ស្ពានបង់ប្រាក់ឆ្លងកាត់ទន្លេសាបលើកដំបូងបើកសម្ពោធជាផ្លូវការ
ស្ពានព្រែកព្នៅឆ្លងកាត់ទន្លសាបដែលជាការវិនិយោគរបស់ក្រុមហ៊ុនឯកជន ក្នុងស្រុកត្រូវបានបើកសម្ពោធដាក់ឲ្យប្រើប្រាស់ជាផ្លូវការហើយ នៅថ្ងៃចន្ទនេះ។ ស្ពានដែលមានប្រវែងជិត១០០០ម៉ែត្រនេះជាការវិនិយោគរបស់ក្រុមហ៊ុន L Y P Group របស់លោកលី យុងផាត់សមាជិកព្រឹទ្ធសភាគណបក្សប្រជាជន។ ស្ពាននេះគឺជាការវិនិយោគដោយការយកប្រាក់ពីរថយន្តដែលឆ្លងកាត់ ក្នុងរយៈពេល៣០ឆ្នាំ។ នេះជាស្ពានបង់ប្រាក់ទី២ដែលវិនិយោគដោយក្រុមហ៊ុន L Y P Group បន្ទាប់ពីស្ពានឆ្លងកាត់ដៃសមុទ្រនៅក្នុងខេត្តកោះកុង។
ចុះផ្សាយនៅថ្ងៃ៖
សេចក្តីរាយការណ៍របស់ ប៉ែន បូណា
នេះជាលើកដំបូងហើយដែលក្រុមហ៊ុនឯកជនមួយបានបោះទុនវិនិយោគសាងសង់ស្ពានឆ្លងកាត់ទន្លេសាបដ៏វែងអន្លាយដែលមានបណ្តោយ៩៩៦ម៉ែត្រនិងទទឹង១៤ម៉ែត្រ។ ស្ពាននេះឈ្មោះថាស្ពានព្រែកព្នៅដែលតភ្ជាប់រាជធានីភ្នំពេញត្រង់សង្កាត់ស្វាយប៉ាកខណ្ឌឬស្សីកែវទៅកាន់ស្រុកមុខកំពូលខេត្តកណ្តាល។
ក្រុមហ៊ុន L Y P Group របស់លោកឧកញ៉ាលី យុងផាត់ដែលជាសមាជិកព្រឹទ្ធសភាមកពីគណបក្សប្រជាជនគឺជាអ្នកបោះទុនវិនិយោគដោយចំណាយថវិកាជាង៤៣លានដុល្លារអាមេរិក។ ក្រុមហ៊ុននេះបានទទួលសិទ្ធិវិនិយោគលើស្ពានព្រែកព្នៅរយៈពេល៣០ឆ្នាំតាមរយៈការយកថ្លៃពីរថយន្តដែលឆ្លងកាត់ស្ពាន។ ប៉ុន្តែ អ្នកធ្វើដំណើរដោយថ្មើជើង ដោយកង់ ម៉ូតូ និងរ៉ឺម៉កកង់៣ នឹងមិនត្រូវគេទារប្រាក់ឡើយ។លោកនាយករដ្ឋមន្ត្រីហ៊ុន សែនដែលចូលរួមក្នុងពិធីសម្ពោធស្ពានព្រែកព្នៅនៅព្រឹកមិញបានបង្ហាញមោទនភាពចំពោះការចូលរួមរបស់វិស័យឯកជនក្នុងការកសាងហេដ្ឋារចនាសម្ព័ន្ធ។
សូមបញ្ជាក់ថាស្ពានព្រែកព្នៅនេះក៏ជាស្ពានដែលដើរតួយ៉ាងសំខាន់ជាអ្នកតភ្ជាប់ត្រើយខាងកើតទន្លេសាបទៅផ្លូវជាតិលេខ៥និងផ្លូវជាតិលេខ៤ដោយមិនចាំបាច់ឆ្លងកាត់រាជធានីភ្នំពេញឡើយ។ស្ពានព្រែកព្នៅគឺជាស្ពានឆ្លងកាត់ទន្លេសាបទី៣បន្ទាប់ពីស្ពានមិត្តភាពកម្ពុជាជប៉ុនអតីតស្ពានជ្រោយចង្វាដែលជាជំនួយរបស់ជប៉ុន និងស្ពានព្រែកក្តាមដែលជាជំនួយរបស់ចិន។
បើយោងតាមប្រសាសន៍របស់លោកនាយករដ្ឋមន្ត្រី ការដ្ឋានសាងសង់ស្ពានអ្នកលឿងឆ្លងកាត់ទន្លេមេគង្គដែលតភ្ជាប់ខេត្តកណ្តាលទៅខេត្តព្រៃវែងនិងខេត្តស្វាយរៀងនឹងត្រូវចាប់ផ្តើមនៅដើមឆ្នាំ២០១១ខាងមុខនេះហើយដោយប្រើប្រាស់ជំនួយជប៉ុន។ រដ្ឋាភិបាលក៏មានគំរោងសាងសង់ស្ពានជ្រោយចង្វាទី២មួយទៀតទន្ទឹមនឹងស្ពានចាស់ និងស្ពានឆ្លងកាត់ទន្លេបាសាក់មួយទៀតភ្ជាប់ក្រុងតាខ្មៅត្រើយខាងកើតផងដែរ។
ស្ពានព្រែកព្នៅជាស្ពានបង់ប្រាក់ទី២ដែលបោះទុនវិនិយោគដោយក្រុមហ៊ុន
L Y P Group បន្ទាប់ពីស្ពានឆ្លងកាត់ដៃសមុទ្រក្នុងខេត្តកោះកុងដែលត្រូវបានសម្ពោធដាក់ឲ្យប្រើប្រាស់កាលពីឆ្នាំ២០០៦។ ដើម្បីជាការអបអរចំពោះពិធីសម្ពោធស្ពានព្រែកព្នៅនៅថ្ងៃនេះ ក៏ដូចជាអបអរសាទរពិធីបុណ្យភ្ជុំបិណ្ឌនេះ លោកនាយករដ្ឋមន្ត្រីហ៊ុន សែនបានស្នើឲ្យក្រុមហ៊ុនអនុញ្ញាតឲ្យអ្នកឆ្លងកាត់ស្ពានទាំងអស់ដោយមិនបង់ប្រាក់រយៈពេល២៥ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ