ធនាគារអភិវឌ្ឍន៍អាស៊ីជួយកសាងហេដ្ឋារចនាសម្ពន្ធផ្លូវថ្នល់ និងប្រព័ន្ធធារាសាស្ត្រ
ធនាគារអភិវឌ្ឍន៍អាស៊ីប្រកាសផ្តល់ជំនួយ និងកម្ចីដើម្បីកសាងហេដ្ឋារចនាសម្ពន្ធផ្លូវថ្នល់ និងប្រព័ន្ធធារាសាស្ត្រនៅក្នុងប្រទេសកម្ពុជា។ អ្នកជំនាញនិយាយថា ប្រជាជនខ្មែរច្រើនសែននាក់នឹងទទួលបានផលប្រយោជន៍ពីគម្រោងផ្តល់ ជំនួយនិងកម្ចីនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់គី សុខលីម ពីទីក្រុងភ្នំពេញ
ធនាគារអភិវឌ្ឍន៍អាស៊ីបានប្រកាសពីការផ្តល់កម្ចី និងផ្តល់ជំនួយឥតសំណងប្រមាណជា ៧០លានដុល្លារអាមេរិកដល់ប្រទេសកម្ពុជាក្នុងការជួសជុលហេដ្ឋារចនាសម្ពន្ធផ្លូវថ្នល់ និងប្រព័ន្ធធារាសាស្ត្រមួយចំនួនឡើងវិញ។
នៅក្នុងសេចក្តីថ្លែងការណ៍ដាច់ដោយឡែកពីគ្នា ធនាគារអភិវឌ្ឍន៍អាស៊ីបានបញ្ជាក់ថា ខ្លួននឹងផ្តល់កម្ចី៣៥លានដុល្លារអាមេរិកដើម្បីជួសជុលផ្លូវនៅជនបទនៅក្នុងខេត្តចំនួន៧ដែលក្រីក្រជាងគេនៅជុំវិញបឹងទន្លេសាប។ បើយោងតាមសេចក្តីថ្លែងការណ៍ ប្រាក់កម្ចីនេះអាចជួសជុលផ្លូវជនបទឡើងវិញបានចម្ងាយជាង៥០០គីឡូម៉ែត្រ។
លោក Shihiru Date មន្ត្រីជាន់ខ្ពស់ផ្នែកដឹកជញ្ជូននៃធនាគារអភិវឌ្ឍន៍អាស៊ីបាននិយាយថា ការផ្តល់កម្ចីជួសជុលផ្លូវលំជនបទនេះ គឺមានគោលបំណងធ្វើអោយការចរាចរណ៍អាចដំណើរការបានពេញមួយឆ្នាំពីតំបន់កសិកម្មដាច់ស្រយាលមកទីប្រជុំជនខេត្តនិងពីតំបន់ខេត្តទៅកាន់តំបន់ផ្សេងៗទៀត។ ការជួសជុលផ្លូវលំឡើងវិញនេះអាចធ្វើឲ្យប្រជាជននៅតំបន់នោះចំនួនជាងកន្លះលាននាក់ទទួលបានផលប្រយោជន៍ពីគម្រោង។
ក្រៅពីគម្រោងជួសជុលផ្លូវជនបទ ធនាគារអភិវឌ្ឍន៍អាស៊ីបានបញ្ជាក់ផងដែរថា ខ្លួននឹងផ្តល់ជំនួយឥតសំណង កម្ចី និង ជំនួយបច្ចេកទេសគិតជាទឹកប្រាក់ប្រមាណជា៣៤លានដុល្លារអាមេរិកដើម្បីកែលម្អការគ្រប់គ្រងធនធានទឹក និងជួសជុលកែលម្អប្រព័ន្ធធារាសាស្ត្រមួយចំនួន។ ការធ្វើយ៉ាងនេះគឺដើម្បីពង្រឹងសន្តិសុខស្បៀង និងចូលរួមកាត់បន្ថយភាពក្រីក្រជូនប្រជាជនខ្មែរ។
ជំនួយរបស់ធនាគារអភិវឌ្ឍន៍អាស៊ីលើការជួសជុលផ្លូវលំនៅជនបទ និងការកែលម្អប្រព័ន្ធធារាសាស្ត្រនេះបានធ្វើឡើង ចំពេលដែលប្រទេសកម្ពុជាកំពុងជួបការលំបាកនៅក្នុងវិស័យទាំងពីរនេះ។
នាពេលកន្លងមក ដោយសារតែផ្លូវជនបទភ្ជាប់មកទីប្រជុំជនមានការលំបាក ផលិតផលកសិកម្មមួយចំនួនធំត្រូវបានឈ្មួញទិញក្នុងតម្លៃថោកបំផុត។ ផ្ទុយទៅវិញ ប្រជាជននៅក្នុងតំបន់នោះទិញទំនិញហូបចុកពីទីប្រជុំជនទៅវិញមានតម្លៃថ្លៃខ្ពស់ណាស់។
ទាក់ទងទៅនឹងកង្វះខាតប្រព័ន្ធធារាសាស្ត្រ រហូតមកដល់ពេលនេះ កសិករខ្មែរនៅតែធ្វើស្រែប្រវាស់នឹងមេឃដដែលមានន័យថា នៅពេលណាមានទឹកភ្លៀងគ្រប់គ្រាន់ ពេលនោះកសិករទទួលបានផលកសិកម្មល្អប៉ុន្តែនៅពេលណាអត់ទឹកភ្លៀង ពេលនោះដំណាំកសិកម្មនឹងក្រៀមស្វិតតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ