ប្រមុខរដ្ឋាភិបាលថៃ បង្ហាញឆន្ទៈចង់ដោះស្រាយជម្លោះព្រំដែនជាមួយកម្ពុជា
លោកនាយករដ្ឋមន្ត្រីថៃ អាប់ភិស៊ីត វេចាជីវ៉ា បានអះអាងថា រដ្ឋាភិបាលក្រុងបាងកក ព្យាយាមដោះស្រាយជម្លោះ ហើយចង់ឲ្យទំនាក់ទំនងកម្ពុជា-ថៃ មានភាពល្អប្រសើរឡើងវិញ។ ក្នុងនោះ កំណត់ហេតុនៃកិច្ចប្រជុំចរចារវាងរដ្ឋមន្ត្រីការបរទេសកម្ពុជា-ថៃ ក្នុងរឿងជម្លោះព្រំដែន នឹងត្រូវដាក់ទៅកាន់រដ្ឋសភា នាសប្តាហ៍ក្រោយ។ ការបង្ហាញឆន្ទៈចំពោះការដោះស្រាយជម្លោះព្រំដែន ដែលបានអូសបន្លាយជាងពីរឆ្នាំមកហើយដូច្នេះ បានធ្វើឡើង ក្នុងពេលនាយករដ្ឋមន្ត្រីថៃ ជួបជាមួយនឹងក្រុមអ្នកកាសែតកម្ពុជា កាលពីថ្ងៃទី១៩តុលាម្សិលមិញ នៅទីក្រុងបាងកក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
ការបញ្ជាក់ពីឆន្ទៈ ដើម្បីដោះស្រាយជម្លោះព្រំដែនជាមួយកម្ពុជាយ៉ាងដូច្នេះ បានធ្វើឡើង នៅចំពោះមុខក្រុមអ្នកកាសែតកម្ពុជា ដែលបានជួបសម្ភាសន៍ពិសេសជាមួយលោកនាយករដ្ឋមន្ត្រី អាប់ភិស៊ីត នៅទីក្រុងបាងកក កាលពីថ្ងៃទី១៩ តុលា ឆ្នាំ២០១០។ ក្រុមអ្នកកាសែតកម្ពុជា និងគណៈប្រតិភូក្រសួងព័ត៌មាន ដឹកនាំដោយលោករដ្ឋមន្ត្រី ខៀវ កាញារីទ្ធ អ្នកនាំពាក្យរដ្ឋាភិបាលកម្ពុជា បានធ្វើដំណើរទៅកាន់ប្រទេសថៃ កាលពីថ្ងៃអាទិត្យ ទី១៧តុលា។ ដំណើរទស្សនកិច្ចរបស់អ្នកកាសែតកម្ពុជា ដែលបិទបញ្ចប់នៅថ្ងៃទី២២ តុលាខានស្អែក ដើម្បីបង្កើនទំនាក់ទំនងរវាងអ្នកកាសែត និងកាត់បន្ថយជម្លោះប៉ាកកា តាមប្រព័ន្ធផ្សព្វផ្សាយរវាងប្រទេសទាំងពីរ។
លោកនាយករដ្ឋមន្ត្រី អាប់ភិស៊ីត អះអាងថា កំណត់ហេតុនៃកិច្ចប្រជុំរវាងរដ្ឋមន្ត្រីការបរទេសកម្ពុជា-ថៃ លើបញ្ហាជម្លោះព្រំដែន នឹងដាក់ចូលទៅកាន់រដ្ឋសភាថៃ អនុម័តនាសប្តាហ៍ក្រោយ នាថ្ងៃទី២៦តុលា។ ក៏ប៉ុន្តែលោកនាយករដ្ឋមន្ត្រី បន្ថែមថា មិនទាន់មានភាពច្បាស់លាស់ទេ ដោយសារតែសភាថៃ ជាប់រវល់ច្រើន ដូចជាដោះស្រាយបញ្ហាទឹកជំនន់ និងមានរបៀបវារៈមួយចំនួនទៀត ដែលត្រូវអនុម័ត។
យ៉ាងណាក៏ដោយ លោកនាយករដ្ឋមន្ត្រី អាប់ភិស៊ីត សន្យាព្យាយាមដោះស្រាយជម្លោះ ហើយចង់ឲ្យទំនាក់ទំនងទ្វេភាគីរវាងកម្ពុជា-ថៃ មានភាពល្អប្រសើរឡើងវិញ។ ម្យ៉ាងទៀត ដំណោះស្រាយជម្លោះព្រំដែនប្រទេសទាំងពីរ កាន់តែខិតជិតគ្នា នៅពេលរូបលោក និងលោកនាយករដ្ឋមន្ត្រី ហ៊ុន សែន បានជួបគ្នាពីរលើកកន្លងមក។
រីឯលោករដ្ឋមន្ត្រីការបរទេសថៃ កាស៊ីត ភិរម្យ បានបញ្ជាក់ប្រាប់ក្រុមអ្នកកាសែតកម្ពុជា ក្នុងជំនួបកាលពីថ្ងៃម្សិលមិញថា រដ្ឋាភិបាលក្រុងបាងកក ប្រកាន់យកអនុស្សរណៈយោគយល់គ្នាឆ្នាំ២០០០ ដែលជាបង្គោល ក្នុងការប្រើប្រាស់ ចំពោះការចរចាដោះស្រាយជម្លោះព្រំដែនរវាងកម្ពុជា-ថៃ។ កន្លងមកភាគីទាំងពីរបានរុករកបង្គោលព្រំដែន ដែលបានបោះ កាលពីសម័យបារាំង បានជាង ៤០ បង្គោល ក្នុងចំណោម ៧៣ បង្គោល។
លោករដ្ឋមន្ត្រីការបរទេសថៃ បញ្ជាក់ថា រដ្ឋាភិបាលថៃ នឹងយកយន្តការនេះ សម្រាប់ចរចា និងធ្វើការពិនិត្យបោះបង្គោលព្រំដែនជាមួយកម្ពុជា។
ជុំវិញការបង្ហាញឆន្ទៈរបស់ក្រុងបាងកកខាងលើនេះ ត្រូវបានលោក កុយ គួង អ្នកនាំពាក្យក្រសួងការបរទេសកម្ពុជា សម្តែងការស្វាគមន៍ ក៏ប៉ុន្តែលោកលើកឡើងថា សភាថៃ គួរតែអនុម័តលើឯកសារទាំងនោះ ឲ្យបានឆាប់ ដើម្បីឲ្យគណៈកម្មការចម្រុះព្រំដែនកម្ពុជាថៃ បានធ្វើការជាមួយគ្នាបន្ត ក្នុងការដោះស្រាយបញ្ហាព្រំដែនប្រទេសទាំងពីរឲ្យបានឆាប់។
លោក កុយ គួង បានបញ្ជាក់ថា ការដោះស្រាយជម្លោះព្រំដែន យឺតយូរនេះ ដោយសារតែខាងភាគីថៃ ពិសេសសភាថៃ មិនព្រមអនុម័តនូវកំណត់ហេតុទាំងបី របស់រដ្ឋមន្ត្រីការបរទេសប្រទេសទាំងពីរ កាលពីចុងឆ្នាំ២០០៨ និងដើមឆ្នាំ២០០៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ