានបទ "ក្រោកឈរឡើងធ្វើសកម្មភាព និងបង្កើតសម្លេងគាំទ្រគោលដៅសហស្សវត្សរ៍កម្ពុជា"។ ការរៀបចំប្រគុំភ្លេង តាំងពិពណ៌ និងសកម្មភាពនានាជាច្រើនទៀតគឺដើម្បីទាក់ទាញចំណាប់អារម្មណ៍សាធារណៈជន និងជាពិសេសរដ្ឋាភិបាលអំពីការសម្រេចគោលដៅសហស្សវត្សរ៍ឆ្នាំ២០១៥ក្នុងទិសដៅកាត់បន្ថយភាពក្រីក្រ។
១០ឆ្នាំហើយដែលប្រទេសក្នុងពិភពលោកចំនួន១៨៩ប្រទេស កាលពីឆ្នាំ២០០០បានចុះហត្ថលេខាព្រមព្រៀងអនុវត្តចំណុចសំខាន់ទាំង៨អោយបានជោគជ័យនៅឆ្នាំ២០១៥។ នៅថ្ងៃនេះ ប្រជាជននៃប្រទេសទាំងនោះកំពុងរៀបចំសកម្មភាពដូចគ្នាដើម្បីរម្លឹករដ្ឋាភិបាលរបស់ខ្លួនអោយខិតខំប្រឹងប្រែងអនុវត្តគោលដៅសហស្សវត្សរ៍ក្នុងរង្វង់៥ឆ្នាំទៅមុខទៀតនេះ។ នៅក្នុងពិធីដែលត្រូវបានរៀបចំនៅមុខវត្តបុទុមកាលពីរសៀលថ្ងៃសុក្រនេះ តំណាងអាជ្ញាធររាជធានីភ្នំពេញបានលើកឡើងអំពីការងាររបស់ខ្លួនក្នុងការជំរុញការចុះឈ្មោះចូលរៀនរបស់កុមារ ផ្តល់សេវាទឹកស្អាត និងការកសាងហេដ្ឋារចនាសម្ព័ន្ធនានាក្នុងរាជធានី។
ក្នុងរយៈពេល១០ឆ្នាំកន្លងមកនេះ កម្ពុជាបានទទួលលទ្ធផលល្អក្នុងការងារប្រយុទ្ធប្រឆាំងការឆ្លងមេរោគវអេដស៏។ លោក Pieter van Maarenតំណាងអង្គការសុខភាពពិភពលោក បានថ្លែងថា ក្នុងខួប១០ឆ្នាំនៃគោលដៅសហស្សវត្សរ៍នេះ វាក៏ជាឱកាសសម្រាប់រដ្ឋាភិបាលកម្ពុជា និងដៃគូអភិវឌ្ឍន៍ក្នុងការគិតគូរមើលលទ្ធផលដែលខ្លួនបានធ្វើកន្លងមក និងការអបអរចំពោះជោគជ័យដ៏គួរអោយកត់សម្គាល់សម្រាប់ចំណុចទី៦នៃគោលដៅសហស្សវត្សរ៍ស្តីពីការប្រយុទ្ធការឆ្លងរាលដាលនៃមេរោគអេដស៏។ តំណាងរដ្ឋាភិបាលកម្ពុជានឹងត្រូវទទួលរង្វាន់ពីអង្គការសហប្រជាជាតិនៅថ្ងៃទី១៩កញ្ញានេះ។
គោលដៅអភិវឌ្ឍន៍សហស្សវត្សរ៍ គឺជាគោលដៅ៨ចំណុចដែលពិភពលោកបានប្តេជ្ញាថា ធ្វើអោយបានសម្រេចនៅឆ្នាំ២០១៥ ការធ្វើអោយប្រសើរឡើងដល់ការរស់នៅរបស់ជនក្រីក្របំផុតក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ